• 禁忌之林|去海南島食海南雞飯嘅智將|林忌

  • 發布日期:2021-04-23 17:00
  • 禁忌之林|去海南島食海南雞飯嘅智將|林忌

 


「我好鍾意食海南雞飯呀!去海南島食,係咪原汁原味啲㗎?智將呀!智將呀!」

『好心你啦,好信唔信,信個連八達通都唔識用,晚黑唔識買廁紙嘅傻婆?見到海南兩隻字,就以為有海南雞飯食?就以為嗰度係海南雞飯原產地?冇嘢呀?你唔好話去瑞士食雞翼,去法國食French Fries,去德國搵德國寶…』

「吓?見班親政府傳媒,又講到海南雞飯源自海南,乜原來又係吹架?唔係話咩海南島有咩文昌雞飯咩?」

『海南島係有文昌雞,你可以叫佢做海南雞;亦都有雞油飯,但係兩樣嘢係分開嘅,冇放埋一齊食;更加就唔使配料,即係三色醬料,南洋香料等等,例如有啲用斑蘭葉,有啲用香茅,有啲會加黃薑粉,加添雞皮嘅顏色,有啲唔加,但點變化都好,調味都係同海南島無關,係成名於新加坡,關海南島咩事?』

「點同呢?主菜係『海南雞』,就係來自中國囉,得理得你其他嘢邊度來呀?」

『手提電話個主菜都係晶片,唔通話華為(以前)用美國晶片,用美國軟件,即係華為係來自美國咩?所以海南雞飯係新加坡菜!』

「咩呀?新加坡當年都未獨立,『自古以來』係屬於馬來亞聯邦嘅一部份!係都唔關新加坡事,係馬來西亞啦!何況仲有講早係新加坡出名前,在馬來亞已經有其他人做過!」

『馬來西亞當年都未獨立,全名係叫英屬馬來亞呀,咁你係咪叫海南雞飯係英國菜呀笨?』

「海南雞飯又點可以係英國菜?一定係自古以來中國不可分割嘅一部份啦,係中國菜!」

『係係係,就好似咩傑出華人,在外國出生長大,拎住外國護照,有咩成就嗰時,就立即話咩海外傑出華人,話係中國人的驕傲嘛;轉頭有咩醜事傳千里,就梗係立即割蓆,劃清界線,然後反轉豬肚,話你拉埋中國講,係歧視,係法西斯,係「污名化」呀嘛』

「係又唔錯呀,A貨咪咁做出來囉,國產扮外國貨嘛,人哋好靈活彈性,外國疫苗就講到自己有份『研發』又得,中國製造扮外國嘢亦得!」

『係咪好似咩武漢…..』

「你武獨,點解唔叫中囯武漢?你歧視,你法西斯,去平機會告你!」

『咪引大家笑啦平機會,班官一日到黑講咩英國病毒,英國變種病毒,南非變種病毒,呢個時候又唔怕歧視呀?又唔怕污名化呀?』

「唔緊要,又唔係中國出變種,點同呢?講中國就歧視,講英國就冇事,你唔係第一日知呀嘛?」

『我知,德國麻疹,日本腦炎,伊波拉病毒,西尼羅河熱,中東呼吸症,你鍾意點叫都冇問題,啊,連香港腳都冇事呀,政府網頁都仍然寫住(俗稱香港腳)呢種叫法,完全唔怕「污名化」,呢個時候又唔會鬧港獨,應該改名做中囯香港腳……』

「你別有用心,處心積蓄煽動仇恨,做外國嘅代理人…」

『你冇嘢呀?玻璃心呀?唔講得呀?唔想畀人笑,就做好啲自己嘢,點解成日嘢就唔識做,靠癡人地,專門認親認戚呢?自己做得衰,就賴咩外國勢力,好心你啦!』

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多