• 柳應廷Jer《狂人日記》內容大膽壞過凱婷:花姐話簽咗個黐線佬返嚟

  • 發布日期:2021-04-01 15:30

 

《狂人日記》壞過凱婷

《狂人日記》壞過凱婷

最近有邊個壞得過凱婷?網民首選阿Jer柳應廷。因為佢喺新歌《狂人日記》MV中,唔只食煙,內容仲涵蓋吸毒、自殺、3P情節,難怪網民直指「MV好大膽」、「好癲好正」。

的確大膽!阿Jer上年憑「物語」系列,一舉奪得《新城》勁爆新人獎、《叱咤》生力軍金獎,以及《十大中文金曲》新人銅獎,照計應該食住個勢,承接上年三首大熱作品風格玩複製,但佢今年偏偏玩破格。

「其實今次呢首《狂人日記》,同上年物語系列真係好完全唔同嘅風格。上年物語系列真係一個比較暗黑嘅Jer,然後都係比較對內嘅Jer,係會有多啲唔開心。到今年嘅狂系,無論喺曲風上、構思、歌詞,其實都好想做到一個好瘋狂嘅效果,好想做一首狂想曲。其實以前聽Queen嘅時候,每一部分都好似聽到啲想追聽嘅內容,即使聽一首五分鐘、六分鐘嘅歌,都唔會覺得悶。而今次就好想做一首四不像嘅歌,即係大家聽落去會覺得好豐富,聽Queen嘅《Bohemian Rhapsody》嘅時候,都會覺得係好多嘢堆砌而成嘅一首歌。聽《狂人日記》時,我覺得其實廣東歌都好需要一首咁樣嘅神曲,所以做咗一首歌喺音樂類型上叫做Progressive Rock,另外可以俾大家見到喺物語系列之外,一個瘋狂嘅Jer。」

柳應廷新歌《狂人日記》MV中,唔只食煙,內容仲涵蓋吸毒、自殺、3P情節,真係壞過凱婷。
柳應廷新歌《狂人日記》MV中,唔只食煙,內容仲涵蓋吸毒、自殺、3P情節,真係壞過凱婷。
狂?做自己啫

狂?做自己啫

相當成功㗎!《狂人日記》MV首播至今唔夠一星期,聽眾同網民已經讚賞阿Jer為香港樂壇帶嚟咗好歐美、好唔一樣嘅曲風,仲話強烈感受到阿Jer嘅瘋狂,好似變咗第二個人咁。其實阿Jer認為,別人笑佢太瘋癲,佢笑他人看不穿啫。

「其實我骨子裡都係一個咁樣嘅人,大家見到文靜嘅我,其實只係好表面嘅我。可能大家見到我去到比較陌生嘅環境時,通常Jer都會係比較靜,或者喺團體中比較沉靜。但其實,私底下嘅我都係好瘋狂,當我玩緊某啲遊戲嘅時候,都係可以全情投入,大家都會話Jer玩得咁癲。」

換句話說,某程度上,阿Jer喺《狂人日記》做返自己。

「因為我好鍾意睇電影,做呢首歌嘅時候,就係諗緊想做一個狂人角色,當時用咩嘢代入呢?就係以Joker代入,以前都好鍾意睇呢類型小丑電影,曾經有一刻幻想,自己做小丑的話會係點呢?直至今次MV,我終於可以飾演小丑,知道小丑模式嘅我會係點樣,所以都玩得好開心,無論係拍MV、唱歌同代入方面,其實都真係完全做一樣自己曾經幻想做嘅嘢,但以前從來未試過做,唔知道係點樣,而今次終於試到。花姐讚我狂人呢個角色做得幾好,估我唔到,話唔知自己簽咗個咩嘢黐線佬返嚟。我覺得都係一個讚賞,因為黐線佬唔係咁多人可以做到。」
文靜,只係Jer的表面。他說:「私底下嘅我都係好瘋狂。」
文靜,只係Jer的表面。他說:「私底下嘅我都係好瘋狂。」
 Jer以Joker代入,連花姐都話唔知自己簽咗個咩嘢黐線佬返嚟。
Jer以Joker代入,連花姐都話唔知自己簽咗個咩嘢黐線佬返嚟。
勿買黃牛

勿買黃牛

MV確係狂,之但係LIVE呢?究竟會點樣現場演繹?樂迷都好期待,而據悉Jer將會喺MIRROR兩周年演唱會《MIRROR “ONE & ALL” LIVE 2021》現場演繹。可惜嘅係,一票難求,黃牛價更曾高見$8000。不過,阿Jer話寧願現場空蕩蕩無乜觀眾,都唔想fans破財益黃牛!

「多謝大家支持,我哋嘅演唱會門票好快就賣晒。今次演唱會我哋都真係會盡全力,俾大家睇到由《造星》開始,然後加入MIRROR,經過兩年半至差唔多三年洗禮後嘅進步,所以其實有好多fans都好想可以買到門票,入場見證呢個時刻,但千祈唔好買黃牛飛,因為實在係一個唔值得鼓勵嘅風氣,咁樣就唔會助長黃牛,而下次黃牛黨就唔會炒飛。」

唔知粉絲們又聽唔聽話呢?
 阿Jer話寧願演唱會現場空蕩蕩無乜觀眾,都唔想fans破財益黃牛!
阿Jer話寧願演唱會現場空蕩蕩無乜觀眾,都唔想fans破財益黃牛!

採訪、撰稿:ET

攝錄:余一樂

化妝:Ali wong@AnnieG. Chan Makeup Centre

髮型:Denny ku@Chic private I salon

服裝:Bally
----------------------------

壹週刊 31年 和你壹路同行

回顧《壹週刊》31年走過的路

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多