• 《造星III》葉巧琳追夢7年靠家人撐 冇工開匿埋一年打機度日:我係一隻龜要慢慢行

  • 發布日期:2021-03-13 12:00
  • 《造星III》葉巧琳追夢7年靠家人撐 冇工開匿埋一年打機度日:我係一隻龜要慢慢行

 


出道近10年的葉巧琳(Mischa),曾是組合「樂遊團」(Trekkerz)主音,15年作個人發展,可惜歌曲推出後迴響不大,在樂壇浮浮沉沉。這幾年來,未能供養父母之餘,甚至要靠家人及男朋友支持。而她沒工作時寧願「宅」在家中,曾經一整年終日沉迷「打機」,去年在公司鼓勵下參加《全民造星III》,終於人氣急升,新歌《浸浴》更成為熱播歌,她說:「我係一隻龜,要慢慢行。」



Mischa曾感觸落淚形容自己「七年來半紅不黑」,去年初更想過放棄,最近在電台受訪,她坦言:「因為當時已經半年冇工作,會諗呢條路係咪應該該走落去?從來冇一首歌紅過爆過,或者有人唱K唱過《神把眼淚留給了人》、《殘渣》等作品,但邊個係葉巧琳?我相信你喺街上問10個人,10個都唔會知!」



父親是建築師,家境不俗,在演藝學院出身的Mischa,12年以「葉冷」之名開始追夢,與兩名演藝同學組成「樂遊團」,她則擔任主音。三名樂壇新丁,參加音樂比賽即奪得冠軍,旋即獲公司簽約,前景看來美好,但音樂路有如人生路,充滿起伏,Mischa初嚐勝果味道後,幸運之神卻中途離場,兩年後組合更拆夥,Mischa形容:「三個都唔係好進取嘅人,懶懶閒,同埋當中無一把可以突顯Trekkerz嘅聲音,當時走小清新路線,但自問我哋三個都唔係小清新,定位有小小尷尬,所以唔係好成功。」

單拖成績未如理想

單拖成績未如理想


一個人在音樂路上奔走,Mischa未有因此而跑得特別快,17年她推出第一首個人單曲《孤單的貝多芬》,外間反應冷淡,她說:「自己都有少少失望,會覺得點解嗰首歌唔成功呢?係因為咩嘢因素呢?」

Mischa沒有抱怨,依舊抱著樂觀心態:「自己都知道唔係行出嚟,就好有人緣、觀眾緣,唔會好似Zeno(顧定軒)咁樣,你會好想愛護佢嘅嗰一種類型,我係比較硬朗少少,所以都需要時間讓其他人慢慢睇清楚我做緊嘅工作。我覺得無辦法,都係機遇問題,但自己都有寫歌,有幾首歌自己都好鍾意,然後會覺得無所謂啦,能夠擁有呢啲咁好嘅作品,自己已經好開心,係一種自我滿足。」



Mischa以「難行」形容當時處境,但靠著對音樂的熱情,唯有見一步行一步。

「當時真係只可以見步行步,同埋自己覺得迷茫之處係,唱歌方面唔係好識得調節,唔識得將自己嘅曲風定位,因此而覺得迷茫。」

她直言自己似烏龜:「我唔想話捱過去,因為本身好享受,每一首歌我都好享受,整個過程我都好喜歡,因為每次做一首歌,可以認識更多自己嘅聲音同埋自我。可能我係一隻龜,好似龜兔賽跑,條路要慢慢行落去,不停增值自己。」
12年Mischa與兩名演藝學院同學,組成「樂遊團」,甫參加比賽即贏得冠軍。
12年Mischa與兩名演藝學院同學,組成「樂遊團」,甫參加比賽即贏得冠軍。
樂隊拆夥後,Miscah推出個人歌曲,但反應冷淡。
樂隊拆夥後,Miscah推出個人歌曲,但反應冷淡。
一度迷失的Mischa,自爆曾整年匿在家打機。
一度迷失的Mischa,自爆曾整年匿在家打機。
擔心50強不入

擔心50強不入


慢條斯理的「烏龜」,終於「爬到」《造星III》的舞台,但原來並非Mischa當初所想,她說:「我無諗過公司會想我參加,同埋當時唔知道比賽唔係素人參加,所以當我知道有朋友參加嘅時候,都會拍手叫佢哋加油,當刻都係無諗過。」或許是受到「往績」所累,Mischa參賽初期,坦言擔心連50強也不入:「從來都唔覺得有好多目光會注視自己,無人會留意我嘅新聞。但參加今次比賽,就會有好多人注意到。當佢哋注意到嘅時候,我唔知道大家會點樣諗我,亦會擔心連50強都入唔到,或者自己表現好差。」



唔夠character唔interesting

最終,愈戰愈勇的Mischa更殺入最後10強,在眾多評判中,她坦言Terry(徐浩)的評語,令她最「入肉」,她說:「之前同佢合作過好多次,佢都有同我講過,覺得我character唔夠特別,我最記得佢話我個人唔interesting,嗰個係最入肉。但自己會反思,點解入行咁耐,觀眾都唔係好留意到我。反而經過今次比賽,先至見到interesting嘅一面。到底之前發生咩事呢?因為以前做嘅所有嘢都唔係一個真人騷,好多時唱完歌就會落台,或者自己好少做網上直播,同其他人傾偈,所以嗰個批評係比較入肉。」
熱愛歌劇的Mischa,在《造星》中不時大騷其歌藝。
熱愛歌劇的Mischa,在《造星》中不時大騷其歌藝。
Mischa自言當初曾擔心50強不入,到比賽段期,在演出上更有不同轉變。
Mischa自言當初曾擔心50強不入,到比賽段期,在演出上更有不同轉變。
徐榮的評語,最令Mischa入心。
徐榮的評語,最令Mischa入心。
夢想開演唱會
夢想開演唱會

經過《造星III》的試煉,Mischa未敢自誇已經變得「interesting」,但對於未來,卻看得更遠一點,她說:「我清楚自己將來會係多元化嘅,咩嘢都可以做得到。可能有啲人就會覺得我貪心,都係無定位。但我嘅定位就係想咁樣,想每一次、每一首歌推出嘅時候,可以好似《造星》每個回合咁樣,每一次都可以帶出驚喜。」



有人認為「樂壇已死」,Mischa卻以「revolution」來形容現今樂壇:「我覺得近幾年開始有少少改革,以前會覺得係餵畀聽眾食,無咩選擇。但而家網絡發達、媒體發達,令我哋唔需要只係靠一種渠道去接收歌曲,唔需要你餵我。」

開始拾回自信的Mischa,更夢想開演唱。

「當然啦,可以擁有自己嘅演唱會喎。點解決賽當晚要唱自己歌,就係將比賽當成自己嘅演唱會。」

由「烏龜」蛻變成懂得主動爭取,《造星III》帶給Mischa不僅是一個比賽體驗,更是人生其中一個篇章,為她揭開全新的一頁。



攝影:Nicky Lai

造型:Alan Ng

化妝:Cyrus Lee

髮型:Milk Chan @ Xenter

服裝:Ngle.clothing
擁有一雙長腿的Mischa,自嘲自己是事業是「烏龜」,要慢慢行。
擁有一雙長腿的Mischa,自嘲自己是事業是「烏龜」,要慢慢行。
 新歌《浸浴》唱得街知巷聞,不再是「無人知」。
新歌《浸浴》唱得街知巷聞,不再是「無人知」。
----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多