美國制裁崩牙駒｜出獄後首度開腔 崩牙駒：「我要做嘢」

 

澳門江湖猛人尹國駒（崩牙駒），被美國財政部實施制裁。

美國財政部表示，制裁崩牙駒以及3間由他控制的公司，包括東美投資集團有限公司、Palau China Hung-Mun Cultural Association和世界洪門歷史文化協會。財政部指他在北京的一帶一路倡議的背景下，在東南亞擴張其犯罪活動。

崩牙駒在2012年出獄後，一直十分低調。但2018年開始，崩牙駒高調表示將大力支持一帶一路倡議，計劃在一帶一路沿線區域成立「洪門安保公司」，為國家招商引資。

本刊於2013年， 曾專訪當時出獄8個月的崩牙駒，他曾提到兒時父親是極左派，只要說一句毛澤東壞話，便會被父親以皮帶鞭至流血，加上就讀毛校（即勞工子弟學校），對毛語錄瞭如指掌。

2013 年 7 月 18 日 第1219期《壹週刊》｜封面故事

入獄十四年零七個月的澳門教父尹國駒（崩牙駒），於去年底獲釋，在囚禁期間，澳門賭業黃金歲月出現巨大變天，隨着賭權開放，美資賭場加入令整個行業百花齊放，在囚禁的歲月裡，崩牙駒不單只失去自由，亦平白喪失在賭業上發揮的黃金歲月，出獄八個月的崩牙駒已養精蓄銳，首度開腔接受本刊專訪，細訴在獄中如何韜光養晦，部署重出江湖，更明言：「我絕對係一個有能力嘅人，我有太多嘢想做。」

鐵窗生涯令他悟出一套對敵人、社團、家庭的人生觀，作為自己在未來十年繼續打拼的宗旨。

牢獄怨憤

曾經叱咤風雲的江湖猛人尹國駒（綽號崩牙駒），靠着椅背安坐沙發上，身穿白恤衫、黑西褲、 Bally白皮鞋，兩袖往上摺，腕戴閃鑽伯爵名錶，江湖味依舊。身子紮實，容貌較出獄時飽滿，仔細看有點髮線上移，前額露出皺紋，眼袋深陷，目光內斂，與當年囂張的形象大相徑庭，多年牢獄在他身上留下痕跡。

前半生呼風喚雨，崩牙駒人生的轉捩點，是九八年五月一日的早上。當時澳門司警白德安的坐駕車底發生炸彈爆炸，白德安往晨運未返車上，未有受傷。事發後九小時，白德安親自帶隊到葡京拘捕事業如日中天的崩牙駒，當時他正在廂房中大唱鄭少秋名歌《決戰前夕》，曲才唱一半，人已被捕，二人在酒店門外怒目相視的一幕被拍下來，成為經典的新聞圖片。
壹：壹週刊　駒：尹國駒

壹：事隔十五年，點睇白德安炸彈案？

駒：（坐直身子，皺眉，雙眼含怒）俾人屈，我真係俾人屈！你話我黑社會我無嘢講，除咗黑社會，後期所有發生嘅嘢我係不知情！正所謂不知者不罪！咁算唔算屈呢？我真係唔識講！



壹：覺得呢十幾年係寃獄？

駒：（語帶嘲弄）人無拉錯， charge落錯啫！你簡單化話黑社會，你喺賭場，我諗隨時拉一千幾百個出嚟，好似我咁，罪名係黑社會，無乜邊個走得甩！你話你拉我放貴利，起碼我放咗幾多錢，放俾姓陳姓李姓黃，姓氏又無，放幾多錢又無！你話我洗黑錢，洗咗啲咩黑錢，洗咗幾多錢，又無！你話我黑社會、首領，起碼要有𡃁仔指證我吖！無，咁我點做首領呢？



