• 香港封城演義|雲海專欄

  • 發布日期:2021-02-03 16:20
  • 香港封城演義|雲海專欄

 

接近半夜時分的九龍 A 區,忽然出現一班執法人員用鐵馬及流動電閘封死街道所有出入口,殺居民和商戶一個措手不及!

政府引用〈衞生條例〉,突然宣布封鎖一個區域十幾棟大廈。這是政府首次強制封區,到底純為了防疫衞生,還是背後另有目的?市民與傳媒之間興起了一種新陰謀論 —— 市民 A:「我屋企人仲未放工,而家封區唔畀人進出會唔會太奇怪呀?」

市民 B:「若果真係為咗搵出感染者,唔係應該等齊人返屋企先封咩?」

市民 C:「仲要預先放風,有啲人一家大細拖喼走晒啦!」

表面宣稱為了檢疫,現實中又似係另有所圖!

這時政府人員已經把街上的合法泊車上鎖,並召喚大拖車逐一拖走⋯⋯一位跑得氣沖沖的私家車司機就差那十幾秒,眼白白望住自己的車被無故拖走了:「點解?點解要咁做?」在場執法人員像看不見他似的⋯⋯司機問警察:「就算是 599,政府係根據邊條交通條例咁做呀?!」

那警察當他透明,扮聽不到。而且司機在最後一刻進入了封鎖線,他亦被強制逗留,司機非常無奈!

一眾記者拍攝完司機,馬上被現場執法人員趕入賓館。記者 A:「我哋係傳媒,又唔係呢度居民,點解唔可以採訪呀?」阿蛇 A:「總之任何人進入咗封區範圍就要禁足,包括記者!」記者 B:「成件事太奇怪!封區連採訪都禁止?我哋做完檢測係咪可以喺度做訪問?」阿蛇 B:「唔得囉!做完檢測都要返賓館囉!」599 條例權力看來可以無限放大!當一個又一個記者被迫收取食物包返回賓館房間,正惆悵沒有煮食工具及罐頭刀之際,忽然有行家 SIGNAL 大家上天台有嘢睇⋯⋯

數分鐘後,兩名同防疫無關的人出現地面現場,一個係鄧炳強,另一個係陶輝!

記者 C:「咁奇怪嘅?佢哋嚟封鎖區做乜嘢?呢度又唔係犯罪現場,完全冇作用㗎喎?」記者間開始竊竊私語,開始覺得封區只是「門面功夫」,真正目的不言而喻⋯⋯

警察高層 A:「封區情況點?」

下屬:「大致好順利,所有人都相信我哋係為咗防疫!」

警察高層 B:「呢次演習最緊要可以話畀大家知,成功控制到啲記者出唔到嚟、拍攝唔到、採訪唔到我哋真正嘅任務!」

下屬:「放心,所有記者都被困喺賓館房間直至聽朝七點!」

警察高層 B:「Good job!最緊要安排新聞處同事拍啲罐頭片,畀公眾認為我哋真係防疫封區!」

過幾天,九龍 B 區被封。幾名警察高層都有到場。高層 B:「今次演習就要做到封完之後零確診,等市民慣咗,第日再封區就唔覺眼!」

高層 C:「以後我哋要圍堵社會運動目標人物嘅單位就簡單得多啦,要捉要拉,冇記者會影到,冇市民用手機拍到!」

高層 D:「依家破門入屋都得,逐家逐戶搜屋,599 仲犀利過國安法呀!就算入屋攞晒啲電腦同文件走,都真係冇人會知,更加唔會畀國際社會知,睇嚟我哋要做多啲真封區混合啲假封區!」

下屬:「放心 Sir,混淆視聽係我哋最拿手㗎!冇難度!」

於是乎,香港各個社區,被圍封之後零確診越來越多,一晩封幾個區的行動也越來越多,因為真正目標並非防疫⋯⋯!以上內容雖然只係一節演義故事,一個徹底嘅陰謀論,但係從第一日封區開始,我已知道有不少傳媒討論過呢個陰謀論!

你作為香港市民一員,你相信嗎?
作者簡介:

作者簡介:

雲海,全名陳雲海。傳媒界的頑童,有些不受控;喜歡周遊列國尋幽探秘,除了愛探索古靈精怪東西之外,也熱愛尋求社會真相。投訴是另一種嗜好,別人稱他為「炸兩俠」!
----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多