• 800萬買維港匯| 炒家「摸魚」嫌「錢太多」套股換樓鎖利潤:股票係泡沫

  • 發布日期:2021-03-27 07:00

 

恒指今年年初突破三萬一千點,其後失守,今個星期更一度跌穿二萬八千點重要支持,假如高位沒有套現獲利,投資者在牛市面前尤如南柯一夢。由護士轉做全職投資者十多年、綽號「摸魚」的34歲全職炒股人黃敬凱(Terence),多次經歷泡沫之後,深明股票場上帶給他的是只是快錢,買樓才令他心裡踏實。

近期新盤、「長沙灣地王」維港匯公開發售首日,身穿大紅Hoodie、Balenciaga cap帽的「摸魚」,付七成首期,購入約八百萬元維港匯一房單位。他並非完全看好樓市,他笑道:「 錢太多得滯,無話睇唔睇好。」Terence再解畫,「好多人會覺得我嗰句『錢太多』好串,事實上我真係形容返市場不斷咁印銀紙,量化寬鬆,大家都錢太多,唔淨只係我。一月二月份股市暢旺,其實好多人好似我咁贏咗一舊錢,但又唔想將佢全部投入股票市場,所以我就定義為錢太多,要搵其他嘢買下。」

「股票真係好虛無嘅嘢,我係一個全職炒股票嘅人,我都會咁樣講,我唔會話全倉100%叫人買股票,去信奉股票呢樣嘢。」全職炒股的Terence,在牛市轉弱之際,換馬由股轉樓。

去年股海賺千六萬元

去年股海賺千六萬元


去年Terence食正中概股、科技股升浪,美股及港股均有斬獲,「大約買到兩間維港匯full pay一房。」小米股價於去年三、四月見底,他從小米八、九元開始儲貨,並一直加注,26元水平開始套現獲利,現有持貨帳面賺三、四百萬港元。他持美股中最主要的Tesla及蔚來,大部份亦已沽出,賺大概400萬港元。他認為「係時候買啲自己鍾意嘅嘢」,所以今年一月買了珠海樓盤送給父親;接著他於本月再買入維港匯一房單位,實用面積319呎,連釐印費共約八百萬元。

他2017年開始置業,以660萬元購入匯璽一房360呎單位,當時同樣是因為股票市場贏錢,剛好翌年即2018年,恆指達33,000點後開始出現小型股災,及時在小股災前股轉樓,Terence形容自己「好彩」。而今次買樓,又出現類似情況,今年年初恒指升上三萬點,他在大概31,000點時沽了部分股票,將部分資產鎖定在樓市上。現時他在香港及海外共有四個物業,佔他三分一資產,至於股票則佔三分一至一半。

「全球狂印銀紙,銀紙大幅貶值,令到所有資產泡沫不斷膨脹,資產泡沫包括股票、Bitcoin、手錶、手袋係短時間內升值好多,再繼而將呢啲資產泡沫,部份換咗落去物業嗰度。」他認為樓才是眾多資產泡沫中保本的資產,「買樓唔係好跑得贏其他資產泡沫。但當你其他資產泡沫升得咁急咁多嘅時候,自己會想求一個安穩,再唔係全部亦都唔係一半,將部份資金換左去物業嗰度。」

買樓如抽IPO

買樓如抽IPO


Terence形容買新盤猶如抽熱門IPO,「早排啲人抽快手咁樣,抽中IPO,IPO 價百幾蚊,但係到你第二輪咁樣好似暗盤,暗盤已經升到二百幾蚊,第三輪可能是開市之後,再創新高,升到四百幾蚊。」三年前他入飛抽中匯璽第一期第一輪的88號籌,即時扑錘買入一個單位,「第二輪已經即刻加價。」今次購入的維港匯一房單位,他同樣在第一期第一輪抽中較前籌數,相信到第二輪或第二、三期時,會再加價。

「發展商會加價,當然有啲亦會減價,譬如白石角新樓盤越買越平,點解會有咁嘅情況呢?原因係白石角嘅地皮平。」他認為地產商在第一期之後會否加價,關鍵是本身的地皮價,「以維港匯為例,佢係信置同會德豐牽頭,買返嚟嘅時候地皮麵粉價一萬七千幾蚊,加埋建築成本,分分鐘去到兩萬六、兩萬七,而家呢啲價錢賣返出嚟,基本上冇乜水位,所以我都幾睇好佢之後第二期或者第三期會一路加價上去賣,因為第一期好多時候做明星效應。」

若抽不中新樓盤「IPO價」,變相值搏率變低,「柏傲莊我都好鍾意,不過第一期抽唔中,第二期抽得中後,第三輪先比我抽到好前,但係我對比較第三輪買同第一輪買,同樣嘅單位,我已經要畀多20%,可能講緊百幾二百萬,點買得落手啫?」

