• 禁忌之林|葡萄淑儀嘅英國朋友|林忌

  • 發布日期:2021-02-05 15:00
  • 禁忌之林|葡萄淑儀嘅英國朋友|林忌

 

「嘩!你有冇睇葉劉個Facebook,有個咩『英國朋友』嘅『金石良言』呀,講到咩BNO去英國嘅5+1計劃一無是處,又話會被人趕走,仲話應該用『正規途徑』去移居英國喎,唔知你點睇呢『英國朋友』?」

『唔識就嚇一跳,識就得啖笑,所有去移民去英國嘅計劃之中,有咩方便得過5+1計劃呢?有,就係2021年以前仍生效嘅歐盟公民囉;自從脫歐計劃之後,5+1計劃就係最慷慨,最容易申請,最少限制,最多自由嘅計劃,甚至比起同英國人結婚更自由方便;舉個例你聽,假設你同一個英國人結婚,平日聽咩社區組織協會講,以為咩「家庭團聚是人權」呀嘛,知唔知要先通過資產與收入審查?』



「咩話?結婚團聚都要資產、收入審查?唔係人權咩?唔係好似單程證咁,有綜援有政府養咩?乜原來申請老婆或老公,或者仔女去英國團聚,都要資產與收入審查?唔係嘛?」

『就係咁!即使係英國公民,你與外國人結婚,要申請佢哋去英國,每年收入要有£18,600英鎊,而且唔計散工收入,要係月薪或者有其他營業、交稅證明;好多人收入即使夠,因為係散工,都唔符合條件;至於有仔女要申請,第一位加£3,800英鎊,之後每位加£2,400英鎊,所以你冇錢養,就只可以去其他國家團聚,而唔可以去英國團聚,呢個就係英國嘅規舉,偏偏以前香港人話爭取呢樣嘢,就畀人話係「歧視法西斯」啦!』



「嘩,咁比較之下,拎BNO去只要有半年儲蓄,就可以入境自由搵工返學,咪好自由?但葉劉話佢英國 friend 講,話應該用咩『正規途徑』環境先較好喎,點解先?」

『信佢一成,就雙目失明啦!家下唔止係搵唔搵到工嘅問題!而係僱主嫌唔嫌煩,請你使唔使另外申請簽證嘅問題!就好似香港搵工咁,如果你要僱主另外搵人搞簽證,唔單止要錢仲要時間,加上外國嘅效率節奏慢得多,你要等政府審批,批得出個簽證出來都已經唔知要搞幾耐,你係老闆,你想即時請到人填補空缺,定係你想慢慢等呀?所以搵工唔係易,但係更難係你仲要另外申請工作簽證許可!家下5+1畀你完全自由,即係入咗境之後,做乜嘢都得,又唔使另外申請,除咗冇得領福利救濟之外,同以前歐盟公民根本冇分別!你話邊樣好啲呀?』



「但係佢講到好恐怖,又話幾年使晒錢,就會被英國踢走,只係被英國『利用』,作為『政治籌碼』喎!咁被人踢走又好似好恐怖咁喎!」

『全世界移民,正常來講都要你生生性性,唔係去當哋作奸犯法,殺人放火啦下嘩?你估人人好似施君龍咁,殺完人坐完監,都仲可以照樣成為永久居民呀?又或者移民去到人哋地方,唔打算自食其力,然後攤大手板,話寧願返鄉下耕田,又或者要住大屋呀?究竟係我哋唔正常,定係好似有關單程證嘅報導咁,先係正常呀?』



「係喎,邊有咁嘅道理呢?但係好奇怪,點解明明都冇嘢可以反,都夾硬要搵個『英國朋友』出來反呢?早排先睇親政府報導,報佢個女留學英國,話因為武肺而『滯留』英國添,唔知佢個女拎咩護照,申請咩簽證,點解要去英國留學,唔去祖國留學?真係唔明啦!」

『係囉!中國大學咁好,中國又咁強大,點解唔去中國,卻要去英國呢?我真係唔明呀!!!』

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多