壹：當年中葡聯手拉你落馬，有無唔甘心？宣判當日，你家人仲喺庭上大聲話葡國佬收咗水房錢。

駒：（嘆一口氣）都係葡國佬主導，中國當時摸不清，想澳門穩定，葡國佬話：「你拉咗崩牙駒啦。」要明白有主次之分，邊啲人有心去布局，佢哋心中有數。葡國佬收咗水房錢，不如你問吓佢哋有無咁嘅事啦，不過睇嚟都無意思，有啲嘢明白就得。未入去之前，我成立國力慈善基金，諗住回歸後退落嚟，以和為貴、捐錢建校，當年以我嘅環境叫人捐錢，一億幾千萬根本唔難。我好希望回歸，點知回歸慶祝我喺入面，真係諗唔到！



壹：有傳你在監倉門口貼上「統一江湖」大字，係咪真？

駒：（無奈一笑）呢句說話絕對係作大嘅，「統一江湖」？俾人判十幾年，有無命出嚟都未知，嗰啲有心人想講衰我啫！一入去，我親手喺個房寫：「一時失運陷困局，積極發奮不仇目，扭轉乾坤有轉機，定會再次衝天飛」，只係寫過呢幾個字喺牆度俾我望住！ 噩夢難眠 失去自由，對崩牙駒而言，是由天堂跌入地獄，由澳門教父淪為階下囚，囚其心志最是難熬。在路環監獄「細屋」中，每天除了有五小時「看電視」，其餘時間在數十呎的囚禁倉獨處，十四年零七個月的鐵窗生涯，是度日如年。深陷的眼袋，是鬱結難解、夜夜難眠的鐵證，人無自由，只能憑歌自勉。



駒：（眼神無奈，語氣淡然）初初諗住十幾年，申請學英文，諗住一日學一個字，學到出嚟都識講啲英文吖。但個老師唔識講中文，我學都未學過，點讀啫，結果成日吹水傾偈。喺入面我咩書都睇，佛經、《三國》，經濟書都有，日日做運動，早午晚都有做，掌上壓、玩啞鈴咁，每日有幾個時段，放五個半鐘俾我哋睇電視，其他時間我聽收音機，收到澳門同大陸台，一路都留意住啲深層次問題。

喺入面，我日日都發噩夢，日日都要戰鬥嘅，總之就係激烈，乜都有，總之就係佢又搞我，我又搞佢，一瞓就發。（語氣激動）撐手撐腳，瞓唔着撐到天光。所以我最鍾意聽《有誰共鳴》、《決戰前夕》同《一生何求》，聽啲歌詞就知。《一生何求》嗰句「我所失的」，當時啱啱判刑，不斷諗呢十幾年點捱過，《有誰共鳴》，諗番自己過去所做嘅嘢……呢啲歌，聽落好有感受。 半生重義 夜闌靜，無人共鳴，漫漫長夜，開始回想前半生。崩牙駒在新橋區青草街長大，家中貧困，父親光叔是水廠工人，母親則在火柴廠打工，崩牙駒是家中長子，十多歲到地盤執爛鐵賺錢養家，回家煮飯、破柴，負起照顧弟妹責任。



壹：你係咪左仔？

駒：我老豆係極左，細個講毛澤東一句唔好，佢就剝皮帶鞭到我哋流晒血。我讀毛校（即勞工子弟學校），返學成日聽共產故事，睇毛主席語錄，「為人民服務」好啱道理，嗰時犯咗啲小問題，日日都要抄幾遍毛語錄，抄咗幾個月，倒轉背都仲得，而家就忘記晒啦。



壹：如果澳門一早開放賭業，將個餅做大佢，就唔使事事要流血？

駒：（語氣決絕）糾正一樣嘢，我從不為利益爭鬥！我喺屋企打麻雀，有賊入屋，咁我揸刀抗賊，咁我算唔算爭利益呢？如果我呢啲叫爭利益，無辦法，我就承受咗佢。屋主都要承受，咁個賊呢？佢入屋打劫我梗係維護我利益啦，我拿刀斬個賊，法律上斬人有罪、係罪有應得，咁個賊呢？

