• 吾港戲|時代太壞 喜劇好偉大(尹學仁)

  • 發布日期:2021-03-02 15:25
  • 吾港戲|時代太壞 喜劇好偉大(尹學仁)

 

原本我想講,《消失的情人節》簡直 2020 年全球最佳電影,至少以我睇過計。不過眾所周知,因為疫情,其實 2020 年根本形同虛設,上畫電影有限,所以始終平實些少好,當做華語最佳電影就算,即使《消失的情人節》實實在在奪得去年金馬獎最佳電影。

其實《消失的情人節》好在邊?時代太壞,喜劇好重要,否則大家都已經全部自殺死,而最上盛喜劇,其實正正要你觀眾笑就笑,要你觀眾喊就喊,所謂笑中有淚。喜劇嘛,當然以笑為主,所以好多經典喜劇,都會開頭九成笑到死,最後一成喊到癲,又有娛樂性,又令人感動,例如南韓經典有《我的野蠻女友》。

不過如果你問我,尹某真心覺得,《消失的情人節》絕對在《我的野蠻女友》之上,因為後者大部份笑料,都來自女主角點虐待男主角,好多都太誇張,太夾硬,而且都幾低級趣味,反觀前者就生活化得多。

令《消失的情人節》可以勁好睇,台灣資深笑片編劇兼導演陳玉勳應記首功,劇本寫得好,有好豐富細節小趣味(例如一個電台 DJ 角色叫馬賽克,每次塊面打格仔位置面積都刻意好大分別,大家入場不妨留意留意);諗到好橋,不過仲會用到盡發展到盡,既貼地,又魔幻,兩邊比重拿捏得好準,到最後又可以溫暖人心,甚至老豆條支線,都搞到有些少哲學性:講到放下,講到有快就有慢,有借就有還。

導演陳玉勳(左)包辦金馬獎最佳導演以及最佳劇本,旁為兩位監製葉如芬和李烈(右)。
導演陳玉勳(左)包辦金馬獎最佳導演以及最佳劇本,旁為兩位監製葉如芬和李烈(右)。
女主角父親支線為電影加添深度。
女主角父親支線為電影加添深度。
男主角劉冠廷有金馬獎最佳男主角提名,但男配角周達群(左)同樣搶鏡。
男主角劉冠廷有金馬獎最佳男主角提名,但男配角周達群(左)同樣搶鏡。

其次,當然要推女主角李霈瑜,外形並非典型靚女,演得非常出色,好大膽好放膽,節奏獨特,連身體語言都有落苦工,不過最絕最絕,李霈瑜其實並非電影演員,平日工作其實主要做電視主持,導演堅持起用,慧眼識英雄。
《消失的情人節》女主角李霈瑜,只有金馬獎女主角提名,未有勝出。
《消失的情人節》女主角李霈瑜,只有金馬獎女主角提名,未有勝出。

再數,男配角「泰國蝦」賤男,主演演員其實來自香港,今日改名叫周達群,不過廿年前原名叫賴登勤,父親為黎根,九十年代亦曾經是香港滑浪風帆代表隊成員,輩份緊接師姐奧運冠軍李麗珊。

最後,《消失的情人節》即使要講攝影(巴士回程段路個日落靚到呢)、講美術(成個郵局搭景不過非常像真)、講音樂、講視覺特效(市中心 101 地下大場面你估會易拍?你估會細 budget?)等等技術部門,其實都非常上乘,否則電影點會如此完美。
片中郵局是搭景,像真度極高。
片中郵局是搭景,像真度極高。
片中一場精彩特技場面,贏得金馬獎最佳視覺效果。
片中一場精彩特技場面,贏得金馬獎最佳視覺效果。
這場經典場面在嘉義拍攝,有提名金馬獎最佳攝影。
這場經典場面在嘉義拍攝,有提名金馬獎最佳攝影。
片中魔幻情節包括主管人生失物之人形四腳蛇。
片中魔幻情節包括主管人生失物之人形四腳蛇。
香港有人材拍得到《消失的情人節》?尹某絕對相信有,香港電影最大問題其實來自老闆投資者,又短視,又零品味,專做錯誤決定,想賺錢?去炒金、炒股、炒樓啦!開戲有賺都要花長時間,根本點會化算,走啦。
作者簡介

行內人會視為行外人,行外人又會視為行內人。做過電影主創,又做過電影媒體,仲做埋電影教育。未天真到相信電影永恆,亦未灰心到認為香港電影玩完。不過一句到尾,身為電影觀眾,曾經叫做電影學生同畢業生,與其要做電影人,倒不如先透過電影學做人,首先要做個好人。
----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多