• Dee@ERROR扮劉華扮到獲劉華召見︱家有靚仔校草阿哥玩音樂 阿Dee: 點解唔將佢個樣畀我

  • 發布日期:2021-04-08 07:00

 

男團ERROR,打正旗號賣騎呢搞笑!唔係靠樣搵食,少一分偶像包袱,多一分食腦才華說服觀眾點解要睇你。

「醜的都能當影帝,不是很勵志嗎?」ERROR阿Dee(何啟華)曾說。

14年做YouTuber彈起一時,到18年參加《全民造星》,ERROR成軍,今年初終嘗電影男主角,醜男勵志,少不免迂迴曲折。

 雖然外型比不上他人,但阿Dee在演藝坦言有野心:「我唔想淨係成為一位綠葉咁簡單。」
雖然外型比不上他人,但阿Dee在演藝坦言有野心:「我唔想淨係成為一位綠葉咁簡單。」
 18年ERROR成軍,阿Dee與肥仔梁業一直表現突出。
18年ERROR成軍,阿Dee與肥仔梁業一直表現突出。
 「醜的都能當影帝,不是很勵志嗎?」曾經這樣說的阿Dee,或許有天來張新舊影帝的合照。
「醜的都能當影帝,不是很勵志嗎?」曾經這樣說的阿Dee,或許有天來張新舊影帝的合照。
中史老師睇中

中史老師睇中

在他藉藉無名時,宇宙間已經有四個人,一早相信阿Dee的Character可以發光,第一個是她。

「中學一位中史老師係影響我最深,佢教書之前係TVB編劇,係佢話俾我知,我可以做戲。就好似電影《功夫》入面,周星馳對住個小朋友咁樣,叫佢揀一本秘笈去學。當時佢同我講:『留意咗你好耐,寫咗個故事,當中一個角色好適合你,有冇興趣加入戲劇學會?』,我話好呀!」無校草樣,但口多多又表演慾強的阿Dee,是學校風頭躉。

第二個,是他參加《全民造星》時講過,尊重兒子追夢的母親。Dee說:「雖然以前佢間唔中都叫我正正經經搵份工,但唔係阻住我做演員,只出於擔心,因為發覺我連生活都有問題,銀包經常無錢。阿媽好鍾意摷我啲嘢,直至今日仍然好鍾意摷我銀包,以前見到我無錢就會塞啲錢入去,而家摷我銀包,就會問我撳咁多錢出嚟做咩?我話其實有幾多,只係千幾蚊現金,好正常。」

Dee搞笑天份,莫非來自Dee媽。「有次佢問我知唔知喺我facebook留言嗰個,其實係佢,叫我唔好俾like,話好醜怪。」見到個仔由藉藉無名到有粉絲,欣慰的Dee媽學上網,開facebook了解兒子「走勢」。
校草阿哥放棄夢想成就他

校草阿哥放棄夢想成就他

第三個,是比他年長六年的阿哥。阿Dee生得一副岩巉樣,他哥哥卻是靚仔兼夾Band的校草。然而Band 1校草阿哥放棄音樂夢,成就細佬。

「佢都係一個好信任我會成功嘅人,係無條件支持我。我咁任性養唔到家,有呢個狀態都係因為阿哥。」

「我想講佢靚仔過我好多,我同佢好唔似,佢真係好靚仔,以前係校草。唔知點解我生得咁唔靚仔,點解唔將佢個樣俾我,佢係一個靚仔,又夾band玩音樂,但因為佢係哥哥,所以孭起咗做哥哥嘅責任(養家),放棄堅持繼續行呢條路,然後佢又知道我鍾意表演,叫我放心,總之相信自己,有得做就盡力做好,我好多謝佢。」
 他生得一副岩巉樣,但家有一位靚仔兼曾是校草的哥哥,阿Dee:「我同佢兩個樣,點解唔將佢個樣俾我。」
他生得一副岩巉樣,但家有一位靚仔兼曾是校草的哥哥,阿Dee:「我同佢兩個樣,點解唔將佢個樣俾我。」
 阿Dee哥哥生得高大靚仔,跟他外型恰巧相反,但哥哥為養家放棄追夢,成就有演藝天份的細佬。
阿Dee哥哥生得高大靚仔,跟他外型恰巧相反,但哥哥為養家放棄追夢,成就有演藝天份的細佬。
 哥哥是Band 1名校的校草,讀Band 3學校的阿Dee,憑著表演慾兼多口,是校內風頭躉。
哥哥是Band 1名校的校草,讀Band 3學校的阿Dee,憑著表演慾兼多口,是校內風頭躉。
冇劉華樣有劉華心
冇劉華樣有劉華心
相信他在演藝圈能有一番作為的,還有拍拖多年的女友,曾參加Viu《廣告女王》選舉的文芊澄。18年,他在IG公開多謝她,寫下:「除咗我阿媽,妳就係另一個默默守護我嘅女人……妳無條件相信我終有一天會成材。」

