• 失業轉行尋出路丨文員麥記送外賣美容妹打3份工養家 靈探女為供樓轉揸貨van日踩17粒鐘

  • 發布日期:2021-04-07 07:00

 

疫情持續將近年半,經濟不景、百業蕭條,本地最新失業率升至7.2%,創出沙士後新高,逾廿六萬人失業。

加入失業大軍,對不少人來講或許是陷入了人生低谷,亦有人能谷底反彈,在逆境下尋到另一條出路;九十後美容師阿欣和靈探節目主持Jean,各自面對著無工開的困境,卻用行動向身邊人證明,女生也可以逆境自強!

採訪:惠楚生

攝錄:田俊

失業美容師 打三份工捱世界

失業美容師 打三份工捱世界

「今日十二點三開始送外賣,正式就喺半個鐘前開工,即係十一點幾開始。」26歲的阿欣身形瘦削,右肩撐起頗重的外送速遞保暖袋,走路時顯得有點吃力,卻仍咬緊牙關走遍大半個屯門。

「唔好意思,我想問B2座喺邊度㗎?」只見阿欣一臉焦急地不斷向途人「求救」,全因找不到要把外賣送到的地方;送外賣並不是阿欣的專業,她只是名初哥,「今日第一日開工。我覺得都OK嘅,送一單就有三十蚊,走多幾轉就可以搵到幾百蚊。」

「其實屋企人都好擔心我做送外賣,本身自己都有少少擔心,因為始終要送去人哋屋企,所以每次送外賣都會同屋企人匯報會送去邊度,如果我無回覆,佢哋就會搵返我。」送外賣是阿欣的兼職,她的正職是在柴灣一倉庫仼職文員,朝八晚六也只得萬多元的酬勞。

「其實我以前係做美甲,不過因為疫情關係,暫停營業好耐,所以就搵其他工作。」馬死落地行正是阿欣的寫照,她深知自己學歷未如理想,在失業潮下再也不能找到一份過兩萬元的工作,「所以仲有做其他兼職,第二份係麥當勞,第三份就係業餘性質,唔會經常開工嘅FoodPanda。」
阿欣每逢假日都會背起外賣袋,兼職當外賣妹。(田俊攝)
阿欣每逢假日都會背起外賣袋,兼職當外賣妹。(田俊攝)
日瞓四粒鐘 全為撐起頭家

日瞓四粒鐘 全為撐起頭家

每逢禮拜一至五,阿欣從柴灣下班後,便立刻趕到寓所附近的麥當勞,換上制服,通宵達旦地工作至凌晨一點半;她的睡眠時間只有四個多小時,「我都覺得自己好辛苦,但無辦法,香港就係咁現實,都要搵多啲錢。」

在麥當勞兼職的工資並不高,但她在這裏一做便做了半年,「因為時間好彈性,可以自己選擇返工時間,其實人工好低,只不過時間真係好自由,同埋好開心,同啲十幾歲,細過我嘅人一齊玩(工作),其實好開心,好似平衡返自己咁樣。」

阿欣是家中的獨生女,父母才剛退休,便碰上美容停業令,肩負起養家責仼的她未敢鬆懈,雖然「八足咁多爪」兼每日捱眼瞓,但月入仍不過兩萬,不過她仍選擇把逾半的收入貢獻父母,「全部都要靠我供養,所以一定要努力啲,其實都好大壓力...但唔靠我仲可以靠邊個?」

有些少女終日渴望碰上白馬王子,然後幸福快樂地當上城堡的主人而不用憂柴憂米,阿欣卻斬釘截鐵,堅持要靠自己,「好多人都話我好勤力,但無辦法,因為我唔想靠男人,所以唯有靠自己...我淨係覺得只係肯勤力返工,就一定會有回報。而回報多少都唔係問題,總之肯做就會有回報。」
阿欣肩上背負著的,還有養家的責仼。(田俊攝)
阿欣肩上背負著的,還有養家的責仼。(田俊攝)
在柴灣下班後便到快餐店當兼職,每日睡眠時間只剩四小時。(田俊攝)
在柴灣下班後便到快餐店當兼職,每日睡眠時間只剩四小時。(田俊攝)
靈探節目主持 放下身段搵真銀
靈探節目主持 放下身段搵真銀
「今朝四點半起身,六點鐘要去到北大嶼山醫院,然後六點九要去到仁濟醫院,七點鐘去到明愛...」Jean才剛剛熟手地把她的客貨車停好,手上還拿著一杯當作早餐的快餐店咖啡,便匆匆忙忙地邊下車邊說著話來,因為她正趕著迎接今天的第一批顧客 - 一位女士和三隻柴犬。

