• 禁忌之林|派錢都派得樣衰過人(林忌)

  • 發布日期:2021-02-26 17:20
  •  禁忌之林|派錢都派得樣衰過人(林忌)

 

「有錢派呀!陳茂波有錢派呀!雖然冇上年一萬,但都有五千,係咪好開心呀?」

『開心你個頭呀,上年派一萬,都派到鬼咁樣,等咗成大半年先拎到錢,都唔明點解派錢咁簡單嘅事,都可以做成咁,今年仲要減半,幾時有得拎先?不過而家咁時勢,有錢派都唔會亂使啦,儲起佢啦都係。』

「儲?冇得你儲呀今次,消費券來,你要拎去消費先得,唔可以入落銀行呀」

『咩話?之前唔係又話啲人拎完政府錢,就使咗去換iPhone,因此唔應該亂派錢咩?家下我想儲起佢又唔得?又要亂買奢侈品?』

「奢侈品?你想買都唔係易呀,好似話五千蚊要分五個月派,而且仲要限定你電子消費,又唔知邊度肯收添!」

『冇嘢呀?之前派錢都已經派得樣衰過人,家下仲要嫌唔夠煩?仲要分開使?陳膠波冇嘢呀?仲膠唔夠呀?』

「政府話要刺激經濟呀,所以係派錢畀你去消費,唔想你儲起筆錢喎,咁所以咪要你出去使咗佢囉;但又驚你拎來買禮券,又或者一次過買晒電子產品或者其他奢侈品,對小商戶幫助唔大咁講,所以又要你分開使,分開買咁囉!」

『但我哋可以去邊度消費呢又?行商場?又唔使驚限聚令咩?又唔使保持社交距離嗱?又話叫大家減少非必要嘅往來,叫人唔好四圍去,家下突然又嫌我哋去得街少,又嫌大家唔去消費嗱?呢個政府嘅政策,究竟有冇consistency㗎?』

「你諗多咗啦,con咩consistency呢你想?佢個腦就constipation(便秘),你問多兩句就話你conspiration(串謀/陰謀),家下政府議案你就一定要支持,唔係話你『無差別反對』,就係話你違反國安法,再唔係都最少DQ你剝奪你5年參選權,然後同你講呢啲就係叫咩『愛國係天經地義』之類,有錢你使就唔好咁多嘢講啦!」

『講起咩陰謀論,咩電子消費券又係咪要迫人登記私隱資料?定係要迫班店鋪做電子交易?之前咪話好多小商戶只收cash,係咪又想迫人裝咩支X寶呀,安心上路呀之類呀?』

「又話時話,見有報導講政府會呼籲如八達通公司,要減價租機畀商戶;咩陳智思又話財赤,第時要開徵新稅擴闊稅基,咁兩件事放埋一齊睇,係咪政府打算借今次消費券過橋,利誘小商戶轉電子消費呢?全部電子化之後,買賣收入紀錄齊全,咁要做咩消費稅就易好多啦,係咪度埋呢啲『先派錢,後收稅』嘅屎橋呀?」

『嘩,你咁講又似層層喎,連借疫情過橋,禁選舉都做得出,然後搞監控安心上路又做得出,用社交距離來禁止示威遊行集會,以至用限聚令來搞黃店都做得出,只係借派錢來收稅,又點會做唔出呢?真係連派錢,都派得衰格過人呀!』

「都仲未計呢頭就叫大家要環保,唔好亂買嘢,仲話要廢物徵費,去減少固體垃圾;家下就迫人出街買嘢?究竟個龍門係邊度呢?究竟係想人唔好浪費,唔好做咩『大晒鬼』,定係要消費來救經濟呢?點解冇需要都要去購物?點解唔可以儲起錢佢?政府個龍門真係任佢搬呀!」

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多