• 禁忌之林|譚耀宗 光宗耀祖白老鼠(林忌)

  • 發布日期:2021-01-22 13:45
  •  禁忌之林|譚耀宗 光宗耀祖白老鼠(林忌)

 

「巧威威呀!呢次真係光宗耀祖啦,早兩日被美國制裁,轉頭就在北京有針打!嘩!仲要同記者大大聲講,話自己打咗第一針中國國藥嘅武肺疫苗!然後仲話第二針都好方便,可以去北京或者深圳打,係係係,唔似賤民要隔離14日嘛,得到北京賞賜疫苗呀,仲唔開心死佢咩!」

『哎呀,人哋被美國制裁,唔用得銀行戶口,又唔用得信用卡,叫你換,你換唔換呀?唔好妒忌人哋啦;何況呢,中國國藥喎,唔係在1月3號嗰時,中共中央電視台官方發佈通知,話只限18-59歲打呢隻疫苗,話因為60歲以上嘅臨床試驗唔夠,所以擔心副作用,而唔打得咩?嘩,原來賞賜譚耀宗做白老鼠,仲要做完都仲笑嘻嘻呀?有冇咁好笑呀?

「嘻!你又知人哋打嗰隻疫苗,會同你賤民打嗰隻一樣?或者中國國藥秘密研究咗兩隻唔同疫苗,供中共幹部『特供』呢?人哋生果蔬菜豬肉都有『特供』,你又知疫苗冇?」

『唔係呀?疫苗都有「特供」?供應德國BioNTech嗰隻畀佢哋打咋?唔信,你數下班官坐德國車,定係中國車?你覺得班友同親友,係揸比亞迪,定係「奔馳」定寶馬多?』

「係呢?點解最需要疫苗嘅平民老人家唔打得,但係71歲高官嘅譚耀宗就可以打先呢?一定係為人民服務,幫中國國藥做白老鼠!絕對係身先士卒,光祖躍祖嘅高尚情操!唔通你話係特權咩?做乜中傷偉大嘅中國共產黨呀?」

『喂,講到明60歲以上唔打得,都照樣畀佢打,行先死先,一個唔該好似李偲……咁有咩冬瓜豆腐點算先?咪玩啦!』

「哎呀,傳媒都報佢個仔在澳洲入埋籍!之前親共傳媒又幫佢吹到大一大,話當日幫個仔改名做『建宏』,係解做『建設宏大嘅中國』,咁而家去做澳洲建設,係咪變咗『建設宏大嘅澳洲』呢?」

『做咩又踢爆人哋先!講返隻疫苗啦,中國國藥與科興,兩隻雖然唔同牌子,但係都係用緊相同技術──所謂「滅活疫苗」;之但係早兩日科興個代表,在記招上面講,話巴西測試得50%有效,係因為巴西醫護接觸病毒攻擊嘅次數,比普通人多喎;仲話接種疫苗只係「防疫重要部份」,而接種咗之後,防疫都唔能夠放鬆喎,咁點解譚耀宗好似聽唔到咁,仲以為打咗疫苗,就可以自由出入中國大陸唔使隔離呢?』

「吓?打咗疫苗都仲要繼續做防疫?即係打完都照樣要封關、戴口罩、保持社交距離?咁打完同冇打,有咩分別?如果話醫護接觸病毒多,就較易感染病毒,咁不如話唔出街,咪唔會接觸囉,咁打來做乜?」

『係呀,即係去幼稚園或者老人院,做避孕技術測試咁囉!100%有效添呀!冇病毒就梗係唔會感染啦,疫苗唔係就係用來應付有病毒嘅環境咩?竟然賴話因為病毒多,所以就影響佢「效率」,搞笑呀而家?』

「最荒謬就係呢堆技術資料,仲要係中國公司自己講出來,即係話老人家唔打得,又或者打完都唔代表安全,要繼續做防疫工作,偏偏嗰班親北京嘅保皇黨,連自己嘅書都唔聽,吹到打完中國疫苗就可以乜都得,又旅遊氣泡又全部通關復市,自己發夢就算啦,仲要累街坊,嫌累得香港人唔夠呀?」

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多