• 禁忌之林︱再囚肥佬黎 Over無罪推定嘅 Deadbody︱林忌

  • 發布日期:2021-01-01 14:00
  • 禁忌之林︱再囚肥佬黎 Over無罪推定嘅 Deadbody︱林忌

 

「世界變喇!你有冇睇到資深大律師排名第11嘅湯家驊,今鋪佢都忍唔住爆Seed,大鬧律政司代表嘅控方律師『丟臉』?連佢都忍唔住呀呢鋪,你話癲唔癲?」

『國安法第5條寫明「任何人未經司法機關判罪之前均假定無罪」──寫到明話假定係無罪,但律政司代表竟然可以話,因為國安法唔係在香港普通法體系下產生,因此「冇」無罪假定,再搵另一條42條出來,話「除非法官有充足理由相信其不會繼續實施危害國家安全行為的,不得準予保釋」──咁即係乜嘢?自相矛盾?』

「即係表面上係無罪假定,但係因為發明呢條法律嘅地方冇呢樣嘢,所以佢話有,唔等如有,你聽唔聽得明?」

『咁都得?』

「然後又話因為第42條寫到明,話除非法官有理由相信你唔會再犯,否則唔畀你保釋,所以唔應該畀你保釋囉!」

『咁都叫做有無罪假定呀仲?即係你有,不過除非法官信你唔會再犯先有;但法官又點樣可以信你唔會再犯呢?法官憑咩可以信你呢?就係先假定你會「繼續犯」囉──呢啲叫乜嘢?未審先判,先判再你犯緊,然後再屈你會繼續犯,然後除非法官相信你唔會犯,亦唔會繼續犯,先可以畀你保釋?』

「係呀?即係法官相信你唔會犯,再相信你唔會『繼續犯』,咁咪可以畀你保釋囉!」

『咁直頭係要法官相信係老屈生豬肉,你先可以「保釋」?明老屈你,唔係即時釋放,而只係「保釋」咋?咁叫做有言論自由?咁叫做有法治呀?』

「係囉,同你講法治嘅時候,就話香港嘅法治行之有效;要相信香港嘅普通法法制;去到普通法最基本嘅刑事法律基礎──無罪假定嘅時候,律政司就同你講,原來僭建咗一條唔係由英國普通法訂立嘅法律,而呢條法律所謂『法治』、『普通法』嘅最基本原則,都不適用!」

『既然無罪推定都唔適用,咁點解基於無罪推定嘅「人權」、「法治」呢幾隻字,都仲要適用呢?』

「睇完控方指控嗰時,你仲覺得震驚呀,連國安法指定法官李運騰,都指出控方證據並非好強,例如指控黎智英在訪談中,『請求外國制裁』,睇起來只屬『評論』,而唔係請求咋,因此辯方係有抗辯理據;控方點講呢?嘩!『法庭可推論,言論係經掩飾嘅請求』,然後就可以以言入罪,話你即使唔係咁講,但只係『掩飾』,連『評論』都可以認為係『掩飾』,即係你冇用口講過,佢都可以屈你『真正諗法』係『請求』,仲衰過以言入罪!」

『律政司嘅書面陳詞仲得人驚呀,話肥佬黎自2014年起「積極支持泛民主派及反對中國共產黨與香港政府」、「開Twitter講嘢」、「得到多個外國政要追蹤」,有9.6萬個評論,都係「犯罪證據」,去證明肥佬黎「激進嘅意思形態」係「危害國家安全」呀?』

「原來支持民主,反對獨裁,反對政府,都全部係「激進意識形態危害國家安全」,而且仲嚴重到用殺人來比喻,真係好似殺人易過食生菜,你反對共產黨,就係日日搞大屠殺咁款,咁都講得出口呀!」

『用返律政司講法,你就算高叫支持希特拉,支持獨裁,支持六四大屠殺,都一定係「掩飾」!總之律政司拉你,你就要「有罪推定」然後不准保釋,然後等待終生監禁嘅刑期喎,佢話你犯法就犯法,然後就等如殺咗人,等於要終生監禁,呢啲叫做「言論自由」喎!』

Over my dead body,今次真係Dead咗,死直啦。

----------------------------

按此訂購「壹週刊 X 勁揪體 2021 和你壹起撐住香港」月曆

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所