• 沈旭暉|換血記:林鄭引入非本地醫生,與來自前線醫護的聲音(壹週平行時空)

  • 發布日期:2021-02-09 10:00
  • 沈旭暉|換血記:林鄭引入非本地醫生,與來自前線醫護的聲音(壹週平行時空)

 

沈旭暉 / 辭職醫生甲

自從醫護罷工要求封關,這就成為「新香港」矛盾論的其中一個漩渦,現在政府處理擺明秋後算賬,也開始要「結構性」解決問題。林鄭月娥在「臨立會」表示,會提交法案,大舉引入「非本地醫生」,而一直視香港醫護為獨立王國的建制派,大表歡迎。

林鄭月娥的方案是:申請人必須是香港永久居民,畢業於「獲認可的非本地醫學院」,並取得醫生註冊資格或專科醫生資格,就可以來港工作,毋須再培訓、再考試。

魔鬼在細節。這個「方案」,基本上讓內地醫學院畢業生可以直接來港工作,而眾所周知的是,香港醫學院本身是尖子樂園,內地醫學院的質素要差很多、也容易考很多,現在卻變相可以「資格互換」,根據common sense,很難認為香港醫療質素不會下降。

至於「必須是香港永久居民」這個條款,其實也可以充滿彈性:假如申請人是純正內地醫生,以「專才」身份申請香港身分證,很容易獲批,之後同樣可以在香港工作。又或一個內地醫學院畢業生以其他身份拿到香港身分證後,又是可以工作。總之,由於中港之間已經沒有防火牆,一切中門大開。

這個「中港資格互認」制度先例一開,其他各行各業,自然陸續有來。任何職業,在未來無論是因為移民、還是大清洗原因,只要出現短缺,都可以直接引進內地專才填補。例如教師,就算把教協的老師都清洗掉,引入中山、珠海「獲認可的非本地教育學院」畢業生,同樣可以工作,換血計劃,更是多快好省。

昔日香港各界專業人士,捍衛了這類制度很久,雖然難免有保障自身利益之意,但這種制度堅持,同樣是香港人民的保障。可惜。

然後,一位已辭職的公立醫生讀到上述分享,有以下行內人的補充,他希望匿名一併讓讀者深入思考:

前線公立醫護的補充

前線公立醫護的補充

1.今次「 獲認可的非本地醫學院」名單將會同新加坡相比,大部份都會是外國有名醫學院,少部份會有國內嘅清華、復旦,但中西方逐漸對立之時,西方對香港角色越加懷疑,又點會有牛津、劍橋畢業醫生願意回流返香港公立醫院做牛做馬?何況送得呢班「香港永久性居民」身份嘅香港留學生,他們的父母不論政見,都想佢哋嘅下一代係外國發展,斷斷不會走回頭路。



2.美其名吸引海外專才,除左因為政治關係,病症Spectrum(光譜)係有地域性限制,好似香港獨有的乙型肝炎同鼻咽癌嘅本土病,西方國家少有見之,亦都成為異地醫生之間鮮有大規模移居工作嘅先天原因,唔係唔得,但要作出一大番嘅適應同再學習,香港醫生去外國執業亦面對住同樣問題。



3.除了病症spectrum 不同,語言係一大阻隔因素, 香港雖然是國際城市,但公立醫院嘅病人大多數都係講廣東話嘅草根階層,尤其係老人家。你叫一個講英文嘅歐美醫生嚟香港執業係一大難度,所以咁多年以嚟,即使香港有輸入外國醫生,多數都係一啲較少需要接觸病人嘅前線科目,例如放射科、麻醉科、病理學等。你叫一個講英文嘅外國醫生係門診到一個下晝衝幾十個症,基本上無可能。



4.咁好自然,呢個本身歡迎全球畢業於「獲認可的非本地醫學院」計劃,吸引到自然只有來自北方嘅醫生,真正海外醫生根本少之有少, 再加上「香港永久性居民」呢個資格,亦只有「單程證」或「專才輸入」計劃先可以輕易獲得,所以敢斷言名單上絕大部份嘅醫學院都係虛,只有北方嘅幾間先係實。香港並不是新加坡,新加坡吸引到嘅醫護人才,基於上述因素根本不可能。



5.除左清華、復旦,更重要嘅係盧寵茂係深圳謀算多年嘅「香港大學深圳醫學院」,多年嚟搵港大班教授上去任教,應該已經產出第一批嘅醫科畢業生,戴住香港大學醫學院嘅名函,地近香港,能操廣東話,先係計劃嘅最大源頭。而盧寵茂將會成為呢批新血嘅「恩師」、「座師」,長遠換血落去會係 de facto控制左醫管局嘅整個運作,並成為直正影響到香港醫生人才嘅第三間醫學院院長。



6.成個計劃最值得深思的是規定︰「只可以喺公營醫院工作,唔可以輕易去到私家市場私人執業」,這個做法有幾個目的,首先係做出成個計劃只係為左補充香港公營系統嘅人手不足,以加強其正當性,以獲得建制、草根市民嘅支持;另外就係要減低私營醫護市場嘅反彈,要知私營醫護市場一直係藍營嘅中堅份子,醫學會副會長林哲玄就是當中表表者,為免直接衝擊私人市場醫護利益,所以計劃只係集中在公營醫管局。



7.去年對罷工醫護的處理方法只係要「扣糧」結尾,以「以眼還眼」嘅作風,呢種輕輕放下嘅做法不成比例地輕,原因得一個,係疫情同醫護不足之下,無法即時作出報復性行為,只能夠大幅增長醫生嘅數量進駐公營醫院,先可以血洗「黑醫護」,以報去年罷工之仇。



8.另外一個原因不讓外來醫護直接出私人市場,係因為私人市場,錢同客係有選擇嘅,作為一個消費者,你會相信係診所門口個水蛇春咁長嘅名牌係寫住「英國皇家外科醫學院」定係「上海交通大學醫學院」的畢業醫生?呢個問題自己答。但私人市場以競爭為主,操普通話海外醫生根本不能夠與香港本地醫生競爭,開唔開放分別不大。



9.但長遠嚟講,擁有專科牌照本地醫生會慢慢流出私人市場,留低位置就為北方精英替代,而醫管局係擁有一個非常重要權力,醫管局轄下公營醫院是香港唯一認可,可作專科醫生訓練地方,而專科訓練至少係實習後六年。除此之外,無一間私家醫院或組織擁有這方面權利。而掌控專科訓練,長遠將成為一大挾制香港士子嘅權力。係香港本地兩間醫學院畢業的尖子,抱住濟世為懷之心,胸懷民主自由之價值,會為自己長遠發展﹑專科訓練機會而噤聲或被收編?答案不言而喻。

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多