• 壹週和你股|物管揀碧服|譚朗蔚

  • 發布日期:2021-01-06 15:41
  • 壹週和你股|物管揀碧服|譚朗蔚

 

今日個市牛皮,點數上無睇頭,不過個股、板塊有異動。強勢的手機、內需忽然調整,而且幅度唔細,個股包括小米(1810)思摩爾(6969)等都跌半成,短線套利味濃,未必需要即時撈底。相反,資金轉戰物管。該板一直低迷,直至今日,阿爺話要刺激這個行業的增長,叫業者從事養老、托兒、快遞等等服務,即時刺激板塊炒到癲,個股隻隻升一成、兩成,升唔到一成的真係唔好出聲。

講真,一隻股份升兩成先至追真係唔係我杯茶,就算我不嬲鍾意破頂、強勢股份都係咁話。不過,中央落指令要加強增長,相信黎緊的調控不會多,一定樣樣野開綠燈。這就可以彌補之前我對內房銷售放緩,窒礙物管增長的憂慮。因此,我有理由相信呢個係浪,不過都要識得揀擇,就例如龍頭、盈利的、強勢的。我成日話,你唔知道股份有幾多日貨仔,因此唔好隨便見邊隻最殘就買邊隻呀。

如是者,最應該買的應該是碧桂園服務(6098),該股我在12月21日,在自己的收費專欄推介過。當時成個物管起動,但係唔知炒乜,依家知了。股份調整了四個月後再起頭,五條均線多頭排列。今日配合成交企穩了歷史頂56蚊,可以買入,目標62蚊先,跌穿52蚊頸線止蝕。但我都要戴返個頭盔,一日的升幅大到咁先黎搶,通常唔係好事,我不會領粉絲買,最好等回到56蚊買啦。

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!

----------------------------

《香港百年超級豪宅揭秘》經已出版 各大報攤及便利店有售

可按此網上訂購

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所