• 沒有《Error自肥企画》, 日子點過 ?|吾港戲(尹學仁)

  • 發布日期:2021-06-04 13:29
  • 沒有《Error自肥企画》, 日子點過 ?|吾港戲(尹學仁)

 

不知不覺, 《Error自肥企画》已經播完兩個星期, 終於曲終人散, 連傳媒報導同訪問都大概已經全部見報, 每晚11點鐘, 不再需要追電視, 香港人, 你失落嗎 ? 關於《Error自肥企画》節目背後意義, 好多評論都已經講過, 不論由用日本動畫《EVA》頭尾兩集首尾呼應, 到扮速龍叫主持上返行人路, 以至到一個運動會有賽會參賽其實背後代表意義, 大家都應該心裡有數, 無謂再同大家講一次。

事實上, 《Error自肥企画》的確突破好多電視界限, 甚至顛覆香港社會價值觀。大概香港大部份男觀眾發夢都未諗過, 即使夜晚11點之後先播, 原來本地電視節目, 可以將「賓周」兩個字, 公然不停大聲講, 而贊助商亦可以接受, 節目主持不停表示不想贏贊助大獎(一噸啤酒直送住家), 實在大開眼界。

香港電視史上首次出現製作團隊在幕前公佈每集收支狀況。
香港電視史上首次出現製作團隊在幕前公佈每集收支狀況。
如果在大台,有人提出用自肥做賣點製作節目,應該兩秒就被 ban。
如果在大台,有人提出用自肥做賣點製作節目,應該兩秒就被 ban。

尹某真心希望, 《Error自肥企画》可以改變香港電視歷史, 不是一時改變, 而是長久改變, 成為一個轉捩點。其實你問尹某:《Error自肥企画》是否集集都非常好睇, 答案當然否定, 論節目橋段甚至執行手法, 《Error自肥企画》是否只有格仔導演「無制限OT編集団」先可以做到, 答案亦當然否定。事實上, 《Error自肥企画》令尹某想起, 昔日中學時代, 同學之間, 總有一堆搗蛋鬼, 經常想出奇怪念頭, 挑戰老師, 挑戰學校, 惹起同學共鳴, 又令同學捧腹大笑。

我覺得《Error自肥企画》, 其實只不過這樣一回事, 其實香港每間中學, 給予足夠資源, 都有同學仔可以拍得到, 而事實上今時今日, 任何人都可以用手機拍攝, 任何人都可以將自己拍攝所得放上網, 讓任何一個人都睇到, 拍電視拍電影做音樂出小說, 已經並非以前那樣遙不可及, 人人都可以創作。如果繼續無限上綱到某一點, 其實同今日電視生態一模一樣:基本上正是拆大台, 無人可以再扮權威。慣性收視 ? 有幾耐風流, 有幾耐折墮。

所以你問, 如果人人都做到, 點解要到今日先有「無制限OT編集団」製作出《Error自肥企画》? 答案正是尹某之前在本欄所講:香港創意工業最大絆腳石, 來自一班老闆話事人, 絕大部份都無能兼零視野 - 偏偏ViuTV話事人魯庭暉(人稱「魯暉」)正是一個例外。人類文明社會發展, 其實應該越來越公開, 越來越公平, 《Error自肥企画》證明發展軌跡正確。
幕後比幕前更型,亦屬香港電視史創舉。
幕後比幕前更型,亦屬香港電視史創舉。
粗口既然屬於生活一部份,成為電影電視節目一部份都好正常。
粗口既然屬於生活一部份,成為電影電視節目一部份都好正常。
本圖攝影機旁邊眼鏡男為格仔導演 Mike,前面半跪長髮男為編劇兼旁白麥可暉。
本圖攝影機旁邊眼鏡男為格仔導演 Mike,前面半跪長髮男為編劇兼旁白麥可暉。

大部分綜藝實況真人騷節目都好假, 《Error自肥企画》亦絕非完全真。第11集,格仔導演亦自爆肥仔跌落水池, 其實補拍, 而這正正《Error自肥企画》特色之一, 基本上將整個製作過程, 都呈現觀眾眼前:拍攝團隊其實等同主角 ,所有攝影機都會入鏡, 同傳統電視製作完全背道而馳, 即使幕前演員, 表演亦非常率真, 其中最簡單一點, 香港電視史上應該沒有任何一個節目, 比《Error自肥企画》更加多粗口。不過日常生活之中, 大家都講粗口, 有什麼大不了 ?

四位Error主持講粗口事小, 連自己屋企人都擺上枱先算真, 因為要做香港明星, 從來都要不食人間煙火, 要在泡沫中生活, 適婚年齡不拍拖, 從來不用去廁所, 所以當阿Dee贏出比賽, 要將一噸啤酒直送到屋企, 觀眾先發現原來阿Dee住公屋, 簡直香港電視史劃時代一幕, 原來阿Dee跟大家一樣, 都不過一個普通市民。今時今日香港, 我們仲需要堅離地明星 ? 仲需要住大屋 ? 仲需要避開時事政治 ?

君不見香港樂壇, 歌曲都以歌手做單位, 其實一首歌屬於歌手 ? 其實每首歌, 都先要靠作曲人填詞人創作出來。由格仔導演, 到兩位寫手兼旁白, 甚至Agent L, 《Error自肥企画》一班幕後紛紛走紅, 而「無制限OT編集団」上司, ViuTV 最紅監製花姐, 亦經常在其他節目幕前出現。尹某覺得, 香港從未尊重創作, 亦不尊重幕後, 如果《Error自肥企画》以至ViuTV能夠改變以上文化, 簡直功德無量。

最後, 當大家都不停讚賞《Error自肥企画》, 包括我自己, 其實亦要為ViuTV以至一班台前幕後擔心, 大家會推人去死嗎 ? 今時今日香港, 大家都要留意, 我都要。
----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多