• 禁忌之林|叫人唔去投票都犯法?驚咩呀佢哋?|林忌

  • 發布日期:2021-04-09 13:00
  • 禁忌之林|叫人唔去投票都犯法?驚咩呀佢哋?|林忌

 


「連人大投票都有得投棄權啦,家下叫人投棄權,會變犯法?冇嘢呀?香港變北韓呀?」

『哎呀,人哋好驚白票廢票多過有效票,好核突呀嘛,咪要立法禁咗佢囉!咁一陣禁廢票、白票,你班友就索性集體拒投票,一陣投票率由2019年區議會嘅71.23%,跌到得返一兩成,咪核突到喊,咁咪又要立法禁止你班友呼籲人哋唔去投票囉,明冇?』

「咁都搵個好啲嘅理由呀,咩拒絕投票都變『操縱選舉』都講得出,由大陸一車車運班友來種票,就唔叫『操縱選舉』;用咩掌心雷,用蛇齋餅糭呃老人家去投票,甚至呃老人院院友,乜都唔知去投票,就唔叫『操縱選舉』,直頭唔同佢玩,唔入場投票,叫大家返屋企早抖,就叫『操縱』呀?點『操』呀?操佢阿媽個操呀?」

『今時今日,你都知呢班友已經係狗急跳牆,毫無道理可言,乜都佢講晒啦;當連選個立法會咋,都要過五關求契爺,包括拎人大選選委提名先入到閘,然後仲要過咩國安審查,你都知入得係咩人,唔使旨意有咩人揀啦!咁咪好囉,終於「還原基本步」,佢話晒事囉,唔使煩,大家一齊食花生等睇戲好啦!』

「佢哋自己講,話有238.5萬人聯署,支持人大改變香港嘅政治制度呀嘛,嘩!仲多人過上屆立法會選舉嗰229萬人!驚咩呢?沉默嘅大多數都支持佢哋嘛,點計數都贏晒我哋啦,驚咩投廢票白票,或者叫人唔好去投票呢?」

『哎呀,就係怕你哋揭穿佢哋篤數呀!一陣最高領導人問佢:又話好多人支持,做咩而家得返咁少人投票?點算呀?影住個冷冷清清嘅票站,再比較返以往選舉嘅人山人海打蛇餅,邊個冇面呢?』

「好心啦,咁驚咪索性取消選舉,自己用手指腳趾逐隻啜飽佢囉!又要威,又要戴頭盔,搞選舉就驚輸,搞假選舉就驚冇人投票,搞來做咩呢?浪費公帑就咪搞選舉啦,大大聲話獨裁好,獨裁妙,學下當年希特拉咁,從此唔搞選舉,咪幾好?」

『哎呀,講起希特拉就傷心呀,人哋假假地都試過在公平選舉入面玩過,唔使靠咩外掛功能組別分組點票制,點似呢班忠誠嘅廢物,輸足廿幾年,終於發爛渣搬龍門,廢晒個選舉佢,點同呢?』

「早排仲嚇大家,話邊個拎BNO居英,就會喪失投票權喎,家下咁樣嘅投票權,真係送畀你都嫌煩,唔要好過要呀,有冇得叫佢盡早收返?唔使擔心第日被人強迫去投票呀?快啲收返我個投票權啦!求求你!」

『所以呢排咪聽埋聽埋,成街都話賣樓移民囉;唔止黃絲呀,藍絲都話走呀,個個口裏愛國,身體都好誠實,聽到共產黨殺到來,連地產黨都要走夾唔抖呀!你估班港共就唔驚呀?』

「怕咩?唔怕!要信政府!唔係好多保皇黨撐住咩?」

『保皇黨自己都腳軟呀!以前就話拎住幾廿票代表中央,個個都買佢哋怕;家下變晒一言堂,即係佢哋只係橡皮圖章,加上到時選委會紅色勢力40席玩晒,嗰班隨時直頭欽點大陸落來嗰班親生仔,使乜靠你呢班隔一層嘅香港人呀?文革式批鬥呀嘛,批批下就梗係批埋自己友啦,前排你都見班土共自己鬼打鬼,你估出奇呀?』

「哎呀,睇住寫字樓大量空缺,樓價又插埋水,到時真係唔知邊個最傷心啦!總之就一定唔係我同你啦!」

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多