• 《一秒拳王》《不日成婚》︱ 時光倒流廿幾三十年︱吾港戲 (尹學仁)

  • 發布日期:2021-03-31 14:00
  • 《一秒拳王》《不日成婚》︱ 時光倒流廿幾三十年︱吾港戲 (尹學仁)

 

一個月前,講《狂舞派3》,曾經攞埋《一秒拳王》去比較,講到雖然個人 prefer 前者,個結局即使重申沉重現實,總好過後者流於廉價熱血;只不過亦一如所料,《狂舞派3》票房似乎未能夠超過 1000 萬,成績遠遜上集,而《一秒拳王》遲兩個星期上畫,票房即將破千萬大關,證明本地觀眾,始終情願自己呃自己。

其實《一秒拳王》,令我諗起 90 年代港產片,類似情況仲有三年前《逆流大叔》,最緊要簡單易明,橋可以舊,熱熱鬧鬧,節奏夠快,有笑料又有少少感動就可以。

老老實實,《一秒拳王》絕對有用心拍,演員搏命,動作設計同攝影都出色,其他技術層面例如美術服裝音樂都幾好,不過劇本認真差好遠,故事最大轉折位,竟然仲可以「因為爭執推個細路出馬路然後慈父衝出勇救被車撞到重傷失去超能力」,完全 80 年代 TVB 屎橋,然後主角人物設定又玩爛賭周身債而點解讀書工作都失敗又零解釋,最後個結局又玩明知輸都要打永不放棄最後雖敗猶榮之類,古今中外已經不知用過幾多次。

《一秒拳王》重映海報。
《一秒拳王》重映海報。
樂隊 Tonick 主音趙善恆今次自編自導自演,除編劇之外表現出色。
樂隊 Tonick 主音趙善恆今次自編自導自演,除編劇之外表現出色。
大馬女演員林明禎繼續花瓶,反而童星演出搶鏡。
大馬女演員林明禎繼續花瓶,反而童星演出搶鏡。
泰國男神演出不錯,同香港好戲之人袁富華有好多對手戲。
泰國男神演出不錯,同香港好戲之人袁富華有好多對手戲。


當《一秒拳王》去返 90 年代,其實未算過份;即將上畫仲有一部新港產片叫《不日成婚》,直頭帶你去返 80 年代。究竟 80 年代港產兩性愛情電影,有何特色?

1. 所有男人都食煙爛滾(個 term 都好過時)

2. 所有女人都想生仔

3. 所有場口都周末發生

4. 所有主角都毋須返工不過物質生活豐盛

5. 去澳門賭錢仲會去葡京

其實比起廿幾三十年前,香港社會變化好大,經濟已經不再遍地黃金,煙民人數下跌好多,大把女人拒絕結婚生仔,大家返工時間好長。

就算撇開政治環境隻字不提,今時今日拍港產片,仲拍香港 80 年代生活認真離地,不過編劇兼導演聽聞正正師承過氣喜劇導演,而長年行內生活,同今日香港市民生活完全脫節,其實好正常。

外界不少評論覺得部戲好多笑位,抵睇,其實全部誇張堆砌,甚至有人話似當年《風塵三俠》(90年代電影),如果最後票房大賣,同《一秒拳王》一樣,尹某只能夠講:「有咩觀眾就有咩電影,有咩市民就有咩城市,條路自己揀,仆街唔好喊」。

坦白講,《不日成婚》有值得一讚部門,包括美術指導(不包括服裝指導,個別造型實在古怪,例如朱柏康條頸巾)以及視覺特效:前者令到個零生活感劇本,變成有返生活感,大量小道具以及家居陳設,好明顯好花時間做(雖然陳家樂繼《死因無可疑》之後,「再住」同一間屋/個景,而兩部同屬英皇電影,認真環保),不過非常有效果;後者即使發揮不多,至少令部戲有返時代感。

三十幾年前香港觀眾連網都未有得上,今時今日年青香港觀眾一出世已經有手機有電腦,品味會一樣?我放長雙眼睇。
《不日成婚》六個主角只有陳家樂到臨尾先俾觀眾知道,其實任職攝影師。
《不日成婚》六個主角只有陳家樂到臨尾先俾觀眾知道,其實任職攝影師。
為幫姊妹犧牲色相同朋友上床甚至講明「任你點玩」,《不日成婚》情節接近鬧劇 level。
為幫姊妹犧牲色相同朋友上床甚至講明「任你點玩」,《不日成婚》情節接近鬧劇 level。
衛詩雅部部戲都演出落力,不過造型部部戲都一樣。
衛詩雅部部戲都演出落力,不過造型部部戲都一樣。
基本上《不日成婚》全片就只有不停堆砌處境笑話。
基本上《不日成婚》全片就只有不停堆砌處境笑話。
《不日成婚》朱柏康(左)角色究竟做咩職業?住到一間海景豪宅大到可以玩捉迷藏,而老婆談善言會搵唔到?
《不日成婚》朱柏康(左)角色究竟做咩職業?住到一間海景豪宅大到可以玩捉迷藏,而老婆談善言會搵唔到?

作者簡介

行內人會視為行外人,行外人又會視為行內人。做過電影主創,又做過電影媒體,仲做埋電影教育。未天真到相信電影永恆,亦未灰心到認為香港電影玩完。不過一句到尾,身為電影觀眾,曾經叫做電影學生同畢業生,與其要做電影人,倒不如先透過電影學做人,首先要做個好人。
----------------------------

壹週刊 31年 和你壹路同行

回顧《壹週刊》31年走過的路

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多