• 禁忌之林|愛國當然要打中國疫苗!|林忌

  • 發布日期:2021-02-19 14:45
  • 禁忌之林|愛國當然要打中國疫苗!|林忌

 

「有冇睇新聞呀?嘩!29間疫苗接種中心,竟然有24間係打德國疫苗BioNTech,得5間中心係打中國科興,點解比例咁懸殊?唔係話兩隻疫苗嘅買入數量係一樣咩?點解接種德國疫苗嘅中心多咁多?說好的愛國呢?」

『哎呀,好心你啦,政府難得做件德政,又要唱衰佢!特區政府搵29間畀夠24間德國貨,只係5間打中國貨,咪就係面對現實,聽取民意囉;倒返轉29間畀24間你打中國貨,你睇下會咩環境呀?到時仲唔塞爆德國隊,中國隊就拍烏蠅?』



「冇理由呀!由班保皇黨李慧琼、譚耀宗到高永文,一日到黑都叫『國藥』,話要畀市民多一個選擇,即係證明班保皇黨打算,幾百萬人打晒中國疫苗,搞到唔夠中國貨,要入多隻『國藥』啦!咁點解政府竟然得五個中心打科興先?係咪搞港獨呀而家?」

『仲好講?唔通你而家反對政府?政府安排得24個中心打德國疫苗,只係得5個中心打中國疫苗,就代表左佢哋已經充份考慮民意啦!家下科興疫苗得個五成有效率,仲要交唔到第三期臨床報告畀國際期刊審批刊登!其他國家嘅疫苗交到,點解科興交唔到?』



「哎呀,人哋話,考唔到公開試,唔代表成績差喎!何況科興起碼有去外國測試呀,有土耳其、印度同巴西,巴西都叫做咗幾千個測試,都起碼有數據你睇下呀?至於『國藥』,連呢啲海外數據都畀唔到你睇呀,咁你而家仲有咩唔滿意呀?」

『人哋外國疫苗,幾萬個樣本數據畀專家慢慢睇,至於科興樣本少得多,而老人仲好似話得果600個樣本,而且咁少樣本計出來,有效率都係得果五成,比起人哋95%係差天共地;咁點解有好成績唔要,要差成績,而且仲要冇法去「考公開試」呀?然後你拎『國藥』來比?即係有更差嘅例子,就代表佢okay?』



「高永文講呀嘛,畀多個選擇畀市民呀,唔好咩?點解唔可以引入埋中國國藥疫苗先」?

『班保皇黨收左佢哋錢做代言人呀?家下科興都驚冇人打,然後到時都唔知點收科,你仲引入相同性質,同一款技術嘅中國疫苗?到時打唔晒,叫譚耀宗食晒佢,定係叫李慧琼子用疫苗來浸溫泉呀?』



「唔驚!使乜驚呀!叫三萬Thanks全部打科興,證明佢哋夠愛國;再叫保皇黨聯署話要中國疫苗班友,全部捉去打中國疫苗!愛中國,當然只係打中國疫苗啦!做咩要打德國貨先?唔係以為改個Kai名『復必泰』,就以為係大陸貨呀?」

『班有錢佬坐寶馬,班高官坐福士,你有冇見佢哋坐比亞迪呀?又反問你,你覺得班差佬或者其他愛國人士,佢哋坐駕係坐德國車,定係中國車呀?用口講就易,除左林鄭果班為上而上之外,你覺得班友真心真意打中國疫苗?好心啦。』



「喂,真心果句,家下又話唔夠疫苗,一陣全部搶晒德國貨,得返中國貨,咪唔夠畀市民打囉?咁為左令更多市民打疫苗,愛國人士以至警隊,梗係應該打左科興先啦,唔係一陣剩返科興冇人打,國家面子何存呀?係咪先?」

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多