• 轉角逢生新事物|刁佬

  • 發布日期:2020-12-04 15:00
  • 轉角逢生新事物|刁佬

 

好多朋友問刁佬呢排生意如何,陸陸續續好多大大小小上市公司爆煲及出現問題,做救急扶危的生意現在好活躍,條街最好生意,不外乎是清盤官及重組顧問。不過今期我哋唔講呢啲,我哋跳出香港,講吓美國的SPAC(Special Purpose Acquisition Company,特殊目的收購公司),由個名都知係特別收購用途的公司。

其實呢間公司係啲咩?有班人出一本招股書,大家按招股書方向就去集資,亦根據招股書約定的投資方向去收購公司及項目。聽落幾合理,有咩問題呢?

在市道不好的時候,SPAC呢種投資公司應運而生,就好似禿鷹咁,見到公司就快死,啄埋最後一口肉。投資禿鷹就好似金融界入面的清道夫,幫下啲爆煲公司快啲輪迴轉世,有骨拿骨,有肉拿肉,淨低個靈魂唔該下世快啲投胎。好多時候公司清盤時,就會有好多行業專家成立呢種投資公司,作為行業專家,當然知邊啲係好嘢。

幻想總是美麗,現實總是殘酷。在行內我們對SPAC有很多外號,例如是“Blank check company”(空白支票公司),Blank check company另外一個别名叫就係笨柒公司。你畀得錢個基金經理幫你投,自然會有出人意表的結果。

我哋係亞洲首屈一指的金融中心,當然有類似的公司,就是根據聯交所《上市規則》第21章上市的公司。SPAC與21章公司上市條件大同小異,都有一些限制,而21章公司的投資行為非常嚴格,不可營運及控股投資目標,換言之就是只可以買非控股股權,最多只可買30%,而且一定要聘請證監會9號牌的資產管理公司作為他們的投資顧問及董事,該投資顧問及董事還要管理過大型基金。

其實聽落都無乜問題,不過過去十多年新上市的21章公司十分稀少,聯交所及證監會都各出奇謀唔想呢類公司上市。做得21章公司,手持大量現金,主營業務就係投資,自然化身成有牌炒鬼。聯交所一向都想市場上多啲中長線投資型既投資者,所以不太鼓勵短炒型的投資者。21章公司攞正牌炒股票,主業就是炒賣上市或非上市公司,並無實際主營業務,拉又拉唔到你,而且又不受現金公司及13.24等上市條例限制,萬一藏污納垢點算。

其中一隻出名的21章公司,就是人稱「道士股」的鼎益豐(612),現時深受調查之中,如果大家活躍股場都好知道是一間怎樣的公司。每次市場有大變化時,轉角逢生之時,總有很多另類及新奇事物出現。香港市場都靜咗一段時間,看看將來若果真的修例提高上市要求,屆時又將會有一輪新的收購合併誕生。

專欄作家簡介:

刁佬

遊走在中環黑白之間,自覺是個穿著西裝的古惑仔,在波詭雲譎的金融市場中,鑽研刀不血刃的秘訣。

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所