• 禁忌之林|由華大媽教你相由心生(林忌)

  • 發布日期:2020-12-04 13:00
  •  禁忌之林|由華大媽教你相由心生(林忌)

 

「中國人說相由心生,希望美國不要把所有人都看成是間諜。」──中國外交部發言人華春瑩,就美國加強取締中國籍人員竊取美國技術嘅行為作出回應,攻擊美國方面「恐嚇」中國留學生,是「有罪推定」、「狹隘」和「極端不正常」,點解「美國自詡為強大嘅民主國家,卻對和中國交往不自信」喎。

聽到真係忍唔住笑──冇自信?邊個夠你來呀?十幾歲學生哥就告「危害國家安全」,唱兩首歌叫兩個口號,就變左「分裂國家」?究竟咩人先係「極端不正常」先?美國對你班留學生咁差,仲唔派戰狼接晒佢哋返來?乜中國唔係強國咩?做咩要受美國氣先?睇到中國外交部不斷自打嘴巴,對住澳洲就兇狠,對住美國就碌銀,真係相由心生,點睇都好似華大媽、趙立堅一樣,一臉奸相啦,係咪?

美國兩院通過議案,要求任何在美國上市嘅公司,必須守美國嘅審訊標準,交代披露是由外國政府擁有或控制,咦?好正常不過嘅立法係咪?我哋平日成日聽得到,不得干預他國內政,在人哋國家上市,當然要守當地嘅法規啦?呢啲中國外交部年年月月日日講嘅言論,我都已經曉背!之但係,你估華大媽點回應?

「美國對中國公司採取歧視性政策,是對中國企業進行政治打壓!反對將證券監管政治化!」真係神奇、頂級、超卓!美國公司去中國,就要守中國嘅法律,要守中國標準監管;中國公司去美國,叫你守返美國法律同標準,就變成「歧視」,咦?原來守當地法律就係「政治化」拿?原來「守法」又變成「政治打壓」嗱?

平日就成日鬧人哋「勾結外國勢力」,到人哋美國要求你披露──只係披露有冇聯繫咋,又變成「歧視」!唔通中國政府歧視自己?連講畀人哋知,究竟你有冇持有股份以至控制權,都唔畀得人知?點解唔講得呢?唔係話冇嘢唔見得光咩?唔係話人哋成日老屈你偷嘢咩?家下人哋叫你誠實申報咋,然後就話人哋「製造障礙」?

後面嗰句仲好笑,「如果最終通過成法律,將嚴重削弱全球投資者,對美國資本市場嘅信心,最終損害美國資本市場嘅國際地位,損害美國自身嘅利益」──嘩!美國自殘,作為「第二強國」嘅中國,唔係應該笑出來咩?唔係應該立即四處搵人,由美國改來中國投資咩?做乜人哋趕客,你都唔搶先?做咩要益美國呀?

一面就鬧美國不斷「打壓」中國,一面就對澳洲做出更多更嚴厲嘅限制,由大閘蟹到紅酒,都要搞到人哋血本無歸,其他國家認真望住美國制裁中國,你估係咩諗法?係同情你中國,定係忍唔住笑出聲?

人玩 Twitter你玩 Twitter,玩到被「人贓並獲」,用假圖來抹黑澳洲──十幾年前澳洲軍隊在阿富汗殺害當地人犯錯,一揭發就立即開除相關人員,再對佢哋調查,趙立堅貼張假相,究竟會對澳洲造成乜嘢傷害?係零!對中國造成嘅傷害?全世界都見到中國用假圖來欺壓澳洲,於是當地報紙頭條重現8964坦克人一幕,再加句「呢張係真圖」,唔衰攞來衰,就係呢種囉!

最巴閉係乜嘢?至多就係令Twitter中伏,被人質問點解唔標示佢係假新聞,中國又贏啦!又贏得更多敵人,真係除咗一堆第三世界窮國,等拎錢開飯嗰班之外,仲有咩人敢做中國嘅「朋友」?

所以話,當中國老定以為自己贏硬,然後進一步搞戰狼外交嗰時,好多就算當年係親中嘅,都變晒反中,例如你望下加拿大個杜魯多?四方樹敵,八面威風,冇中國嗌交部嗌多幾嗌,又邊度搵到咁多國家變晒反中圍中?

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所