• 禁忌之林︱叫年輕人打中國疫苗?難聽過粗口︱林忌

  • 發布日期:2021-01-15 14:45
  •  禁忌之林︱叫年輕人打中國疫苗?難聽過粗口︱林忌

 


「嘩巴西測試中國科興疫苗,咩整體有效率只有50.38%!僅僅合格咋!低到咁,嚇死人咩?」

『唔係話咩土耳其測試有91.25%咩?唔係話巴西初初測出來都有78%咩?做咩愈測愈低先?』

「係囉,睇清楚土耳其嗰個測試?只係試嗰千幾人,都有29個染病樣本;咁樣都話叫做係數據測試喎;點解遲遲都公佈唔到先?點解人哋其他疫苗,測試四萬幾人,你就千幾人都敢拎出來講?」

『人哋早兩日在北京,都仲拎緊土耳其個數據出來講呀!原來離譜成咁?由九成幾跌到五成?咁即係一半機會中?』

「你睇返九月份新聞呀,仲巴閉呀,另一間中國公司,接受BBC訪問,吹到打一針就97%安全,打兩針就100%安全;報導仲講,中國疫苗定價,比起美國、德國、英國疫苗都仲要貴呀!不過講講下又否認咁囉。」

『中國的會…爆炸!啊唔係,中國嘢你一定要信呀,又由100% 安全,變成七成幾安全,再試真下又變咗五成安全嗱?咁都得?而家個數據係咪最後數據呀?』

「對唔住,到而家都未有全面數據;人哋美國公司或德國藥廠,九成五或九成四安全,測試4.3萬人,所有嘢清清楚楚,當時出街出得遲,仲畀人用陰謀論,話係故意令Trump拎唔到分添!」

『祖國真係好強大呀,未做實驗就知100%安全,講兩嘴就至多減幾個%,話九成幾;轉頭又變咗七成幾,再轉頭就得返五成,下次再跌咁點算呀?』

「個咩香港醫院藥劑師學會建議,話由於有效率得五成,因此老人家或者長期病患者,接種之後可能低過五成,即係唔合格,因此建議老人院唔應該接種,而應該『留待後生仔』接種喎,聽完你有咩感覺呀?」

『唔係早排先大大聲講,話中國疫苗好勁,人哋德國嘢要零下七、八十度儲存,中國呢隻唔使,又平,又安全,又有效,中國科技勁過晒全地球,因此話老人家去醫院唔方便,可以打中國疫苗呀嘛,而家又要改口,又話老人家唔適合嗱?』

「係呢!中國中央電視台自己報,話中國製疫苗嘅年齡限制,係18歲到59歲!至於59歲以上,或者老弱長期病患,就嚴禁接種呀!」

『唔係佢哋最高危咩?最高危唔接種得,咁畀低風險嘅接種,把鬼呀?你叫香港等住打中國疫苗嗰班藍絲,情何以堪呀?』

「早兩個月就吹到老人家最好打科興,而家就話老人家唔好打啦,搵後生仔打啦;講嗰個真係擺明靠害,你問下後生仔,有幾多個願意打中國疫苗呀?」

『早排民調都話有四成年輕人,拒絕打疫苗;有得選擇都話唔願打,你仲叫佢哋打中國疫苗?你覺得後生仔會唔會熱愛打中國疫苗呀?玩嘢呀?想更少人打呀?捱兩針,都只係得五成有效,點解唔打九成半有效嗰種?』

「咁又係呀,要你捱兩針,睇兩次醫生,你覺得對後生仔來講,係疫苗費用問題,定係機會成本問題呢?就算外國貨要收錢,後生仔都寧願打外國疫苗,都唔會打科興囉!」

----------------------------

立即加入壹週刊MeWe

-----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多