我一路都係維護兄弟、家人、朋友，你蝦我啲兄弟、朋友都唔得。我喺江湖，係正派，七分正三分邪！我係武松，老虎成日咬人，武松打老虎，啲人咪驚埋武松，其實使乜驚？黑對黑，你話對定錯呢，人斬我一刀，我斬人幾刀，你話我過分？



壹：你身為江湖中人，點解會不煙不酒？

駒：我要清晰頭腦，唔染嗰啲壞習慣，飲咗酒就糊裡糊塗，我老豆係大醉俠，日日醉、郁啲就鬧人，所以我唔會飲。（壹：同細佬國良吸毒死有關？）逢毒品我都唔會掂，我曾經賭錢，有一段時間我輸到好傷，做呢樣嘢（指販毒）嘅人話：「阿駒，錢就攞唔到俾你，過嚟俾幾水呢樣嘢你做。」我話唔使啦、多謝、有心，逢呢啲我唔掂。 高調禍至 他自認很隨意，記者要求看看他的身份證也沒所謂，那時剛出冊，樣子憔悴，沒有現時的飽滿，他說：「你話喺入面摧殘得我幾緊要。」



崩牙駒冒起，與街市偉反目，跟死對頭水房賴死拚血鬥，濠江腥風血雨，無日無之。九七年六月，澳門司警發出通緝令，崩牙駒離場遠赴歐洲，遙控手下荷槍實彈，大打游擊戰擊倒對方，同年十一月通緝令撤銷，崩牙駒以大贏家姿態回到澳門，隨即自資一千四百萬元開拍自傳式電影《濠江風雲》、更接受國際性雜誌《時代週刊》及《新聞週刊》的雜誌訪問。當年行事張揚高調，日後成為司警入罪憑據，崩牙駒卻說是因情所致。

壹：當年係咪太高調？

駒：嗰時我同佢（落選亞姐楊愛貞）一齊，同佢講「開齣戲俾你拍」，之後佢提起，我講咗收唔番，我話是但啦，就拍咗《濠江風雲》。其實係想拍摩頂平同街市偉嘈交，以阿摩為主，不過當時就搬咗我上枱。（停下來，一笑）不過我自己跳上枱嘅，都唔係擺上枱嘅！後期開拍電影我就諗到，咦，敏感咗啲喎，但又落唔到台，唔通縮咩？

上雜誌，係拍戲啲人安排，佢哋話：「駒哥，同你做個訪問呢，當銷售、賣埠好啲呀！」我話是但啦，是但是但就搞到我咁，我唔係刻意高調，又中咗招！你哋就知《時代週刊》係乜，我點會理，最紅咩週刊根本唔識！ 積怨放下 崩牙駒母親陳麗萍，多年來風雨不改探監，當時崩牙駒細佬弟尹國雄同樣在囚，三個兒子一死兩坐牢，尹母多年憂傷，一雙眼睛熬出黑眼圈。崩牙駒入獄不久，也對身邊兩位女友楊愛貞和葉嘉愉放狠話，希望她們離開不要再等。



駒：我個角色，我一定叫佢哋唔好等嘅。出到嚟都六十歲，都唔知我有無明天。所以我話，唔好等我啦，楊愛貞誤會我，以為叫葉嘉愉等叫佢唔好等，所以佢走咗，葉嘉愉就堅持，等到而家。

崩牙駒錯失開放賭場的黃金年代，背負家人、兄弟和朋友的希望，十多年來，思前想後，直至臨出獄前兩年，他才決心將多年仇怨嚥下，前事不提。



壹：當年你咁激動，到依家又點解可以放下仇恨？

駒：真係出嚟要面對，真係要決策，你拿咩心態出嚟做人，再唔係入面！積怨咁深，我絕對係一個有能力嘅人，仲有魄力嘅人，但係咪為咗自己個人恩怨，去報呢個仇，令到社會唔太平、家人唔好受、朋友無希望？既然唔想咁，咁點樣化咗去，「功德」兩個字就包括所有，放下心頭之恨。