不過要對住鏡頭談女友,原本輕鬆自如的阿Dee,忽然硬晒呔。「我女朋友好認同我,係咪一定要答?因為我好想收埋女朋友,我心底裡都有啲似劉德華,哈哈!唔係好鍾意提起女朋友。」冇劉華樣,都要有劉華心。
 阿Dee的才華未被發現,他背後的女人早已給他肯定。18年他在IG公開多謝女友文芊澄。
阿Dee的才華未被發現,他背後的女人早已給他肯定。18年他在IG公開多謝女友文芊澄。
難忘舊老闆俞琤氣場
難忘舊老闆俞琤氣場
演員路,由中史老師發掘下揭開序幕,中學畢業後在灣仔劇團繼續修讀戲劇,18歲加入當年由俞琤打骰,專培訓年青創作伙伴的「天比高」(天比高創作伙伴賽馬會策動新思維)。

「其實好多勁人都係天比高出嚟,有東方昇(王嘉偉)、李拾壹、阿修、顏卓靈,有好多好多人,仲有林日曦。」說起這培訓之地,阿Dee好多回憶,感激導師有耳非文的提拔,還有舊老闆俞琤的氣場。

「當時我得十幾歲,見佢繑住手已經好有氣勢,無佢又真係無呢個地方,所以接觸呢啲人嘅時候會好驚。我呢啲小職員好少同佢一齊開會匯報,只不過佢每次返到公司,好記得每個部門嘅主管就會話,俞琤返公司,大家收拾好張枱,收埋啲零食,佢最憎見到人食零食,同埋張枱好亂,同我執乾淨佢!然後全部人就會即刻行動,因為真係試過有啲同事枱面比較凌亂,佢真係行埋去,問張枱點解咁亂?平時無執拾?我覺得都啱嘅,可能張枱亂代表個人都亂,即係要乾淨,咁樣個人先會有紀律嘅概念,好記得呢啲畫面。」
 在「天比高」接受演藝培訓,見證老闆之一俞琤的魄力與氣場。
在「天比高」接受演藝培訓,見證老闆之一俞琤的魄力與氣場。
報考過TVB陰差陽錯
報考過TVB陰差陽錯 曾幾何時求出路,阿Dee報考過TVB!

「我有報過隔離台藝訓班,跟住之後叫我面試,但碰巧當時我唔喺香港,跟家人返故鄉雲南,哈哈!因為屋企人都覺得,TVB唔會俾你面試機會,其實連我心底都係咁樣諗,TVB唔會揀我呢一類,但點知打嚟叫我去面試。」好在陰差陽錯,命中注定,他是Viu的人,屬於花姐。
 他曾經報考TVB,但陰差陽錯未能去面試,命中注定他是Viu的人。
他曾經報考TVB,但陰差陽錯未能去面試,命中注定他是Viu的人。
第一個高峰跌下來
第一個高峰跌下來 自知輸外型,阿Dee於是磨到周身刀,苦學埋唱歌同跳舞,多副架生多條生路。

學跳Locking的他,跳到成本地top 10 之一,去過好多地方比賽,包括日本。正打算把事業重注dancer生涯,怎知出戰內地一場比賽,出了意外。

「喺總決賽時整斷咗韌帶,然後呢件事改變咗我,本來打算的起心肝鑽研跳舞,喺呢個範疇發圍,但點知斷咗韌帶,斷咗就係斷咗,即使駁番都唔會再係同一條。當時意志好低沉,因為啱啱上緊去,係人生跳舞嘅高峰位,當時大約23歲,我由17歲開始跳舞,花時五年浸淫。」
 花了五年時間鑽研舞蹈,跳出成績,正當把事業重心投向Dancer發展,卻在一場內地比賽意外斷韌帶,五年心血付諸流水。
花了五年時間鑽研舞蹈,跳出成績,正當把事業重心投向Dancer發展,卻在一場內地比賽意外斷韌帶,五年心血付諸流水。
扮劉華彈出 到無而為繼的失落
扮劉華彈出 到無而為繼的失落 命中注定,他是吃幕前飯。

「唔知係咪命運,因為斷咗韌帶無工作,所以先至同游學修一齊拍YouTube,好似命運幫我揀咗,話俾我知,其實心裡面都有個演員夢,可以去追。」

結果憑著hit爆的二次創作《日日去鳩嗚》MV,扮華Dee為肖為妙的阿Dee,即時彈出!

