• 壹週和你股|睇真啲!生科有異動|譚朗蔚

  • 發布日期:2021-04-22 15:03
  • 壹週和你股|睇真啲!生科有異動|譚朗蔚

 

港股琴日又跌,但是睇真,恒指跌5、600點依然繼續是在過去一兩個星期的區間內徘徊。散戶睇點數,嚇到死去活來;我一開幅圖?悶到嘔茄!如果我今日都要驚,我豈不是應該失眠左成個月然後精神衰竭甚至乎死埋?至於「美股連跌三日到底是不是見頂?」這個問題就更加不值一提,人地假假地前兩晚仲創緊新高,你拿塊鏡望望自己個恒指?大佬,誠哥跌了幾蚊碎紙你洗唔洗擔心佢無飯開?你擔心下自己唔夠吃先好過啦!

市場的焦點一定是ASM(522),人哋純利勁升21倍,手頭上仲有好多做唔完的訂單,前景睇落一片光明,上望125前頂應該幾日就到,不過係唔敢在升了一成半過外仲追啫。等位啦,挨近返110邊至吸納的話防守性更佳。至於可以留意乜嘢?醫療或者生科板塊吧!價量齊升的有亞盛(6855)、春立(1858)、榮昌(9995)同金斯瑞(1548),全部都大大棍逆市破位,我唔知有咩原因,但佢地確實係搶到我的眼球。

要部署唔通真係隻隻買咩?邊得嚟咁多錢?好似科技股咁,你有冇可能一早睇中到ASM然後揸住等到今日的大升?問心,幾多人得?所以我成日教大家大包圍,起碼今日科指不似美股而跌咁少,最大的功臣就是ASM。至於生科,唔洗講我又是推介華夏生科(3069):佢追蹤超過30隻本地上市的醫藥、生科同器械股(今日普漲),基本上升咩都關佢事。琴日逆市上升,可以現價買入,目標30,穿22的話走人,博成個浪。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多