• 禁忌之林|祝特區政府 成功爭取科興疫苗聲譽良好!|林忌

  • 發布日期:2021-04-02 15:00
  •  禁忌之林|祝特區政府 成功爭取科興疫苗聲譽良好!|林忌

 

「嘩,你有冇睇新聞呀?香港旅遊業界幾巴閉呢,佢哋要求特區政府向世衛提出,要求全世界各國認可科興疫苗,然後等注射科興疫苗嘅香港市民,可以享有免檢疫出入境安排呀!」

『冇病呀?人哋承唔承認隻疫苗,唔係他國內政咩?關世衛咩事?你想享有人哋國家嘅免檢疫安排,唔係應該打人哋國家都接受嘅疫苗咩?點會倒果為因,叫人哋要承認你隻疫苗?』

「但係咁喎,佢哋夠膽提出,即係原來世衛認,其他國家就認嗱?咁點解世衛唔認呢?又轉頭問啦,點解要由香港特區政府,來呼籲世衛認呢?乜科興係香港公司,而唔係中國公司咩?如果中國政府都叫唔到世衛,咁香港點解會叫得到?」

『你唔好理啦,家下香港新聞就係咁荒謬啦,成個疫情期間,幫保皇黨親共利益集團,日日亂吹亂爭取,你估第一次咩?你估佢講畀你聽呀?佢講畀班藍絲支持者聽咋!嗰班友全部都洗晒腦,但係都鬧政府呀!仲要係鬧林鄭添!你真係聽一次都笑一次呀!』

「吓?洗晒腦都鬧政府鬧林鄭?搞邊科?」

『班友鬧林鄭,鬧佢同特區政府懶醒喎,點解唔係大陸打中國國藥,係都要打科興喎!吹到國藥天上有地下無,然後偏唔打,卻要打科興,搞到又死人又冇得去旅行喎!』

「冇嘢呀?科興衰衰哋都一堆海外數據,雖然臨床測試數據,都係達唔到國際期刊嘅要求,但係國藥盤數公開得仲少,然後測試真係佢自己講晒,然後連大陸自己都唔敢畀60歲或以上人士打,自己都認數據唔夠喎,咁都可以倒轉來講?」

「所以你話家下消息幾封閉,然後洗腦幾咁容易先得架!明明中國疫苗拎唔到國際認證,得唔到發達國家承認,然後班友可以倒轉來講,話咩中國人打中國疫苗好啲呀,仲有民賤聯嗰隻李慧琼子呀,仲在垃圾會大大聲,吹到話咩有市民驚打外國疫苗會水土不服,因此要打中國疫苗呀!」

『哎呀,唔怪得之其他國家打科興嘅,全部都「水土不服」,染病率繼續急升啦!你睇做科興測試嘅國家,例如巴西、土耳其,又或者用科興嘅國家,例如菲律賓、印尼、烏拉圭、智利,染病人數都繼續上升!一定係佢哋唔係中國人,所以打中國疫苗冇乜效,水土不服啦!』

「喂,人哋話中國人打外國疫苗水土不服咋喎,冇話外國人打中國疫苗會水土不服喎!」

『咁都得?即係你言下之意,外國人打中國疫苗就冇事,中國人打外國疫苗就有事,即係中國人比起外國人,特別容易水土不服?東亞病夫呀?你肯定?』

「咁你就問下李慧琼子啦!之但係點解打完科興都繼續升呢?點解呢?」

『人哋咪估,話病毒已經變種,而中國呢堆疫苗,無論係科興定係搞到巴基斯坦總統、總理、國防部長都中招嘅國藥,都無力應付變種病毒囉;事實呢,就係例如外國嗰堆疫苗,近排都不斷公佈數據,例如應付變種病毒時候,達到幾多嘅效果;之但係中國嗰堆疫苗呢,數據就唔夠,亦冇講過話對不同變種嘅效力,咁究竟有冇用呢?我就唔知啦!你知啦,你只係講數據,講事實,特區政府都可以話你抹黑佢,唱衰佢,然後叫醫管局出聲明,話譴責你啦!』

「你咪唱衰人呀,話人哋聲譽不好呀!聲譽好好呀!」

『係呢,科興聲譽咁好,做咩要叫特區政府搵世衛,要求外國承認科興呢?』

「啊!一定係外國歧視中國疫苗!」

『你問過李慧琼子未?人哋水土不服呀!』

「總之中國疫苗最好!」

『係呀!科興好!科興妙!打完科興死11個,全部都冇『直接關係』,所以唔使停,更唔可以屈佢『聲譽不好』!啊德國BioNTech包裝出小問題,累死人咩?有任何人嘅安全受影響咩?有直接關係咩?冇呀,但係外國貨就要小心啲呀!立即停個幾星期呀嘛!』

「咁冇得打復必泰,咪多啲人打科興囉!」

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多