今個星期，戲院重開邁向一個月，好多電影原本安排 12 月上畫，3 月仲有得睇其實好難得，當中尹某特別想推薦大家睇另一部台灣電影《無聲》，今屆金馬獎第三大贏家，奪得最佳新演員（擊敗香港電影《幻愛》）以及最佳音效設計。現只得兩間戲院放映《無聲》，一日兩場，抓緊最後機會入戲院欣賞。
其實《無聲》根本贏硬最佳音效設計，亦特別提醒大家，部戲要入戲院睇，因為音效設計確實非常好，皆因《無聲》部戲，背景為聾人學校，即使撇開性侵主題，部戲前段要建立聾人世界，令聽覺正常觀眾入戲，已經玩盡音響設計。
觀眾甚至業內人士慣性重視影像，忽視聲音，其實電影電視作為媒介，一向都聲畫合一，缺一不可。
大家要留意，我講音響設計，英文叫 sound design，而非講配樂，配樂可以列為音響設計一部份，不過音響設計其實比配樂更加大，點樣呈現聾人世界而又令到正常人都明呢？講易行難。
最簡單，一般正常人會以為聾人世界好寧靜；大家不妨去返中學，聲音其實來自聲波震動，聾人聽覺有問題，不過觸覺正常，甚至比常人更加敏感，所以當男主角第一次發現女主角被同學集體性侵，難以接受，返屋企反鎖自己入房，《無聲》音響設計就非常出色（細節自己入場聽），既強調低頻震動，對成年常人又有喻意。
事實上，刻意去問聾人朋友點睇《無聲》 ，全部反應正面，事實上正如電影描述，日常生活失去聽覺其實可以好危險，因為你往往未能察覺問題已經殺到埋身，而身邊正常人又以為你會聽到避開……
故事主題其實講校園性侵，類似電影亦已經有南韓版本，只不過聾人不能言語，長期被正常人忽視，令受害人更加投訴無門，而當未成年聾人對成年正常人失去信任，有心人要揭露真相就更加難。
- 女主角陳妍霏奪金馬獎最佳新演員
- 南韓藉男配角表現突出
- 男主角相對下略為失色
為求戲劇或者視覺效果而放棄邏輯，可惜；就當我吹毛求疵， 一啖砂糖一啖屎。
- 人氣大熱台灣男星劉冠廷亦有參演
- 香港演員太保飾演女主角爺爺
行內人會視為行外人，行外人又會視為行內人。做過電影主創，又做過電影媒體，仲做埋電影教育。未天真到相信電影永恆，亦未灰心到認為香港電影玩完。不過一句到尾，身為電影觀眾，曾經叫做電影學生同畢業生，與其要做電影人，倒不如先透過電影學做人，首先要做個好人。
和你壹起撐住香港主題海報 全港良心商戶免費派發
了解更多
----------------------------
和你壹起撐徽章 良心商店及網店有售
了解更多
-----------------------------
守住新聞自由 和你撐壹週刊計劃 每月港幣$300起
按此了解更多