我出嚟唔係為自己，係為家人、身邊人打好基礎，等佢哋有安定生活，家人、老婆等咗我十幾年，要俾番啲幸福佢哋，我為佢哋打拼緊㗎。出冊前，我立下「功德化干戈，共義享祥和」十個字，同敵人講我唔報仇，大家放下，誰對誰錯唔好再提，決定咗之後，我就晚晚大覺瞓。 復出暗湧 前澳葡時代，刀光劍影的日子不再，澳門賭業變了幾番天，舊部如洗米華、豪仔撈得風生水起，宿敵水房賴亦豬籠入水。人近黃昏，出冊的崩牙駒蓄勢待發，再次染指賭業，手執「和善同樂，共見同行」八字再闖江湖，誓要追回錯失的時光，十年內建功績。



壹：覺得澳門賭業發展成點？點睇美資集團搶佔賭場生意？

駒：完全唔係呢個世界啦，已經完全變晒。賭業發展得好好，但內裡都仲有好多不規則。中國人嘅地方，無理由俾美國人佔大比數嘅，佢哋入嚟發展，帶動係有好處，但係應該中國人食多啲。有咩理由自己地方啲錢俾人吸晒去？



壹：同街市偉、水房賴已經講和？

駒：而家全部都無嘢，唔係淨係街市偉，全部都傾晒偈。唔放低傾嚟做咩呢？鬥，兩害，合，兩利，俾人懷念，好過俾人懷恨。我坐十幾年都可以唔計，佢哋發咗咁多財仲要啲乜？我係有能力嘅人，但係我想將能力做好事，應做就去做。



壹：未來有何大計？

駒：（眼神炯炯，手托下巴）日日同人飲茶食飯，我要知多啲、了解多啲、溝通多啲。有太多嘢想做，時間無多，唔係四十三歲，五十八歲唔再嘥時間，呢一步慢咗，其他步伐都慢。呢十幾年，精英都埋晒班，排擠啲無咁精嘅，邊緣咗，希望扶持嗰班人入番位，有飯食。賭業必定會做，爭在點搭法。下個月會有賭廳開幕，唔會有儀式，低調嘛，投資者來自五湖四海、大江南北，飯就一啖啖食啦，唔會自己落手落腳去管，俾人知我有份就得。

我唔同一般人，有啲暗湧，一啲有權勢、有財力嘅人，仲喺度影響住我。如果我再放慢腳步，一定唔得，有啲人想裝你彈弓、想你犯錯，但你唔做壞事，點撥火都無用。 生命中的女人 後記 記者是八十後，不識腥風血雨的澳葡年代，訪問前，只透過舊新聞「認識」黑道霸王崩牙駒，幕幕街頭浴血、目露兇光，愈看愈心驚。但初見崩牙駒，年近花甲的他主動與記者握手，態度友善，提到生命中的女人，更是一臉溫馨。還未想清，到底是歲月催人，還是過去渲染太過，崩牙駒對記者慨嘆：「其實我做訪問，都係一個負擔，你哋一個寫我好，十個寫我衰，都係負面，又話我高調。」人事盡變，為了身邊人和事業，縱是江湖大佬，也有不得不妥協的時候。 大佬金句 「我哋嘅心理好強嘅，比一般人都強，心理強勁嗰隻，無問題。」

「邊有可能自殺！要殺都殺咗佢先啦，俾人咁害仲自殺？一係就殺埋佢！」

「無事唔好搞事，有事唔好怕事。」

「我絕對唔係一個十惡不赦嘅人，不過江湖人，正邪也弄劍，如來神掌都未必係壞人。」

「死我好驚咩？我唔驚㗎，對我嚟講係好閒事，天要我去，即係要練佢哋（家人），係天意。」

「俾人懷念，好過俾人懷恨！」