• 壹週和你股|基金爆煲仲有少少手尾|譚朗蔚

  • 發布日期:2021-03-29 14:34
  • 壹週和你股|基金爆煲仲有少少手尾|譚朗蔚

 

週末期間,市場的焦點落在Archegos Capital爆煲,觸發多隻科技相關的持倉被迫拋售,其中包括百度(BIDU)和騰訊音樂(TME)等等。看完有關的報導之後,我的第一個反應是:哦,唔怪得知啦!原來上星期四晚美市,好多隻中概的科技股都反彈,惟獨是百度持續大插,插多14%係因為咁!老實說,我聽完鬆一口氣,起碼不是因為公司的營運本身有問題,只是個別的投資者有問題,同股份的基本面無關。係咁,應該好快跌完,因為有人沽自然有人接,無需恐慌。

而接的人原來又係你哋契媽!拿,「媽」呢個字情深似海,要有養育之恩先叫得的。我同佢非親非故,都係叫返佢Cathie Wood算。但聽聞事件仲未有咁快完:市傳Archegos還有220至300億貨要沽,當中包括4500萬股ViacomCBS(VIAC),仲有無其他就唔知喇。另外日資大行Nomura都好似响事件中跌20億美金,上晝响日本果邊跌緊10%。到底事件會唔會引發金融海嘯?我諗就唔會喇,聯儲局鮑威爾起身牙都未刷就可以開printer引幾萬億出來啦,有咩好驚?

不過,事件始終可能拖累百度(9888)等股份在短線的表現,加上美團(3690)在上星期五公布的業績差到嘔,唔多唔少拉住恒生科指的後腿的,持有ETF的粉絲們要忍耐喇。今日我貪心想講多隻恒大汽車(708),事關佢陰公豬俾阿爺點名鬧,今早最多跌12%,依家跌幅收窄。其實間野一隻車門都未整到就也文也武係抵鬧的,但大家應該唔洗擔心佢會跌。任何股份跌都是由於有人沽的,這隻股的貨源在哪裡?佢哋會唔會沽?唔會的話,跌到落橫行區50蚊已經頂盡。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多