• 禁忌之林|「二等公民」?BNO白票唔怕坐監喎|林忌

  • 發布日期:2021-04-16 13:00
  • 禁忌之林|「二等公民」?BNO白票唔怕坐監喎|林忌

 

「中國駐英國大使館發言人話,英方多次炒作BNO問題,企圖把一批港人變成二等公民,係偽善的政治操弄,又話咩英國不是天堂,自身存在嚴重的種族歧視和其他社會問題喎」

『係呢,就當BNO去英國做二等公民係真呢好冇?咁家下香港人在香港似咩呢?三等定係九等呢?連話自己唔去投票,都隨時要坐三年監,更唔使講自己嘅政府自己冇得揀,連個立法會都由一半直選,比率減得兩成幾,香港「居民」咋,係公民咩?仲有咩公民權利呀?』

「香港梗唔係公民啦,你搞港獨呀?你係中國公民呀,做咩有中國公民唔做,走去做英國二等公民呀?」

『咁你就問下班大陸人啦,每年幾多大陸人去英國讀書?幾多中國人申請移民英國?我哋呢啲喺大陸景點收外國人費用嘅香港人,就話理解唔到中國公民有幾把炮,偏偏大陸班中國人,都搶住移民去三等、四等英國公民喎,為咩呢呵?』

「講呢啲,又傷害中國人感情呀,一陣班友又大叫『辱華』呀,唔好講啦!早兩日有個南韓嘅電競選手,在直播用韓文直認,話要賺中國嘅錢,就要做中國嘅狗,事後班小粉紅玻璃心好嬲呀,全國公審緊佢呀!」

『誠實是美德,唔係成日講咩「吃中國飯砸中國鍋」咩?咁家下人哋話乖乖地聽話,話要賺中國嘅錢,就要做中國嘅狗,兩句有咩唔同?有咩唔啱聽?佢侮辱自己咋喎,做咩咁又變咗辱華先?』

「哎呀,你明唔明?你講真話咪辱華囉,知唔知衰乜呀?你要一面拎英國護照移民英國,一面大叫我愛中國,話見到五星旗就流淚,然後大大聲話自己係中國人,佢哋先滿意㗎!」

『係係係,唔怪得有人話,最愛國嘅中國人,都全部拎外國護照!明晒!咁其實個領事仲有咩唔滿意呢?』

「哦,個領事仲話呀,咩港人去到英國後,受到歧視啦,咩生計『窘迫』,然後仲慘到要向中國駐英領使館求助喎,因此希望英方要咩『集中精力』去解決自身問題,唔好咩『挑事生非、誤導世人』喎!」

『拎住BNO搵中國領事求助?唔係嘛?乜咁似香港有啲唔知乜KOL,以前就日日唱衰BNO,話BNO冇用,又話呃香港人錢,到時使晒啲錢,就冇人幫冇人理,變人球;好啦家下英國政府改埋政策,話萬一唔好彩都幫你啦,又作堆新嘢出來?乜咁多英國組織冇人搵,係都要搵啲長期反對BNO嘅友仔幫忙咁神奇嘅!』

「係囉,講到移民有幾慘又乜又物,我以為係左膠哭訴新移民好慘嗰啲,又鬧政府唔幫佢手乜乜物物;以前新移民話劏房細,話公屋窄,話寧願返鄉下耕田,就話畀人鬧到隻狗咁,問做咩唔返鄉下耕田唧;家下英國間屋,點都一定大過香港嗰間啦掛?家下喊苦喊忽乜嘢先?」

『可能嘈嗰堆,咪係一面撐政府,一面移民嘅藍絲囉;哎呀,人哋諗住舒舒服服,純粹來拎著數嘛!』

「但有班標榜自己本土派,一向鬧左膠幫新移民,又話支持自食其力,反對濫用他人資源咩?家下好似同中國領事唱雙簧咁喎,講啲嘢一樣嘅?」

『好心咪篤爆人哋啦!你信嗰班偽本土,純粹係你自己一廂情願,美麗嘅誤會咋!人哋同你扮friend,當你係白癡,以為佢哋係本土派咋,好心你啦!』

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多