• 劉細良|衝出嚟柒(壹週城寨)

  • 發布日期:2021-01-29 13:00
  • 劉細良|衝出嚟柒(壹週城寨)

 

立法會辯論施政報告,工聯會郭偉强打算引用流行學病家庫哈爾斯基(Adam Kucharski)於《衛報》指打擊網絡謠言的最好方法,是以對待真正病毒的方法,他把英國報章《衛報》(The Guardian)當成世衛的報章,稱「《衛報》啦,我相信都係世界衛生組織嘅報章」。堂堂立法會議員,連英國歷史悠久知識分子大報都唔知,真係好柒。唔知下次會唔會以為蘋果日報係美國Apple CEO Tim Cook指揮呢?

跟手又係工聯會,今次輪到吳秋北,話說佐敦封區大龍鳳,入住賓館記者獲發罐頭,需用罐頭刀開,港台記者如實報導,引起老左圍攻,吳秋北質疑他們以甚麼目的去「自由選擇」政府提供的物資,吳並且展示另一張居民獲發物資的相片,顯示獲發的罐頭都有拉環,不需罐頭刀都能開啟食用,「港台記者預設立場,喪盡專業;出政府糧,拆香港台!已成了新聞界的敗類!」但之後政府承認有兩成罐頭冇易拉環,其實不止港台,Now記者也作出同樣報導,我地由細食到大梅林牌大圓罐午餐肉,要用罐頭刀開是常識吧!即使砌港台上曬腦,不放過一絲機會立功,但也要做做Fact check。



第三個衝出嚟嘅葉太仲勁,衝出國際,佢在fb貼出一張維吾爾族女演員廸麗熱巴嘅相,話美國指控中國喺新彊進行種族滅絕,但其中一個當紅藝人廸麗熱巴,正正係新疆嘅成功故事,反問「何來種族滅絕?(What genocide?)」葉太乃國際知名人士,所以此文一出,立即引起嘩然。路透社國際新聞編輯Gerry Doyle立即應機,仿效葉太神邏輯,話已故著名美國黑人搖滾樂手Jimi Hendrix喺60年代,係最紅嘅音樂人,「咁就證明到60年代美國無種族歧視喇。 」其實,可能在葉太心目中,真正的滅絕,要去到恐龍咁嘅樣,如果有維族人存在,而且仲係當紅明星,足以證明未滅絕。難怪大家會懷疑葉太在史丹福大學的學位,究竟是否來自香港「史丹福游泳學校」。



第四個衝出嚟嘅點會少得林鄭,冇得上京只有WFH向主席述職,一見中央電視台畫面,個心真係離一離,白色燈光兜口兜面打落去,配上一件紙紥公仔常用紫色,稱為「陰司紫」嘅中褸,究竟以「死人樣」同主席述職,係乜嘢玩法?林鄭有冇新聞處官員同佢打點出鏡?仲要這次視像述職經中央台新聞全國轉播,大show都咁騎呢,實在太過分。



難怪大家覺得香港群魔亂舞,因為一排蛋散個個上位,大權在握,於是紛紛跳忠字舞,以戰狼style去取悅主子,但就限於個人資質,出征變成出醜。大陸成日問香港點解人心唔回歸,大家只要望一望何君堯丶葉劉丶郭偉強丶吳秋北丶林鄭月娥就知。北京要起用一班奴才,其實大家都明嘅,但可唔可專業些少丶認真些少。當年2003七一之後前國家副主席曾慶紅對民建聯贈八字真知:「外樹形象丶內強質素」,點知十多年下來,大家才知道原來曾鈺成丶陳婉嫻丶程介南丶譚耀宗等人已經是建制派人中之龍。



佢地唔會「衝出嚟柒」。

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多