• 千古不變淘金夢|刁佬

  • 發布日期:2020-12-10 15:35
  • 千古不變淘金夢|刁佬

 

高盛昨天發表報告預期礦業股會大升,又估計2021年全球鐵礦石市場將出現三年供不應求的情況,不禁令刁佬諗起2007年時高盛入股蒙古能源9.2%股權,隨後炒到飛天的故事。礦同騙案有幾似?買嘅時候睇唔到摸唔到,畀個希望你「地底有舊金,搵到就發達」,真係可以呃住你一世搵唔到,難怪有啲人稱礦佬係拎住鋤頭的騙子。

聯交所對礦業公司有特別嘅上市要求,詳情可參看《第十八章 礦業公司》。礦業未有營運、達唔到正常上市公司的盈利要求都可以上市,不過畀得優厚的條件,自然有其他約束。既然未有營運,即係販賣夢想。夢想係需要資金實現,咁唔該搵行業專家按《JORC規則》出返份礦產資源量報告。

礦產藏量唔代表一切,挖掘成本都好重要。挖到的金可賣一萬,挖掘成本八千,咁就好啦。假設金礦銀礦在海溝地震帶接近地核的位置,需要高超技術及成本先掘得到,礦產商業價值低於挖掘成本,咁真係唔掘好過啦。好似黃子華話齋「你嗰張股票平過你嗰張股票」。

洗幾多錢基建先挖掘到,對礦業公司來說非常關鍵,就如你後日會發達,不過聽日就死咗,將來都無咗。聯交所會關心礦業公司夠唔夠資金捱到挖礦發達之日,通常要求係行業專家報告中的挖掘成本額外120%,可以從銀行融資所得,但如果無就對唔住。

聽落都好穩陣喎,不過礦業公司在香港不是很受歡迎。這點與會計準則都好有關係。第一是估值,如果個礦一噸估值一千萬,挖一噸礦就少了一千萬,現金流又增長一千萬,出現的情況就是攤銷後,由挖礦所得的利潤永遠都是零,但有現金流。因為第一天公司已把價值計算在內,如果你以一元買價值一元的礦,基本上是無利潤。怎樣才可以有利潤?一元買到兩元的礦就發達啦。不過有咁荀點解會輪到你?一早私有化咗。

很多礦都是大宗商品及期貨的產品,資源類價格波幅大,又受衍生工具及炒賣影響,國家政策及環保風向左搖右擺,都可左右礦的價值。明明有價值可以變得無價值,奇貨可居時又炒到飛天。

想咗好耐除咗紫金礦業之外都想唔到有邊隻礦業股,已上市的礦業股口碑麻麻,上市後表現不如預期,無乜運行。其實刁佬覺得礦主無謂諗18章,有資金有實力就自己開礦,場外賺錢,賺到錢先好上市見人,又或者將個礦注入上市公司大家一齊合作。

刁佬通知大家,騙徒手法層出不窮,地下有個寶呢種手法已經流傳數以千年,年近歲晚又係老千活躍於市場嘅季節,大家看好自己銀包。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所