• 禁忌之林|笑甚麼?高官全家都是中國人!(林忌)

  • 發布日期:2021-02-11 15:00
  •  禁忌之林|笑甚麼?高官全家都是中國人!(林忌)

 

「嘩!有冇留意嗰個林鄭月娥,昨日又玩大家,話就算拎住外國護照入境,都會被視為中國公民,然後就唔畀外國領事保護權,即係連以往好多人用開呢招都封埋,冇嘢呀佢?」

『喂,之前明明唔係咁玩法喎,以前局勢緊張嘅時候,好多人拎住英國護照,簽證都可以留半年,平日四圍去旅行,又點會連續留在香港半年咁耐?所以就索性排隊拎英國護照入境;又或者加拿大嗰啲都有3個月;家下唔止疫症玩我哋,就連拎護照入境呢招都封埋?唔怪得連英國外交部,都要出來抗議啦!』

「但其實聽落都唔係好明,林鄭又話咩自1996年人大定明,中國國籍法不承認雙重國籍,因此從來都唔承認佢哋在香港嘅領事保護權利,但我哋點解會無端端會變咩『中國國籍』呢?明明我97年前香港出世,拎兒童身份證,或者成人身份證嗰時,入境處叫我揀國籍,我明明揀咗英國國籍喎,咁點解無端端而家又變咗中國國籍先?」

『原因係1996年嗰時,中國就主權移交時,人大走去「解釋」中國國籍法,搬咗一次龍門去訂立在香港「適用嘅狀況」,然後就夾硬塞咗個中國國籍,畀每位1997年7月1日,存在於香港,又被佢哋認為你有「中國血統」嘅人士;至於點先有中國血統?聽返來嘅情況,真係「斷估」,即係見你有中文名,個姓同名都似係「中國人」,就送咗個「中國國籍」畀你啦!』

「咁都得?但照字面上解,中國國籍法唔承認雙重國籍,然後你在移居海外而得到外國國籍,你就會失去中國國籍喎;例如我當年移民加拿大,入咗加拿大籍,根據中國國籍法,應該自動喪失中國國籍先係嘛?又或者我丈夫拎居英權,好似林兆波咁拎住英國公民護照,咁點解又會繼續係中國國籍先?」

『Come on, 認真就輸了!呢個世界有兩種邏輯,一種係正常人嘅邏輯,一種係中國邏輯;所謂中國不承認雙重國籍嘅邏輯,係佢話承認就承認,佢話唔承認就唔承認;之前在香港,唔理你拎住咩護照,總之就當你係中國人,總之你唔主動去申請「退出中國國籍」,佢都會扮睇唔到你本加拿大護照,然後唔當你係加拿大人。』

「咁居英權呢?係咪都係可以退出中國國籍?」

『居英權就仲黐線!因為人大又話唔承認居英權,因此即使你想學加拿大護照咁,去申請退出中國國籍,佢都唔會批你──入境處會問你拎證明,要你證明自己嘅英國護照係點樣得到返來,因為英籍一係來自出生,一係來自繼承,一係來自登記,你拎唔出前兩者,佢就唔會畀你退出中國國籍啦!』

「咁假設我拎咗居英權,我仔女以至孫仔女嗰輩,係咪都唔可以退出中國國籍呢?」

『呢個問題就更加玄妙啦!首先英國公民身份,只可以在海外傳一代,因此要知道佢哋嘅英國護照係點樣得返來;例如你自己或者配偶,係居英權計劃嘅申請人,而在居英權計劃登記嗰時,仔女就已經出咗世,咁即係仔女亦都係靠登記,才成為英國公民,因此佢哋都無法退出中國國籍!』

「如果在90年代初未出生,父母都係居英權身份,例如仔女係1997年後出世嘅,咁又點計呢?」

『咁又唔同講法啦,因為居英權計劃登記嗰時,小朋友未出世,因此佢得到英國公民身份嘅方式,就係來自繼承 (by descent),因此即使父母係來自居英權計劃也不受影響,係可以申請退出中國國籍啦,係咪好奇妙呢?』

「咁搞法,咪即係迫大家去退出中國國籍?起碼出事有領事保護權喎,但出面又亂吹風,又話失去中國國籍,就會失去香港永久居民身份,有冇咁嘅事呢?」

『理論上呢,在目前香港法律之下,香港永久居民身份,與中國國籍係冇關係嘅;例如完全嘅外國國籍,完全冇中國國籍嘅人,佢哋只要合法在香港能夠住滿七年,仍然係可以成為非中國籍香港永久居民嘅;而即使改變國籍登記,唔代表會自動喪失香港永久居民身份,所以完全唔知班友點樣作出來,可能佢哋又打算「釋法」,又或者又搬一次龍門啦!』

「咁聽落去都好似幾吸引喎,咁退出中國國籍,仲有冇其他後果呢?」

『目前最大影響,就係一旦去移居海外,每三年都必須返一次香港,否則入境處會取消你嘅香港永久居民身份,雖然你仍然保有入境權,仍然可以自由逗留、工作以至讀書,但係將會要再住多七年,才能恢復永久居民資格,才可以恢復投票權啦;仲有唔可以參選立法會直選,只限參選部份功能組別議席,當然就不符合資格申請特區護照,以及所謂「回鄉卡」,去中國大陸完全要靠護照,以及申請又貴又耐又麻煩嘅中國簽證啦。』

「聽落有啲唔方便,咁有得退出,真係應該考慮下退出喎!起碼唔會好似班權貴咁,想退都唔敢退!」

『係呀,今鋪除非申請退出中國國籍,所有在香港嘅高官權貴親人,都全部「被中國人」,大家都是中國人啦!係咪應該開香檳呢?』

----------------------------

和你壹起撐住香港主題海報 全港良心商戶免費派發

了解更多

----------------------------

和你壹起撐徽章 良心商店及網店有售

了解更多

-----------------------------

守住新聞自由 和你撐壹週刊計劃 每月港幣$300起

按此了解更多