• 香港近五年唯一成功革命:ViuTV︱吾港戲 (尹學仁)

  • 發布日期:2021-04-09 15:38
  • 香港近五年唯一成功革命:ViuTV︱吾港戲 (尹學仁)

 

對香港影迷,復活節就等於香港國際電影節,過去幾日,睇過兩三套戲,感覺一般,可以留待正式上畫前後再傾。今個星期,我反而想講講 ViuTV。

不知不覺,原來 ViuTV 已經五周年,台慶騷就無謂多講,亦無必要多講,不過 ViuTV 最值得講,其實有兩三點:

ViuTV 開台初期,戰略非常正確,主力搞真人騷,避免用劇集對撼,而且著重創新排片(Programming)手法,想打破大台模式。何謂大台排片模式?劇集逢星期一至五,晚晚連續播。環顧全球,只有落後地區先會,先進國家如日本美國,劇集通常一個星期播一集,例如固定逢星期二播,其實現代城市人,逢星期一上堂,逢星期三運動,逢星期四返娘家食飯,好正常,生活根本同大台模式相反。事實上 ,大台模式只適合一種人:「時間唔值錢嘅人」,究竟邊種人?你自己諗。可惜 ViuTV 排片實驗失敗,因為廣告商贊助商拒絕支持配合,所以唯有跟返大台。

聽落非常行內可?當然 ViuTV 最成功一面,正正以三季《全民造星》,捧起獨立歌手自己樂團,而偏偏大台同幾大唱片公司交惡,另起爐灶塘水滾塘魚,結果搞到泥足深陷(當然大台要自殺,其實仲有其他大把理由死,並非今期要講)。

不過好多人都未有留意,ViuTV 仲有大力推動本地獨立製作,非常偉大。大台拍劇,從來自家包辦台前幕後所有資源,每月出糧條數必然好大,唯一降低成本出路,正正匿入電視城廠景日拍夜拍,將創作工廠化,不停鬥快痾出差不多產品,毋須太用腦,同影印機一樣,老行尊所謂 「keep 住有公仔出街」,就達到「全力以赴 做到最 cheap」之境界。

ViuTV 以至外國先進國家電視台,其實行一套相反系統,拒絕自己養埋一大班幕前幕後增加成本,反而將創作拍攝全部外判,街外任何大小製作公司,都可以同我賣橋建議節目,我慢慢揀,揀中就一手出製作費,一手等收作品。

獨立外判製作鼓吹業界競爭,有好橋,細公司都可以發圍,大家互相推動進步,又毋須為大台打一世工,又或者睇大台面色,令新一代幕前幕後有更加多磨練以至出頭機會,對香港創意工業追上國際水平,非常重要。

其實香港一早要行新路,只可惜被大台亞視零競爭殭屍狀態,浪費全城二三十年時間,結果斷送東南亞娛樂工業龍頭地位。

當 ViuTV 已經五周年,而開電視 / 有線電視又如何呢?上兩個星期,集團老闆竟然公開對傳媒訴苦,話 TVB 專搞劇,ViuTV 又專攻年青人市場,自己好難做。其實有線根本有看家本領,有全香港公認最佳新聞台,點知自己搵幾個奴才入屋做爛頭卒,自己拆自己招牌,如今只有等死一條路,相信比大台死得更快。

事實上,當早前廖啟智癌病離世,大家都會講返最佳電影《十年》,講返智叔在最後一段《本地蛋》演出,講返智叔幾句經典對白。其實經典對白,來自編導伍嘉良手筆,不過正如香港,不需十年,只不過五年,已經應驗翻天覆地改變,而在全城沉淪之際,至少香港仲有 ViuTV。

早前,ViuTV 搞五周年台慶。
早前,ViuTV 搞五周年台慶。
 ViuTV 大力推動本地獨立製作,當中《 暖男爸爸 》大獲好評。
ViuTV 大力推動本地獨立製作,當中《 暖男爸爸 》大獲好評。
 《 二月廿九 》在網上獲得不俗口碑,題材有新意。
《 二月廿九 》在網上獲得不俗口碑,題材有新意。

最後,今個星期新上畫電影,尹某推薦冷門之選:日本電影《晨曦將至》。雖然好多評論都反對直接比較,不過《晨曦將至》導演河瀨直美同另一日本新一代大師是枝裕和,近年近作都不約而同大玩非血緣親人關係,探討何謂家庭,今次《晨曦將至》亦無例外;而更加有趣仲有一大點,河瀨同是枝兩位大導演,想當年初出道,都走國際影展藝術片路線,絕對會令一般觀眾戲院瞓著,不過隨住年月洗禮,兩位都不約而同愈拍愈通俗,愈拍愈易睇。

今次河瀨拍《晨曦將至》,更加玩埋懸疑類型片,時間線同視點都錯綜複雜,某程度上都幾商業。如果你睇開河瀨直美,都幾大開眼界;而如果你從未睇過河瀨,今次部戲好易入口,放心入場,而且主要演員表現光芒四射。
電影《晨曦將至》女主角蒔田色珠並非新人,其實童星出身。
電影《晨曦將至》女主角蒔田色珠並非新人,其實童星出身。

作者簡介

行內人會視為行外人,行外人又會視為行內人。做過電影主創,又做過電影媒體,仲做埋電影教育。未天真到相信電影永恆,亦未灰心到認為香港電影玩完。不過一句到尾,身為電影觀眾,曾經叫做電影學生同畢業生,與其要做電影人,倒不如先透過電影學做人,首先要做個好人。
----------------------------

壹週刊 31年 和你壹路同行

回顧《壹週刊》31年走過的路

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多