新上畫港產片有限，所以今期再講講本地收費網台《喱騷》，因為過去一個月，繼《黃秋生大師班》之後，終於再有新節目上架，包括《社會服務令》以及《尋找他媽的故事》，絕對值得支持，絕對值得講講。
先講《社會服務令》，條橋其實好簡單，叫藝人去返工，而且要辛苦工，某程度上厭惡性工作，要超越藝人可以承受之底線，逼藝人露出真面目甚至崩潰邊緣，同大部份真人騷運作原理其實一樣：要主角真情流露，有幾戲劇性得幾戲劇性，一一呈現觀眾眼前，真假反而不過其次。
由於屬於《喱騷》節目，《社會服務令》仲有更深一個層次：藝人所到職場，肯定全部屬於黃店，符合《喱騷》訂戶口味。
睇完頭兩集，有老闆娘田蕊妮去燒臘飯店做打雜，有男神王宗堯去殯儀衣紙舖返工，informative wise，其實成功令觀眾對兩個行業有更深認識，基本上好睇過癮。不過有幾好睇有幾過癮，好視乎藝人主持個人功駕魅力，以頭兩集睇，田蕊妮其實完勝王宗堯。
當然，如果認真去評（觀眾未必識睇，不過理論上學術上值得討論），《社會服務令》最大問題在於，究竟邊個先算主角？以類型計，主角應該藝人；不過實際效果，其實老闆比藝人更加似主角，老闆好睇，節目就好睇，藝人主持反而淪為配角。例如第一集，老闆比田蕊妮更精彩，金句包括「鳩噏多過呼吸」，而高潮位正正老闆講自己不一樣過去，大佬，高潮位其實應該睇田蕊妮，做份工做到崩潰，點解會本末倒置？
同《社會服務令》相比，《尋找他媽的故事》結構好清晰，主角杜生，節目因為杜生（移民台灣）而生，一切以杜生為中心，用行內編劇術語，杜生做上把位（港產片通常由杜生做下把位），旅居台灣之香港年青音樂全才李拾壹做下把位，不停服侍杜生然後又被杜生擺明鬧或者暗恥笑，睇過三四集之後，有台灣讀書港女 AV（藝名，非行業）加入做第三主持，效果更加好，因為 AV 可以代表正常人角度，將節目拉返正軌，令節目保持一定知性以至資訊性。
事實上，節目裡面，杜汶澤基本上完全不受控制，不停爆粗口（田蕊妮在《社會服務令》亦經常爆粗），講「黃色」笑話，包括咸濕笑話以及政治笑話，例如去參觀光復新村，入去之前就不停同李拾壹講「光復新村 時代廣場」。雖然好笑，不過有時都覺得太多，而且重覆。
- 他媽的已經講得好斯文。
- 部份笑料流於無聊例如要揸 GT-R。
- 另一主持李拾壹（左）表現不錯。
- 節目好多港人特別嘉賓。
杜生亳無疑問屬於演藝界以至正常社會不可多得人材，不過今日香港已經容不下。諗返當年九十年代初，《表姐你好嘢》可以上戲院，今日仲可以？
- 田蕊妮發揮遠比在傳統電視台多。
- 點可以冇黃秋生。
行內人會視為行外人，行外人又會視為行內人。做過電影主創，又做過電影媒體，仲做埋電影教育。未天真到相信電影永恆，亦未灰心到認為香港電影玩完。不過一句到尾，身為電影觀眾，曾經叫做電影學生同畢業生，與其要做電影人，倒不如先透過電影學做人，首先要做個好人。
壹週刊 31年 和你壹路同行
回顧《壹週刊》31年走過的路
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
