• 禁忌之林|打疫苗死?唔怕!要信政府!(林忌)

  • 發布日期:2021-03-05 13:45
    最後更新日期
    :2021-03-05 14:00
  • 禁忌之林|打疫苗死?唔怕!要信政府!(林忌)

 

「大陸嘢好吖嘛,而家全世界都係大陸嘢好㗎喇……梗係唔擔心啦!咁多人打咗,咁多人都死到你自己,咁就抵死啦!」

『嘩?咁都講得出口呀?收咗幾錢呀?阿叔你食錯藥,定係收咗好多維穩費,咁肉麻你都講得出口?』

「中國人!梗係打中國疫苗啦!我只係信中國疫苗咋!其他國家疫苗,點信得過呀?容乜易佢地勾結外國勢力,影響國家安全呀?」

『你冇嘢呀阿叔?話時話,你有冇咩暗病….啊唔係,長期病患呀,好似嗰個63歲阿伯咁唔好彩時,就無謂啦!』

「放心!我又冇糖尿病,係食下煙仔咋嘛,71歲譚耀宗都打得,我冇理由唔打得啩?何況有咩問題,我有國家養!國家會關照我,有成10億的賠償基金呀!你有冇睇新聞㗎?」

『新聞?有呀,衞生防護中心總監林文健咪大大聲講,市民打針前應知風險呀,你知唔知風險呀?你問咗醫生未呀?有冇高血壓呀?一日食幾多枝煙仔呀?一陣話你自己責任,冇得賠喎!』

「問咁多做乜?大陸都唔使問啦,你問來都多餘嘅,國家叫你打,就打啦,學大陸做到足未冇問題囉,使乜要搞到咁複雜?」

『你覺得跟足大陸就得係咪?』

「梗係啦,中國人飛上太空,又派太空船登陸月球,唔信國家?學前特首講法,唔通信班反中亂港嘅外國傀儡咩?」

『係呢,北京到而家,都唔畀59歲以上人士打疫苗,仲講明高血壓都唔得呀;死咗嗰個,最初畀人一直話「嚴重疾病」,仲講多句「打唔打針都死」;但醫院出來指出,死者血壓控制一向穩定,病情係急轉直下喎,然後又改口,話「未能百分百排除事件與接種疫苗,冇非直接關係」,你信特區政府,定北京政府呀?』

「吓?北京唔畀59歲以上打?咁點解香港畀?」

『你問林鄭囉!點解「大家都係中國疫苗」,偏偏北京唔打得,香港卻打得呢?』

「喂,等等先,好似大陸係打國藥,唔係打科興喎,你唔好誤導我先得㗎?」

『咁我問返你啦,既然科興就打得60歲以上,國藥就唔打得,咁係咪科興可靠啲先?』

「咁又係呀,一隻打得60歲以上,咁應該可靠啲啦!」

『既然科興咁可靠,有乜理由中國自己唔打,要打國藥先?唔通大陸政府畀次貨畀中國人打?你解一次畀我聽呀?』

「中國政府咁熱愛人民,又點會害佢地呀?你唔好含血噴人喎!信政府,冇事!總之要相信政府!」

『唔緊要,既然你咁信,你應該勸晒所有身邊信政府嘅老人家朋友,齊齊打科興呀!愈支持政府,就應該打科興!好似政府講法,你自己應該最清楚自己身體狀況,快啲約晒其他撐政府人士,一齊打科興啦!唔好打外國貨呀,中國製造先係好嘢呀!再唔打,就畀班黃絲霸來打啦!你地平時咁愛國,咪好唔抵?』

「啱呀!啱呀!快啲約齊班藍絲朋友,一齊打科興先!」

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多