由炒「細價股」到炒「細價樓」
由炒「細價股」到炒「細價樓」

Terence同意移民潮令去年樓市升幅少的原因,但對細單位影響少,「移民得嘅人多數係中產或者以上,佢哋住得嘅都係800呎、三房或者更大的四房單位,甚少係住細單位的新婚夫婦移民,佢哋仲喺香港打工供緊樓,好難話陣間賣斷晒啲嘢就去移民,所以我target返細價樓。」

相反,他警告買過千萬元的樓就要小心,「真係做咗一個移民嘅單位,嗰啲所謂地產界話扑傻瓜,因為佢趕住走急着走,可能劈價百幾、二百萬咁,就變相佢會拉低咗大單位嘅成交樓價,做咗個幾差嘅成交出嚟。」

炒細價股出身的他,眼見兩年「林鄭Plan」放寬按揭,最高九成按揭,由樓價上限400萬元增至800萬元;最高八成按揭,由樓價上限600萬元增至1,000萬元,利好細單位樓價升幅,他開始炒細價樓。他相信現時花近800萬元買入的維港匯單位,有兩成水位升幅。開售後,會德豐發風聲指料將再加推多2成單位,並提價5至10%。

他喜歡買一手樓,貪有時間「K.O.」印花稅,「買一手樓嘅好處係,當你買完之後到你收樓嗰日,已經係兩年後嘅事,你收到樓再拎收樓紙之後,一年內將你本身嗰間賣返出去,都唔需要俾額外15%印花稅。變相我有三年時間我去考慮,將唔將原本嗰間賣咗佢呢?」換言之,買一手樓由簽約到收樓的三年期間內,若樓價升幅吸引,可考慮賣走首置的單位,避免支付第二層樓的印花稅。相反,買二手樓的考慮時間較短,「基本上你簽完臨時買賣合約之後,一年內你要將舊嗰間賣咗,如果唔係,你新嗰間就要畀15%印花稅。」

揸樓比揸股更實在
揸樓比揸股更實在

Terence在訪問中不時強調,股票及Bitcoin等資產已是泡沫化,「而家炒股票都係炒緊一啲資產泡沫,到最終就係用資產泡沫嘅上升,即係Bitcoin 又好,股票又好,要令你短時間內獲得好多錢。就好似之前契媽ARKK女股神咁樣,點石成金,平安平安好醫生單日升三成,或者買移卡咁樣兩個月升兩倍幾。呢啲就係泡沫,你唔會講緊呢間公司好有生意或者業績,全部唔係睇呢啲嘢。基本上呢啲資產泡沫,全部都有機會爆破。」

「但係即使佢係泡沫,我哋唔可以冇呢啲泡沫,因為無揸住資產泡沫嘅時候,全部揸住硬嘅資產,例如樓、黃金嘅時候,當佢真係再升上去嘅時候,你完全享受唔到嘅時候就好慘,好難追到通脹、樓價。」要在何時股轉樓,他直指兩、三百萬元也不夠,因為兩、三百萬元首期,再供樓時頗為吃力,隨時變成「樓奴」,「我會建議如果你已經有層樓,多咗兩、三百萬出嚟,一定係買股票或者甚至係買Bitcoin我哋,比較投機性少少、博少少嘅嘢。」

他睇好追落後的舊經濟股,「而家嘅氣氛因為嗰啲科技股其實好殘,美團其實跌咗好多落嚟,高位跌咗幾成,科技股我自己唔係好睇好。所以小米我剩返嗰啲貨仔我慢慢走,或者搵一個靚啲嘅價位走,但係而家資金開始由科技股轉去傳統舊經濟股板塊,傳統舊經濟股板塊上我自己比較睇好物流,同埋最近好強勢嘅物管股。」

既然股市是泡沫,就不會持久,隨時「一篤就爆」,甚至化為烏有,惟何時爆破,他指誰也說不準,「所以我哋應該一路喺大牛市入面享受資產泡沫,同時間一路將部份嘅泡沫賺到嘅錢,換自己鍾意嘅嘢。」

他不認為物業有「泡沫」或大跌跡象,寧可在股市中止賺離場「嘆下世界先」,「二千幾蚊一個月管理費,圍起一年都是兩、三萬蚊,同埋呢個單位我唔會自住,我會租出去。因為我第一批買,我即刻收樓,我就可以即刻享用佢會所嘅facilities。出面買過酒店會籍都要幾萬蚊一年,但係我而家落樓下行過去幾分鐘,已經可以享用晒頭先所講我最有需要嘅設施,游水我鍾意呀!」說到底,始終磚頭最實在,「樓最多跌五成好誇張,但你仲用到,你自己用又得,會所你可以book設施,你租畀人又得,永遠實實在在嗰樣都係你嘅嘢。」



撰文:邱嘉幸

攝錄:王命源、林金展
----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多