• 見慣風浪盡視作自然︱刁佬

  • 發布日期:2020-12-17 15:00
  • 見慣風浪盡視作自然︱刁佬

 

今日刁佬去約咗刁界律師聚舊,相約於中環一間十分人氣的餐廳午餐,本來仲擔心多人聚集肺炎傳播,上到餐廳先至發覺只有小貓三幾隻。我突然覺得安全好多,今時今日餐廳而經營困難,講真隨時安全過你屋企個廚房,限制令同埋其他措施繼續落去,相信飲食界會有新一輪腥風血雨,失業率上升。

刁佬經常話有危自有機,好多讀者都想問有乜嘢可以介紹,刁佬調返轉唸,反而就係希望讀者留意有邊啲嘢唔可以投,所有零售相關嘅股份、所有飲食相關嘅股份,甚至乎大部份傳統經濟,只要著重人力去營運嘅股份都會係呢一輪受到抑壓,相信唯獨是得幾個行業例外,第一就係運輸,到今日先至發覺運輸係咁重要,另外一個當然係醫療囉,喺大病嘅時候冇嘢緊要得過仲有人幫你醫病。

至於其他嘅業務,相信喺嚟緊嘅上市公司年報將會陸續見到裁員、減薪甚至乎業績大幅倒退嘅情況出現。其實,自從互聯網開始咗之後,人類嘅採購行為開始作出改變,每一個改變都會影響到市場嘅資產變化,最直接嘅就係店鋪嘅存在到底有冇需要,商鋪當失去人流及消費既支援,仲有冇需要用大量租金?個價是否值咁貴呢?以前銅鑼灣隨便一個鋪都可以過億,日後會唔會有調整呢?相信好快大家會見得到。

另一方面,刁佬亦都發覺好多小本經營嘅小商戶,喺疫情之中不但生意沒有影響,反而因為外賣增加,生意直線上升。當裝修同埋堂食嘅豪華感覺失去作用之後,好多餐廳都必須還原基本步,要以食物質素取悅客戶。雖然可能生意仍然受到外圍因素影響,但係喺疫情中能夠繼續生存,已經係最了不起嘅成就,相信疫情過後更有發展空間。

歷史證實過去可以承傳百年嘅老店,每一間都有十分紮實的基本功,在各行各業之中能夠在潮流中生存已成不簡單,但係要可以在長時間中屹立不倒必需要求真功夫。刁佬相信做人做事都必須經歷高低起跌,大浪淘沙。希望仍然繼續努力的各位老闆,可以咬實牙根,與夥記一同渡過呢一段困難嘅日子。

易經有言,潛龍勿用,陽在下也。

就算是潛藏的龍,在困難的時候亦都要等待,切勿有任何作為,養精蓄銳的時候,凡事應當靜待時機,不宜行事,切勿躁進。

祝大家身體健康!事事小心!切忌衝動小心投資!

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

按此訂購「壹週刊 X 勁揪體 2021 和你壹起撐住香港」月曆

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所