• 禁忌之林|林鄭又成功爭取開心肺炎餐!(林忌)

  • 發布日期:2020-12-11 14:00
  •  禁忌之林|林鄭又成功爭取開心肺炎餐!(林忌)

 

又禁晚市堂食啦!天寒地凍去公園圍埋一個圈,食「開心肺炎餐」!有咁樣嘅政府,係咪好開心呢?實在係開心死呀!

早兩日有冇見過一份聯署?話支持政府強制檢測、禁足唔畀出街,仲要搞咩健康碼,所謂「三管齊下」,然後爭取乜嘢呢?唔係令香港市民可以恢復正常生活,而係可以一月「通關」!

好通唔通,走去「通關」?有冇咁趕呀?趕去大陸通姦定通渠呀?究竟前面嗰三樣嘢,同「通關」有咩關係?你唔封關,走去封城?即係大陸人就可以自出自入,香港人就要鎖在家中?為咗畀更多大陸人來,所以香港人就連街都唔可以出?呢班仲唔係港奸?

講起「禁足令」就真係忍唔住笑,後生仔有氣力擔擔抬抬,更慣晒上網買嘢,加埋黃色經濟圈互助互惠,真係要禁足?都肯定仲可以生存落去;嗰班藍絲阿伯同阿嬸呢?平日慣咗日日落超市,網又唔識上,成班又自X私,你覺得咩人驚啲呢?好啦,真係如果政府真係封畀你睇,到時話「政府話」會搵人幫你買嘢,處理到幾多個「小區」?班跳少兩日老舞都要死嘅,到時頂得順嗎?你望下平時親政府親到hihi嗰班的士商會代表,呢兩日話要「強制檢疫」嗰時,究竟係咩嘢口面?

九月嗰時,政府唔係大大聲話要做咩「全民檢測」,然後就可以冇事咩?唔係講到話驗完就可以去咩旅遊氣泡,又可以去日韓歐洲澳紐旅行咩?而家石澳淺水灣個沙灘都閂埋,連Staycation都唔畀你去呀!人蠢冇藥醫,繼續大開中門搞「免檢疫」,搞咩健康碼畀港人免隔離回港,甚至幻想到要擴展畀其他大陸居民,個後果就係永續武肺,隔兩、三個月就大爆發一次,我真係恭喜你呀!

點解人哋台灣2300萬人,至今都只係七百幾單cases,但係我哋750萬人,卻已經七千幾單?係人哋成十倍?點解台灣甚至曾經可以成島唔使強制戴口罩,但係我哋日日戴都仲係大爆發?原因好簡單,就係人哋個封關係真嘅,旅遊或者冇緊要事,一律唔畀入;至於有理由要入,唔理咩居民,出入就要強制隔離,皇親國戚都冇面畀。至於香港?係封外,唔封「內」,而且上有政策,下有對策,不斷被揭發下面hea做,一大堆漏洞,由一班連工人要食晏都唔知,叫人去郊野公園開飯嘅「智將」,除咗識得把限聚人數、時間改來改去,然後不斷亂叫咩「全民檢測」同埋健康碼之外,仲識做乜嘢?

Hi Auntie!人哋外國搞到再衰,都知道確保學生可以繼續返學,係第一要務,寧可犧牲其他娛樂;在香港?第一要務係乜嘢?就係仆倒去中國「通姦」,總之就係要中國同香港「通姦」!寧願封咗全香港,然後750萬人驗完又驗,都一定要畀班友上上落落,「通姦」去中國;請問咁鍾意咪搬去大陸住,唔好返來囉,做咩要出出入入先?為咗你出出入入high啲,所以要香港人日日鎖在屋企?

「藍絲日日就叫封城,到真係封嗰時,你覺得嘈到拆天係咩人?我真係食住花生等睇戲呀!」

「武肺爆咗成年,政府終於知道,原來叫封咗大廈之前,啲人係會即晚搬走㗎!絕對係開心大發現!」

「九月就發夢去旅行,十月就去飲湯,十一月就跳老舞,然後而家就鬧點解唔禁足?最鍾意攬炒係咩人?咪呢班藍絲囉」

「又禁食肆,晚黑唔畀堂食啦!早排見到班咩業界代表,登報話要求關注下佢哋冇飯開,我真係忍唔住笑出來呀!你哋日日叫解封,而家大爆發啦,求仁得仁啦!仲嘈乜?」

「好心你啦,人哋乞政府畀錢咋,你估真係關心發生咩事咩,同林鄭拗錢講數咋,咪認真啦!」

「家下香港搞成咁,咪多謝林鄭成功爭取囉,理得佢呀,認真就輸了!」

「係呀,你估班獻世派鬧林鄭,真係因為民生問題咩,成班爭特首位咋,由得佢哋鬼打鬼啦!」

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所