個個唔揀,點解偏偏揀扮劉華?他澄清非他主意:「扮劉華唔係我決定,係阿修!我無刻意去模仿,特登好想去扮佢,只係唔小心扮過佢,然後學識咗點樣扮佢,跟住唔小心咁樣發揚光大,俾人知道我識得扮劉德華,所有嘢都係唔小心,完全無計劃過。」

彈出後,一度成為傳媒焦點,連港台節目《視點31》都訪問他,可惜好快無以為繼,網紅只是剎那光輝。

「真係多咗人認識,當刻爆起咗係好開心,但承接唔到,因為人生無經驗,又唔知道可以點樣做,爆上去之後好快就跌番落嚟。」

拍擋游學修替他不值,覺得阿Dee不懂把握,白白錯失贏在起跑良機。

「其他人係咪咁睇---佢只係識得扮劉德華,演技麻麻地,之後就開始無人留意,再無人搵我。當時我嘅心理階段好複雜,一方面好想話俾人知,我唔係只識扮劉德華,但現實嘅我,又好似真係無其他方法話俾人知,我有咩嘢比扮劉德華更出色。」

「人家覺得,你演嚟演去,都係覺得你扮劉德華最過癮,其他演出都好一般,有個咁嘅狀態,然後好想發力,但又發唔到力,之後又發錯力,慢慢機會又流走,內心就開始好迷惘。」
跟好友游學修比較生自卑
跟好友游學修比較生自卑 走詼諧的人,條路一點都不詼諧。

再將自己與上了位做男主角的拍檔游學修比較,阿Dee更加自討苦吃。

「當時好自然會將自己同一個咁親密嘅朋友比較,但嗰種唔舒服好微妙,你會好戥佢開心,同時會為自己難過,點解自己好似唔爭氣,懷疑自己係咪只得咁多?因為當時我可以客串兩部電影《同囚》同《鴨王》,都係因為朋友關係先至有得拍,《同囚》因為阿修,《鴨王》就因為何浩文。」兩套電影,好友是主角,他是大茄。

他續說:「有少少好似活喺佢哋嘅影子之下,我好似要望住佢哋去追一啲嘢,因為我見到佢哋為自己行咗一條路,而我唔識得點樣做,跟住會諗,不如學佢哋咁樣,但發覺根本學唔到佢哋行嘅路,但又搵唔到屬於自己嘅路,心情好忐忑,會唔開心。」
 老友游學修在電影《同囚》是男主角,他是大茄,還因阿修原緣故,才有份演出,阿Dee坦言那時的他,會不其然把自己跟對方比較,簡直自討苦吃。
老友游學修在電影《同囚》是男主角,他是大茄,還因阿修原緣故,才有份演出,阿Dee坦言那時的他,會不其然把自己跟對方比較,簡直自討苦吃。
為生計洗地都做過
為生計洗地都做過 低迷期,跟游學修去吃喝玩樂,都感自卑,加上連父母都養不到,阿Dee更自覺一無是處,看甚麼都是灰蒙蒙。「自己屈喺嗰個世界裡面,幾負面、幾灰。不過就算感覺唔到有咩未來時,都無想過放棄做演員。」

寧願打雜、洗地乜都做,幫補生計,撐住等候下一個演出機會。「我有做過售貨員、侍應,連洗地都做過,係去學校洗地,其實即係打雜,散工乜都做。」
劉華召見反應搞笑
劉華召見反應搞笑 當灰蒙一遍,上天又給他少少曙光。18年金像頒獎禮,他是七位新生代演員之一,有份拍宣傳片《我與金像獎的距離》,其實當日,他原本只是女版「霞姨」的身份。

「其實本身唔係搵我做表演,係搵我去搵人幫手做表演,我諗住開開心心賺番幾百蚊就算。點知導演認得我係華Dee,叫我一齊上台玩,我話唔好啦,但最後都應承咗!」

當日他站在台上,負責介紹劉德華角逐電影《拆彈專家》,終於真劉華,後台召見假劉華。

「當時我介紹完之後落番台,突然有個幕後工作人員行埋嚟講,話劉華想見你,我好驚訝點解佢會想見我,後來聽過好多版本,有個版本好似話因為我介紹《拆彈專家》時表現唔錯,想認識一下。但又聽過另一個版本,劉生已經知道我曾經扮過佢,我唔知道邊個版本至啱,但有個咁嘅機會,我當然即刻去後台見佢啦!」