80後的Jean,在三個月前是電視台靈探節目的主持人,現在是一名客貨車司機,每天清晨也固定地替醫院運送化驗物品,把車輛徹底消毒後,坐駕便會變身成「寵物專車」,專營帶著寵物的客人生意,「因為狗狗,尤其係唐狗係好難叫到車,但因為自己都係愛狗之人,所以就變成只係做寵物接送生意,估唔到又行得通。」

談起「生意經」時的Jean笑得特別開懷,想不到在一個月前的她曾陷落人生低谷。離開電視台後,Jean曾因找不到工作感到絕望,更曾萌生自殺念頭,「喺失業情況下真係唔知點算,真係要捱肚餓,連Donki、吉之島嘅sales工都唔請我,當時真係好徬徨無助,唔知點算,親戚亦好睇唔起我,所以我曾經諗唔開,想自殺,連炭都買埋。」

Jean以往在機塲做地勤,13年改行做保險生意,事業有成的她,年紀輕輕已晉身有樓一族,豈料如今卻因失業差點沒錢供樓,「當時我諗,我呢個歲數就已經擁有一層樓,無人可以睇唔起我,當時自己真係會感覺不可一世,當自己面對無錢供樓嘅時候,身邊仲有一啲真心朋友企出嚟幫你,搵埋老闆畀你,其實係要感恩。」
 Jean曾當上靈異節目的靈探女,離開節目組後初嘗失業滋味。(田俊攝)
Jean曾當上靈異節目的靈探女,離開節目組後初嘗失業滋味。(田俊攝)
 Jean現在主力做寵物接送生意。(田俊攝)
Jean現在主力做寵物接送生意。(田俊攝)
不怕被客認出:認得我證明我有人識
不怕被客認出:認得我證明我有人識
她在年前因參與一節目被電視台監製賞識入行,節目長拍長有,離開節目組後頓失穩定收入。經朋友介紹,Jean在上月正式投身客貨車司機行列,除了每個早上替醫院運送物資,入行初時亦替網購平台派貨,「雖然啲貨好重,但無辦法,因為需要搵錢,所以一定要搏,同埋叫做係靠自己雙手。」她堅持不靠別人分毫。

在最初的一兩個禮拜,Jean經歷過坐駕被抄牌、被小巴追撞,工時更常常長達十六、七小時,「之後有朋友幫我喺不同嘅狗狗群組貼文,叫我影低架車啲相,執得乾淨啲,因為寵物要call車好困難,呢班朋友就幫我宣傳,即日已經有人WhatsApp問價,所以我覺得運送寵物真係有得做,而家真係儲咗一班固定客人。」

不時有客人認出她是螢光幕上的靈探女,她也從容面對,「我唔覺得自己無面,反而覺得好開心,因為你認得我,我戴住口罩你都認得我,仲要我而家送貨去你屋企,你咁開心,我又咁開心,咁樣有咩問題?」

未必所有人能放下身段,但Jean深信腳踏實地,定必有回報,「我希望今次真係可以喺逆境之中爬番起身...為咗自己、將來同埋屋企人,爬番起身,先至係我哋獅子山下嘅精神。」
 當上客貨車司機後,Jean每天都需直踩十七小時。(田俊攝)
當上客貨車司機後,Jean每天都需直踩十七小時。(田俊攝)
 在絕望裏,幸得身邊人相助,踏出逆流而上第一步。(田俊攝)
在絕望裏,幸得身邊人相助,踏出逆流而上第一步。(田俊攝)
----------------------------

壹週刊 31年 和你壹路同行

回顧《壹週刊》31年走過的路

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多