• 海洋公園轉私營有得諗︱刁佬

  • 發布日期:2021-01-22 13:00
  • 海洋公園轉私營有得諗︱刁佬

 


呢排股市㷫恰恰,北水南調炒高哂,不過今期刁佬唔講萬惡既資本市場,反而想講下我哋差不多已遺忘的老朋友“海洋公園”。劉鳴煒今次冇講金句,搞搞新意思,提議海洋公園免費入場。

以香港人的性格,免費嘅嘢又點會放過。刁佬覺得肺炎稍為放鬆之後,海洋公園免費入場一定人氣旺盛。先唔好講園內設施能否賺錢,人流多了自然交通、泊車、甚至買水都多了。商家見到人流,自然會有興趣投資。

不過如果刁佬只係講上段嘅橋,咁就認真失禮啦,點做刁。那到底刁佬想點改造海洋公園呢?其實香港經歷兩年的蕭條,先是社會運動,然後肺炎,刺激內銷是當務之急,投入資源造基建是振興經濟的手段,如果可以重新建造海洋公園。珠玉在前,過去咁多公營機構轉為私營之後,如港鐵及領展,邊個後來唔係賺到盆滿缽滿?

賺到的都是庫房的錢,如果海洋公園賺到盈利,理應將部份盈餘投入保育基金。這個保育基金作為種子基金,與環保及保育組織合作,為保育我們的海洋生態作出貢獻。

如果唔係免費入場,好話唔好聽,一個日久失修嘅海洋公園真係送都唔去,好似好耐無見的親戚,一年見兩次,一係拜山一係拜年,正常都唔想見。如果海洋公園好好玩,新奇有趣多意念,太家又點會唔去。

刁佬深信香港人無理由做得比人差,如果海洋公園係私營公司,冇人材咪請囉,國內同胞、外國專家、國際人才。投資縱使龐大,但回本是有期的,見得到回報,相信好多基金及投資者都會樂意投一份,只要公司可以上市,政府持有的海洋公園股份,自然可以慢慢退出。

刁佬越諗越覺得海洋公園係一門大生意。只要水上樂園開番,淨係星期四至六做個Ladies Night,每個月搞次月圓之夜 Full Moon Party,女仕唔收錢,隔離個男仕點都要科水啩?入到嚟真係唔食唔飲唔買?唔好玩啦,點都要跌返啲。

另外,我哋連大球場都想用來做演唱會場地,海洋公園點解唔可以?整返個有蓋場地,日頭做海洋劇場,夜晚畀人做表演,市場絕對是求之不得。

刁佬不才,呢啲橋都係拍腦袋諗出嚟。香港人的靈活走位,一定可以令海洋公園再發光發熱。估計香港本土仍有潛力上市的公司,數下手指真係唔剩幾多,一個可以係南區做娛樂、大型設施及房地產的投資項目十分稀缺,如果可以劃少少地方搞個酒店及娛樂設施,相信好多人有興趣。

今時今日一個冇人去嘅樂園,已經無咩可以蝕,與其個個月燒銀紙陰乾,不如真係吸啖氣叫政府拎海洋公園上市,每位市民獲得一股,大家都係股東,到時股東大會一齊投票不知幾開心。香港很多年過三十歲的朋友都曾到過海洋公園,當然全世界有很多海洋館及樂園,但有共同回憶的地方不會很多,希望大家好好珍惜。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多