• 禁忌之林|抗疫失敗賴地硬 林鄭恬不知恥︱林忌

  • 發布日期:2021-01-29 12:30
  •  禁忌之林|抗疫失敗賴地硬 林鄭恬不知恥︱林忌

 


「嘩!今日有冇睇到新聞片呀?差佬做騷狂跑百米,以為捉賊?走去封區做咩強制檢測咋,使唔使呀?」

『咪就係囉,打仗咁款以為咩事添?原來係封來驗毒咋?呢個時候扮勇武,做乜呢?呃OT都唔使咁呀?』

「林鄭來落區『視察』十五分鐘嘛,梗係要做場戲畀大家睇啦!家下同中國大陸睇齊,所有嘢都係做門面功夫,睇得到嘅地方就扮晒蟹,睇唔到嘅地方就理得你,呢個咪就係家下香港咁囉」

『賴地硬嘅本事,仲學足晒大陸添呀,有冇睇佢最近嗰篇咩《抗疫一年 總結經驗》嘅文章呀?嘩,賴抗疫差唔係因為佢自己為擦中國鞋,拒絕全面封關,仲倒轉來講,屈係咩「社會動濫未平息、街頭暴力、政治抹黑、虛假消息令抗疫舉步為艱」喎』

「呢啲咪人渣囉,請問第一波時醫護罷工要求全面封關,嗰時林鄭點講?話要顧存大陸班友不便;第二波點樣來?政府唔阻人去旅行,檢疫又亂做,只係靠市民自發戴口罩,政府呢?點解嗰時唔識強制戴口罩?第三波就係因為政府豁免海員檢疫而搞出來,本來香港連續好多日零確診,係咩人中門大開,放病毒入關?至於第四波,唔係話搞咩『全民檢測』就冇事咩?硬拒不封關,病毒入境後有無數錯誤,然後仲幻想要搞咩『旅遊氣泡』?疱疹佢就有份啦!」

『封關就為大陸人做成不便,所以唔可以做;封樓呢?家下日日搞突擊封樓,為香港市民帶來不便,又不斷要做?有冇咁嘅道理?呢種唔封關,卻要驗樓嘅做法,就好似唔做避孕,出事就要落仔嘅做法,係完全不負責任!而且唔止係大肚要落仔,仲要不分男女,人人被迫驗孕,把驗孕當避孕,班高官就係荒謬到呢個地步!』

「學中國封咩『小區』呀嘛,真係小佢腦冇咗個區囉!人哋封區係為咗強制隔離,好似咩遼寧瀋陽,有個區係封23日,即係等如成個區變相隔離,原因就係唔想有病毒繼續四圍散播;家下你強制驗,但係驗完又唔代表安全,咁你驗來做乜先?有好多人驗完冇事,又唔代表係安全,又有咩假陰性;然後繼續在社區四圍播毒!你政府肯認真做嘢,絕大部份市民都配合你合作啦,使唔使強制驗?使唔使封區禁止出入?你政府逐個追,又使乜要變相禁制大部份人唔畀出入?」

『咩「政治抹黑、虛假消息」講起就火滾,嗰時大家質問佢,點解要選擇中國科興嘅疫苗,點解要強制唔畀市民選擇,林鄭點講呢?吹到「最快」一月份就會有疫苗到港,而家去咗邊?影都冇呀!連資料都畀唔到香港呢邊,連幾時先有都答唔到呀!吹到中國疫苗畀老人家打先,結果連中國中央電視台,自己都報中國國藥嘅滅活疫苗,只適合畀18-59歲人士打,冇足夠數據表示安全,因此唔適合60歲或以上打,咁買一堆唔畀老人家打,卻安排畀老人家打嘅疫苗,究竟係為乜呀?』

「政府自己不斷散播假消息,然後屈人哋抹黑佢;九月全民檢測一早話咗冇用,仲問咩專家有冇良心,究竟係咩人冇良心呢?市民自發戴口罩,要求封關,佢當日咩都冇支持過,甚至係反對埋,就當係自己功勞,仲話用香港比好多地方好來領功;所有錯就一句都唔回,疫苗吹完就當冇講過,乜都賴係人哋嘅錯!真係無品之極!」

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多