• 壹週和你股|農夫入恒指咁又點?|譚朗蔚

  • 發布日期:2021-03-03 13:54
  • 壹週和你股|農夫入恒指咁又點?|譚朗蔚

 

尋日隻恒騰(136)跌一成幾,忽然間醒起我在上月17日在本欄批評過佢同赤子誠(9911)是九流的科技股,在高位不會企得穩。好奇一掃,發現不足半個月後的今日,連同埋當日點名的美圖(1357),隻隻都已經跌一半,當堂嚇到個心仔都離一離。枉當初我出帖依然有人同我拗,話我阻人發達係「燈」之類,實情我只係希望救得一個得一個,其他東西,我好少在乎。

今日同大家講講恒指。恒指29100點有支持,由舊經濟帶動。事關新經濟已經被債息上揚所殆盡,單以科指來計,9360點M字型雙頂頸線都穿埋,下望是8400點,可以沽得。近日有關於恆指在不久將來會加至100隻成分股的消息,我都想談談。事實是股份一多,資金的分佈就越來越散,僧多粥少,我想這一個道理應該無需我花幾多字來演繹。一句講晒,個市會悶。

無波幅,因為再難靠一隻半隻股份頂到個恒指上天花板,當然,亦好難因為一隻半隻股份而落地獄。至於資金有可能在七大行業板塊之中追邊隻?乜重要咩?就算我話俾你聽農夫山泉(9633)一定入咁又點啫?股份在高位橫行多時,近日失守58蚊區間底,下望就是45先至有像樣支持,加上多頭排列的均線出現10、20跌穿50天線的死亡交叉。沒有了,完了吧如無意外。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多