• 禁忌之林|今鋪連藍絲也移民|林忌

  • 發布日期:2021-03-12 12:30
  • 禁忌之林|今鋪連藍絲也移民|林忌

 

「要毁滅一個大城市,不一定是天災,也可以是人禍,人禍不一定是戰爭,幾個人的幾句話,幾個人的愚昧無知的行動,可以令大城市徹底死亡。不必摧毁大城市的建築物,不必殺害大城市的任何一個居民,甚至在表面上看來,這個大城市和以前一樣,但只要令城市原來的優點消失,就可以令它毁滅死亡。」這段說話,倪匡寫於1983年的《追龍》。

「烏龜背蠍子過河,最初相安無事,和平共處,可是,不一會,烏龜尾部突然感到一陣劇痛,接著昏頭轉向,知道被蠍子螫了一下,已中劇毒,生命危在旦夕,但牠不明白蠍子為何不顧本身安危,因為牠們正處河心急流,龜死蠍亡,對誰都沒有好處,於是牠要從蠍子口中知道真相,不然死不瞑目,那知毒蠍的回答出人意外,牠說:「龜兄龜兄,難道我不知螫你一下我們就會一同葬身河底嗎?可是,這是我們蠍子的習慣,要改亦改不來啊!」林行止這一段《烏龜背蠍子過河的教訓》,寫於1984年。

兩位前輩嘅文字,早喺40年前,就已經清楚預言香港今日嘅命運;倪匡嗰段,正有如今日有啲人認為,可以「完善」香港嘅制度,表面上維持「特區」嘅名義;但當內涵完全唔一樣!幾個人嘅幾句話,幾個人愚昧無知嘅行動,令香港原來嘅優點,包括自由、人權、法治,甚至有限嘅民主都消失時,咁香港除了死亡毀滅,仲剩下了乜嘢呢?

面對中美貿易戰,世界各國與中國爭議不斷時,香港作為兩者之間嘅中間人,原本可以相安無事,喺中美之間維持和平共處,甚至成為雙方維持關係嘅窗口;之但係2019年發生咩事呢?點解偏要喺貿易戰之際,搞《送中條例》?點解明知不斷收緊香港嘅政策,會帶來更多嘅國際反彈以至制裁,都堅持要到做底呢?有人認為蠍子唔怕死,有人因而倒果為因,認為證明蠍子必勝,卻冇諗過一個最簡單嘅可能性──因為佢控制唔到自己,即使唇亡齒亡,也都要把事情做到最盡。充衰咗啦,就要對外國嘅反制暴跳如雷,不斷四處抗議到底。呢一幕,豈不是就同過河嘅蠍子一樣,令大家完全無言以對嗎?

當香港市民認為選議會無用,選委會全部都是親中親共嘅人時,北京卻認然覺得非常不安,要完全改變香港嘅制度;這不但說明了,北京表面上信心十足,實際上卻極度缺乏自信,比起香港任何一個人,都要高估35+ 贏取立法會半數嘅可能性;在商界大量掌握功能組別嘅情況下,卻仍要大量加入選委會選出嘅議員,不惜廢除廿幾年來「循序漸進」嘅承諾與論述,點解呢?

我哋覺得商界班友係軟腳蟹,諗唔到以往只係 FF 幻想嘅「地產黨」vs「共產黨」,共產黨居然當成真!北京真係連地產黨都信唔過,連功能組別都唔信,要搞到復辟等同委任嘅選委會!真心,你覺得班商界唔震?以前就扮撐政府拎著數,有事就叫泛民撐住,好啦,家下最驚你估係邊個?當香港進一步收緊嘅時候,你估係冇乜錢嘅大家,定係等驚人搶錢嘅地產佬呢?

至於保皇黨唔單止畀人叫「忠誠的廢物」,就連選舉都廢時,咁嗰班尸位素餐,開工等收工嘅人渣,以後靠咩開飯呢?以前就靠篤民主派灰,抄橋,再扮下成功爭取,以後呢?北京直接指定嘅人,將會完全取代佢哋;選舉?真心你信仲有幾多次嘅選舉?又或者當派隻狗都會贏選舉,佢仲需要人嗎?派自己隻狗都贏時,仲需要香港呢班廢物嗎?

所以從此以後,搞移民嗰班你估係得黃絲?隨時一堆藍絲都身體最誠實,帶頭走夾唔唞;當然,總有班真心膠,家下仲爭住打科興嗰班人,但係甩底嗰班呢?又或者從來都只得把口愛國嗰班呢?你覺得佢哋真係唔驚?

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多