• 禁忌之林|封你樓易 封中國關難|林忌

  • 發布日期:2020-12-26 12:30
  • 禁忌之林|封你樓易 封中國關難|林忌

 

「嘩!沙田乙明邨爆6宗確診──之嘛,你睇政府玩邊科?封樓呀!唔畀出入呀!要你出示檢測結果先畀走呀!傻的嗎?」

『好合理呀,驚你小型爆發嘛,咁都驚你哋成班中,咪要檢測囉,有咩問題先?』



「驗咗啦!但係交咗個樣本,政府自己講,話要中陽性結果,先會通知;如果陰性即係冇事,就唔會通知,咁我點樣提供證據,去證明自己冇事呀?」

『等陣先,政府咪講咗囉,中咗咪會通知你囉!』



「中咗通知我,咁我咪唔可以外出囉!」

『係呀!』



「咁我拎個證據畀佢做乜?」

『咁你咪拎個陰性結果畀佢囉。』



「陰性結果佢話唔通知喎!」

『咁咪即係你冇證據,咪所以唔畀你出去囉。』



「咁咪即係你驗完,中與唔中,都唔畀出去囉!」

『冇錯啦!呢個就係特膠政府啦!中就唔畀出,唔中都畀出,你要就中出──好似果個咩私煙咁,中咗,卻驗到陰性,咁咪畀出囉!』



「但係亞梁美芬議員幫佢兩公婆出頭,質問政府點解驗咗成十日都出唔到結果,等佢哋在家白等喎。」

『政府英明呀!你諗下,如果政府通知咗佢哋,知道自己係陰性,嘩!一陣又出去跳老舞,容乜易傳到幾個人架?』



「係呢,咁點解明明中咗,隻毒仲要惡到,令阿私煙嬸幾日就去見毛主席,咁點解會驗到陰性呢?」

『中國嘅檢測,一係中,一係唔中,驗唔到,唔出奇呀?』



「咁點解私煙嬸個老公,都一樣係陰性呢?」

『私煙嬸驗出陰性,所以佢老公都驗出陰性,證明好 consistent 呀!好啲咁諗,即係起碼隻檢測唔係「隨機」,擲骰仔咁呀?你應該覺得高興先係!』



「咁全民檢測有咩用?明明中咗都驗出來陰性,有咩用?」

『等你中咗都可以外出,然後又去跳老舞囉!』



「所以政府驗完陰性都唔話你知,咩八百幾人受影響,唔係行政錯誤,係德政,我哋對皇恩浩蕩,謝主隆恩先係?」

『你到今日先認識呢個特區政府咩?最緊要唔係辦公,而係「扮工」;谷大抽驗條數佢,吹到條數大一大,可以領功就夠啦;至於有幾多係錯驗、漏驗、誤差?唔緊要,使乜理佢呀,中國嘅測試永遠是對的,有咩可能驗錯先?』



「咁私煙嬸點解驗出來陰性呀?」

『可能係驗完先中呢!』



「係係係,一定係在參加檢測果時中!」

『嘩!乜你咁講野!冇可能嘅,偉大祖國嘅外判公司,一定好小心謹慎做野,唔好抹黑人哋呀!』



「即係好似前排的士司機驗完,搞到私人資料錯漏百出,然後要捉班司機再驗多次果單咁?」

『一定係反對派搞搞震嘅錯,一定係有『黑暴』混入的士司機收咗外國錢,然後搞事啦!」



「係呀,一定係林鄭月娥係外國間諜,所以澳門打疫苗就有得揀,香港就唔畀揀。」

『人哋改咗口啦,話你哋「誤會」佢呀,話只係唔保證度度時時都有任何一種疫苗喎。』



「唔係可以預約咩?唔係可以講明約幾時咩?乜政府弱智架?唔識自己分隊排?疫苗到咗輪住去都做唔到?」

『哎呀,你咁樣將死人哋,啲擦鞋仔搵唔到野駁返你呀,咩賣港01果啲,即晚就幫林鄭兜,好難做架!』



「係係係,所以叫佢中國關口,或者全面封關就話係歧視,係排外,係法西斯;話唔可以阻止香港居民返香港;轉頭而家就話封英國關,唔畀英國留學生返香港,幾個月前口口聲聲話人哋歧視嘅,個個粒聲唔出!」

『梗係啦,而家全球來香港,都要強制隔離檢疫21日──中國除外。』



「唔係話14日隔離就夠咩?做咩突然又加到21日,有證據要隔離咁耐咩?林鄭唔係話大家唔好咁政治化,要講科學證據咩?家下英國果隻新變種,佢有咩證據呀?純係hearsay,聽人講咋?」

『哎呀,唔通話你知,總之中國就唔封得,中國就唔懷疑得,中國就要包容,外國就要歧視咩?心照啦大家!總之封你樓易,封中國關難,明冇?』

----------------------------

上次的組合升42% |2021第一季再砌出增長15%組合的部署|壹齊分享網上直播講座|譚朗蔚 x 黃偉豪

立即了解更多



----------------------------

英國BNO 5+1 置業篇 | 英國好校區 x 高回報物業 | 英國物業實戰投資專家余震東 | 壹齊分享網上直播 立即了解更多



----------------------------

BNO 5+1 英國搵工途徑及工種 | 由香港過渡到英國 搵工必修篇 |壹齊分享網上直播 立即了解更多