港產電影《狂舞派3》，原打算去年聖誕節檔期上影，可惜當時受疫情影響，戲院重開無期，就連農曆年檔期亦要繼續「居家隔離」，靜待「起舞」時機，幸而近期香港疫情逐漸退卻，戲院終於能夠「重見光明」，《狂舞派3》亦火速上映。
其實，《狂舞派3》去年已經在台灣「載歌載舞」，入圍第57屆金馬像，並獲得六個項目提名，戲中主角Heyo（霍嘉豪）及「師傅」阿弗，不但獲最佳原創電影歌曲提名，當中Heyo更獲最佳新演員提名，雖然最終未奪得任何獎項，但對於「新鮮人」Heyo來說，已是非常不錯的成績，令他對做演員的興趣更大。
他說：「小時候都有諗呢啲問題，到底會唔會試吓做演員呢，玩吓音樂，定係玩塗鴉同踩滑板，即係好鍾意試不同玩意。最後當然係首先揀咗音樂，慢慢投身其中，然後再嘗試以前諗過嘅嘢，演員呢方面，我覺得仲有好多地方需要學習。」
Heyo是個音樂人，從小已沉浸在hip hop界，忽然走到幕前做演員，可能有點奇怪，不過他卻指，從來沒有想過這個問題。
「你提出呢個問題，但其實本身冇呢個想法，只係其他人有呢個問題嘅時候，問題先至存在。但有時候因為問題存在，先至令自己回想番，本身其實都唔係太介懷呢個問題，但會唔會介懷其他人有呢個問題呢？或者會對我有咩影響呢？我會經常喺呢啲位置上鑽牛角尖。」
在戲中飾演Heyo師傅的阿弗，曾參與《狂舞派》的音樂製作，在《狂舞派3》中更加「現真身」，他說：「故事背景發生喺工廈區，然後有hip hop，呢啲都係我熟悉嘅事。加上我修讀電影，亦有從事電影工作。戲中有個角色係飾演Heyo師傅，又係hip hop加rap，最初都唔知道嗰個角色會由我去做，然後都畀咗好多意見，例如應該點樣做就最好。點知到最後導演搵唔到一個合適人選，然後就建議由我飾演。」
可以說，阿弗正是「師傅」一角的「原型」，雖然他在戲中出場時間不算多，但當中一段美國經歷，卻為他帶來一段「難忘」回憶，「前後去過兩次紐約取景，一次做資料搜集，另一次就係拍攝，曾經因為喺當地塗鴉而被拘捕，俾當地警察帶返差館，然後送我去court house嘅地牢羈留室，喺嗰度等咗八個鐘，然後有位法援代表同我講，話有一種延遲判決，類似六個月內唔再犯，就唔會對你定罪留案底，最後就判咗我呢個裁決，冇任何懲罰，即時放番我出嚟。」的確令人捏一額汗。
- Heyo與阿弗在《狂舞派3》中，同樣以「新鮮人」作幕前演出。
- Heyo獲提名金馬獎最佳新人獎。
《歡迎嚟到呢座城市》的歌詞，無疑容易令人聯想到目前香港的大環境，Heyo直言白色恐怖更明顯，他說：「我哋只可以做到本身理想願景嘅模樣。所以歌詞亦有提到，唔理點樣，就係咁橫蠻，總之要由冇變有。」阿弗坦言：「情緒都好波動，同埋都唔敢講太多，即係可能一時會有啲信念，一時又會好迷失，會影響自己情緒，覺得好迷失，唔知點算好。」
在戲中，不時見到Heyo為填詞而費盡腦汁，Heyo回憶當年在澳洲工作假期時，hip hop給他的「威力」，「喺農場剪緊提子，每個人都有一部iPod聽緊歌，我就喺度聽歌慢慢剪，一邊聽一邊freestyle嘅時候，每晚又飲啲紅酒，然後日頭臨剪提子前又飲啲能量飲品，谷起整個人，但我嘅精力唔係用喺剪提子上，而係用喺freestyle上。一邊聽住節奏，個農場好大，有幾個足球場咁大，只得你一個人喺度freestyle，然後我當時嘅狀態，因為酒精加上能量飲品嘅影響，freestyle時腦裡面啲詞語可以任揀，呢個狀態係好厲害嘅，俾我有另一種精神層面嘅感受」，就連一旁的阿弗亦，「唔係發生過好多次，但真係好黐線」，果然是同路人，一聽就明。
Accessory - New Era @Newerahk
溥儀眼鏡 @puyioptical
Jacket - Popcorn @popcorngeneralstore
Jeans - Evisu @evisu1991
Adidas
- 二人與導演黃修平，齊齊出席金馬獎頒獎禮。(金馬執委提供)
- Heyo與阿弗更在頒獎禮中，表演《狂舞派3》主題曲《歡迎嚟到呢座城市》。
- Heyo在戲中飾演rapper，可說是做回現實中的他。
立即加入壹週刊MeWe
-----------------------------
《香港百年超級豪宅揭秘》經已出版 各大報攤及便利店有售
可按此網上訂購
----------------------------
守住新聞自由 和你撐壹週刊計劃 每月港幣$300起
按此了解更多
