• 壹週和你股|驚條毛咩!揸你就揸啦!|譚朗蔚

  • 發布日期:2021-03-15 15:46
  • 壹週和你股|驚條毛咩!揸你就揸啦!|譚朗蔚

 

今日開始,我大仔考試。一連幾日,我下晝都會請假陪佢溫習。其實唔係好關你哋事㗎,不過同仔溫習難免會發老脾,加上見到不少人揸股揸到好似揸計時炸彈咁,自自然然就想搵人嚟鬧下!

上星期,我推介大家撈恒生科技指數的ETF(7226),是正向兩倍的工具來。換言之,指數每升1%佢升2%,指數跌1%佢跌2%。上個星期五,港股在尾市受累美債的孳息急升而下滑,恒指跌500,科指都要跌,然後所有人人心惶惶,慌忙問係咪要走!科指8400點破位都未失呀!走條毛咩走!人人以為債息重上1.60厘就是世界末日,結果,美股納指在當晚低開高走。

今日飯後,恒指又跌過百,不過在執筆之時又忽然倒升。我唔係話要教大家time個市,邊分鐘升,邊分鐘跌,我鬼知呀?我只是想大家知道你這一分鐘走了,下一分鐘就入唔返!科技股從高位都跌了咁多喇,你自己高位追的你又唔識驚㗎喎!咁低撈的又驚到死,你話有沒有天理?這個世界,識撈底的人多的是,但係在低位揸兩日就走的就更多。真係揸到大浪又有幾何?

順帶一提,小米(1810)獲美國法院解除禁令,股份的基本面有望改善,這個因素遠遠可信過上日回購的消息。假如今日企穩24.75開市價的話睇27,是科指的新動力。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多