「見面時候我只識得目定口呆,無誇張,真係有一種好似見到神嘅感覺,其實又好誇張,哈哈!我唔知當日係咪我髮型怪怪哋,佢一見我,眼神有少少猶豫,有半秒皺一皺眉頭,唔知係咪覺得:『呢個𡃁仔曾經扮過我?唔似我喎,咁樣衰!』,然後我講句: 『劉生,你好。』,印象中佢好似有讚我,話我介紹佢部電影講得幾好。」講起劉華,他又劉華上身,阿Dee的喜感再發揮。
  18年他以新生代演員,為金像獎站台介紹劉德華角逐的電影《拆彈專家》,當晚劉德華召見他。
18年他以新生代演員,為金像獎站台介紹劉德華角逐的電影《拆彈專家》,當晚劉德華召見他。
  真劉華後台見假劉華一刻,阿Dee說對方有半秒皺眉:「唔知係咪覺得:『唔似我喎,咁樣衰!哈哈!』。」無時無刻他都懂自嘲。
真劉華後台見假劉華一刻,阿Dee說對方有半秒皺眉:「唔知係咪覺得:『唔似我喎,咁樣衰!哈哈!』。」無時無刻他都懂自嘲。
由負評變正評
由負評變正評 見完劉華,同年參加《全民造星》。他不是姜濤,一出場,無論花姐抑或網民,反應一致!

「一企出嚟觀眾就問呢個係乜水?憑咩呀?好樣衰囉、語氣好衰囉、樣貌眼神好衰囉,其實一直都係批評緊我改變唔到嘅嘢,你不如先睇吓我嘅表演,然後我就透過每個表演,慢慢去爭氣,觀眾就覺得呢個人雖然樣衰,但都有可取之處,我呢類型嘅人就要咁樣捱。」由負評變正評,扭轉局面,都係一種滿足感。

「曾經有個的士司機認得我,好記得佢叫我加油,話我將來一定會成為一位好出色嘅綠葉。其實我有野心,我知道自己外型上一定輸俾其他人,但都唔想淨係成為一位綠葉咁簡單。」
火火曾批做唔到戲的死𡃁仔
火火曾批做唔到戲的死𡃁仔 經過兩年,有人繼續認為阿Dee醜,但有才華。蕭定一找他當網絡電影《向西聞記:阿姨!我不想努力了》男主角,拍住盧覓雪搞笑,事後蕭定一這樣說:「佢真係做得好好,我好耐冇見過一個演員,咁有創造力。」

有戲做,仲要係男主角,應該可以解開在「天比高」時一個心結,就是導師火火(導演)一番話。

「好記得火火,佢都有教過我哋,火火好搞笑,當時我哋仲係死𡃁仔,十八歲左右,我本身好有表演慾,好多時跟佢嘅指示做表演時,都會超出指示做多咗。火火當時同有耳非文講過,話阿Dee呢個𡃁仔做唔到戲,因為我無紀律,唔跟規矩。」

「到《全民造星》再見番佢,我被淘汰當日就同火火講,問佢仲記唔記得曾經講過呢句說話?火火好疑惑,然後問佢我仲可唔可以演戲?佢話得!好似逼佢要咁樣答,哈哈。」

「呢個係一個少少嘅心結,因為當日俾一個自己認同、有能力嘅前輩話我做唔到戲,但事隔多年後,我又好明白佢當日點解會咁樣講,換轉當日我係火火,見到阿Dee呢個𡃁仔,我都會覺得佢做唔到戲啦,都唔聽指示,雖然好有表演慾,但做唔到戲,因為唔聽話,無紀律,唔跟指示,演員其實需要紀律。」
 蕭定一找他當網絡電影《向西聞記:阿姨!我不想努力了》男主角,拍住盧覓雪搞笑,被外界讚賞。
蕭定一找他當網絡電影《向西聞記:阿姨!我不想努力了》男主角,拍住盧覓雪搞笑,被外界讚賞。
呢條弧線最珍貴
呢條弧線最珍貴 嚐過不似預期的際遇,30歲阿Dee相信自己有好的心理質素,迎戰可能下一個不似預期的狀況。

「如果無試過低潮,真係唔會有呢啲素材(喜感)。例如曾經全世界為你歡呼,然後低潮時無人記得你,呢條弧線好似股票指數一樣,呢個至係最珍貴,所以而家嘅我,好似上緊去,但其實都係等緊呢一個低潮。」他指一指向下。

雖世事難料,但會唔會又睇得太灰?「我覺得都係正常嘅,做呢一行必定會係咁樣,即使本身好靚仔、好有型、好出色,但都一定會有呢個低潮,同埋係一個循環,但我相信嚟到嘅時候我會更懂得應對,知道點樣善用佢。」

沒有23歲那場上上落落,不會成就今日內在豐富的阿Dee。「無試過低潮,真係唔會有呢啲素材。因為有嗰個我,先至衍生到現時嘅我,令我有材料豐富自己去做表演。」

採訪:S.Lo

攝錄:曾惠衛

場地: Tapa Room

服裝:Dmop

化妝: Kennis Leung @AnnieG. Chan Make up Centre

髮型: Denny Ku @Chic Private i Salon Hair
----------------------------

壹週刊 31年 和你壹路同行

回顧《壹週刊》31年走過的路

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多