• 壹週和你股|恒大三寶,跌到無譜|譚朗蔚

  • 發布日期:2021-06-09 14:35
    最後更新日期
    :2021-06-09 15:00
  • 壹週和你股|恒大三寶,跌到無譜|譚朗蔚

 

個市咁悶,我寫專欄都簡單好多,起碼唔洗點花時間在描述個市的操作之上。簡單一句:就係「等!運!到!」悶市無乜好做,今日同大家講下三隻同系的股份:恒大(3333)恒大物業(6666)還有恒大汽車(708)。內房我從來唔鍾意,我想大家都知道了。過去一年,但凡有粉絲問我買不買內房(你知啦,內房間唔時有一日起動家嘛)我都會反問佢一句:咁點解唔買物管?物管現金流足,低負債,又可以槓桿阿媽(母公司內房股)的增長,最最最重要的是:物管無調控之餘,中央仲扶持他們發展多元化收入。

不過物管股多如繁星,都有強弱之分的。咁橋,四條六就是最弱雞果個type!自二月見頂至今,股價就一直下跌。你有持貨還奢望佢有一刻來個報復性反彈的話,應該都心死。該股的均線大空頭,股價逢底破底,無他的,都係衰在市場對阿媽無信心!目前股份來到8.84這個位,也就是上市第一日第一口價了,要麼企硬要麼穿,穿了的話萬劫不復mode。至於「恒馳」?老實說,佢哋有幾流大家都知,連參加車展都夠膽死拎個無底板的空殼出來,真係膽大過沙煲,難怪中央都出口問:車都未有憑咩有5000億市值?

我曾經在本欄提過這隻股份的,當時是中央出口之後無耐,我當時的說法是:「股份盡入強者手」,你知道「強者」係邊個?畫公仔唔洗畫出腸,玩啤牌既呢!我話佢哋不減持的話,市場哪有貨?哪來跌得落。哈哈,結果原來股份在5月13被大股東減持,就是大跌浪的開始!三月底49元失守之後跌到依家,難為當時佢仲冠冕堂皇,話減持是為了讓市場上的流通量增加,為晉身港股通做準備。唉,現在回頭一看,原來只不過是割韭菜的藉口。以上三隻股份,大家就算幾睇好內房、物管同車,都揀過第二隻啦!

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多