• 禁忌之林|林鄭月娥顛覆國家(林忌)

  • 發布日期:2021-01-08 13:00
  •  禁忌之林|林鄭月娥顛覆國家(林忌)

 

「嘩!有冇睇戴耀廷嘅攬炒十部曲,密謀顛覆國家呀?好得人驚呀!」

『係呀,外國當晒奇聞甚至係趣聞咁報呀嘛,話初選、想贏得議會半數,就等同係顛覆國家政權,真係連第三世界國家都不如呀!咁怕輸,就咪搞選舉啦,一面搞選舉,一面話人打算贏係顛覆國家,真係其他極權國家都睇佢唔起呀!正所謂醜事傳千里,今鋪佢真係重創中國嘅形象喇!』

「乜有形象咩?乜唔係全世界都支持中國咩?明明幾十個國家支持國安法,支持中國喎,你做咩講到個個反中國咁?」

『係囉,日日都話絕大多數市民支持政府,咁點解會擔心在一半議席嘅小圈子選舉中會落敗,仲要連輸兩次畀35+ 呢?次次撐政府都幾百萬人簽名,又話絕大多數市民都企在佢嗰邊,驚咩呢呵?乜原來絕大多數香港市民,都反對佢咩?』

「係呢?好似李桂華話咩35+打算否決財政預算,然後就顛覆國家政權乜乜乜呀嘛,乜唔係基本法列明嘅合法手段咩,點解變咗非法?唔係連湯家驊都話,要有咩武裝非法行為,先叫顛覆咩?」

『仲好笑係咩否決都要睇咩理由,拆咗個反對制佢啦,你覺得我反對都有道理先畀反對,仲需要反對咩?有冇睇過基本法原文?』

「等我讀一次先,基本法52條(3)寫明:因立法會拒絕通過財政預算案,或其他重要法案而解散立法會,重選的立法會繼續拒絕通過所爭議的『原案』,然後特首先必須辭職咋喎,咁請問點樣顛覆國家呀?」

『即係先要贏35+,然後否決財政預算案,然後特首決定解散立法會重選,然後重選又再輸多次畀35+,留意「原案」二字呀,即係呢個時候特首林鄭月娥,要明知「原案」再上立法會,再被駁回就必須根據基本法52條辭職,都仍然堅持不撤回、不暫緩、不修改,死都要一字不改咁過,咁就會造成辭職啦』

「係囉,寫到明原案先要辭,唔係原案就唔使辭,咁佢都仲要原案上?如果可以連輸兩次立法會,咁明知輸梗啦,仲唔修改?仲堅持要夾硬來?有冇咁嘅道理呀?」

『唔好忘記仲有絕招──人大釋法呀,佢哋鍾意可以「釋」一次法,話「原案」唔係「原案」,又或者「原案要辭職」要咩三步曲,否決又要五步曲,仲有DQ神技,隨便就可以DQ你「不守法」嘅議員呀,請問你點樣可能強迫到林鄭月娥辭職呀?除非佢係戴耀廷嘅歹毒同謀啦!』

「係喎,人大隨便就可以釋法,仲可以DQ喎,咁點可能迫到政府辭職?除非人大常委會都係歹毒同謀,否則完全冇可能癱瘓到政府喎,咁都可以作得出來告人?」

『又退一萬步,就當呢個一億份之一嘅可能性──林鄭就係同謀,人大又係弱智,佢哋要堅持原案上,唔釋法唔DQ,唔識修改、撤回、暫緩都要去馬,咁請問要推翻呢個「35+癱瘓政府」同謀嘅林鄭月娥,迫令呢位反黨叛國嘅佢,辭職唔再做特首,究竟係「愛國正義」嘅行為,定係「顛覆國家政權」呢?』

「照足基本法做,每樣程序都係合法,仲要佢哋完工掌握行政、程序、以至法律解釋權,都可以變成顛覆國家政權,咁計落係咪基本法違反國安法?幾時捉班基本法委員,出來控告佢哋顛覆國家政權?」

『總之呢個叫做「莫須有2021」,佢屈你犯法就係犯法,你想贏選舉就係歹毒,你想否決議案就係顛覆,知冇?你話外資會唔會嚇到腳軟呢?』

----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所