• 禁忌之林|驗毒出錯要包容──林鄭:懲罰要顧及抗疫能力|林忌

  • 發布日期:2021-05-01 12:30
  • 禁忌之林|驗毒出錯要包容──林鄭:懲罰要顧及抗疫能力|林忌

 


「華大爆完一單又一單假陽性結果,搞到連幼稚園學生,都無端端要醫院隔離,30宗初步確診,得2單係真,其他都樣本受污染,咁都得?驗咩呀驗成咁?唔使負責任呀?」

『你冇聽特首林鄭月娥講,話懲罰要顧及抗疫能力呀,話一陣你罰華大罰得太重,搞到唔夠公司檢測,點算呀?所以要同佢哋「合作」喎,去幫佢搞好檢測應該做嘅安排喎!』

「冇銀嘢呀?銀就佢袋,責任就唔使負,仲話要大家『合作』?仲有咩唔夠合作呀?咪畀佢驗,驗到出假陽性囉,唔係一單半單係同時28單,你話有冇理由呀?仲要合作?合作造假呀?」

『哎呀,驗到假陽性之嘛,即係衰衰哋你唔好彩,畀人搞完一大輪,咪至多好淒涼咁畀人隔離,死唔去嘅!之但係好似另一單菲傭完成檢疫,撩兩次都冇發現,出到去就確診啦,呢單假陰性先大大鑊呀,帶變種病毒入社區添呀!當你強制人隔離,驗兩次都驗唔出,咁你強制檢疫來做乜呀?把托呀?』

「搞咩安心出行,幾人一檯擾民,就用盡一切努力,連基本嘢檢疫酒店飲食安排,以至強制檢測呢?就全部亂七八糟,連黨報都唔放過你!呢個政府仲好意思,賴市民唔同你合作喎,呢年幾賴呢個賴嗰個──個菲傭點解中招呀?就係隔離酒店中招呀,就係旁邊住咗一家三口確診,然後就搞到佢都確診呀,夠晒合作啦卦?合作一齊中毒呀!」

『早兩日報紙又爆,搵冇經驗嘅假自僱人士,去求其亂咁驗,班友撩下大牙附近就當驗咗,甚至只係撩鼻,連喉嚨都唔撩,咁搞法都得?咪驗咗得個吉囉!」

「求其做咗就當驗咗,驗咗就當安全,呢個政府係咁上下啦,唔見棺材唔流眼淚嘛,差不多先生嘛,總之最緊要就係好大喜功,吹到大一大,至於做唔到,或者亂做交課,理得你呀而家?呢個特首你第一日識佢呀?」

『新加坡人來香港,就唔使打疫苗,香港人去新加坡就要打;大陸人來香港就唔使隔離,香港人去大陸就要;來港易就大開中門乜都唔使檢疫,台灣夠晒安全,就強制人檢疫,你話家下邊個只係搞政治?家下邊個對唔住香港人,簽埋呢堆不平等條約?』

「多謝林鄭!家下變種病毒入咗社區,搞到10個月BB女確診,東涌映灣園400戶要連夜搬加隔離21日!係咪好開心呢?包容下啦!第5波大爆發好快又來啦,準備好又要封區執樓未呀?」

『林鄭今次表現好好啦!你諗下?出錯會道歉,你仲想點呀?以為道歉時露出__是常識吧呀?佢露你都唔睇啦化?』

「喂,咁政府請嘅外判商出錯,你只係道歉唔罰佢,有鬼用呀?唔係第一次啦!連續咁多單都仲係咁,仲未衰夠呀?」

『哎呀,好心你啦,起碼林鄭冇好似嗰個入境處處長咁,畀審計署批評,都仲要反咬一口,話人哋影衰佢形象啦,學11哥講法,the devil you know better than the devil you don't,一陣入境處處長嗰款新仔來做,仲衰多兩錢呀』

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多