• 禁忌之林︱警察強姦?乜唔係陰部襲警咩?︱林忌

  • 發布日期:2020-11-20 13:45
  • 禁忌之林︱警察強姦?乜唔係陰部襲警咩?︱林忌

 

「嘩!好似話有警察被控強姦喎?係咪先?有冇可能先?乜律政司會告警察強姦㗎?會唔會撤銷起訴,或者不提證供起訴?又或者倒轉頭,走去控告個女仔陰部襲警㗎?」

『陰部襲警你都作得出?陰部點樣襲警呀?邊有可能襲警呀?』

「咩冇可能?當日胸部襲警都告得到,點解而家陰部唔得先?你歧視陰部呀?」

『喂,離譜咗啲呀?吹大咗呀?陰部點樣襲警先?唔通個女仔突登除褲,倒返轉去強姦個警察呀?你講到班警察楚楚可憐咁,傻的嗎?』

「唓!你唔記得班建制藍絲KOL,以至一班唔知咩扮識法律界人士,成日喺度吹,話胸部襲警一樣犯法,你哋成班法盲唔知嘈緊乜!襲擊罪只要令對方恐懼會受傷,就可以成立!家下堂堂警察被個女仔鎖住,勒住身體嘅一部份,隨時扯甩條J,命仔都冇呀,咁危險嘅事情,仲唔係襲警?你識乜呀!」

『喂,唔好咁離譜好喎,你要對香港警察有信心!要對律政司嘅專業信任!法治有險可守!香港仍有獨立嘅司法系統,你同我都仍然會相信!』

「好心啦,家下連 over the dead body 都被人DQ埋,Dead 埋啦,你冇睇法庭點判咩?係呀,高院係裁定警察執警唔表示編號,係違反《人權法》,亦都批評監警會,以及警察投訴課,唔能夠處理針對警察嘅投訴呀;法庭甚至質疑,點解監警會冇實質調查警察嘅權力呀,咁又點呢?So what?你覺得警察會理咩?你覺得監警會識得跟進咩?你覺得警察嘅檢控,會因此變得公平咩?」

『你冇聽監警會主席梁定邦,點樣回應高院嘅裁決咩?佢話警方有解釋,世界唔止有一面,唔應該妄下判斷呀!佢仲話自己唔認為警察係蓄意犯法喎,如果你指控係蓄意犯法,就要有足夠證據,而相關證據現時唔存在喎!』

「我知呀,球證、旁證、足協、足總、足委,全部都係我嘅人,你點同我打呀嘛?嘩作為監警會阿頭,居然代埋警察答,話唔認為警察蓄意犯法?問佢點解,佢就答冇足夠證據,問佢點解唔去搵證據,佢就話佢哋冇權查!監警會話冇足夠證據,咁法庭判決咪答咗你,質疑點解你冇調查權力囉,咁監警會唔係應該第一時間,衝出來話支持法庭判決,話要求畀監警會有獨立調查嘅權力咩?」

『林鄭話現有監警制度行之有效呀,班法官作反呀?唔怪得張曉明話要文革,啊唔係,係「改革」司法啦!』

「啊,我乜都睇唔到,因為眯埋咗眼;問點解唔開眼,我話冇權去開;然後就話因為我乜都睇唔到,所以唔認為有任何事情發生過,咁都做得監警會阿頭呀?家下香港已經退化到,連扮中立都廢事,成班爛仔咁款,鬧返你轉頭,吹呀?」

『話時話,好似早幾日先有個兩粒花,著白衫嘅高級督察,涉嫌在警署偷鮑魚──罐頭被捕,又真係好離譜到冇人信喎!』

「連自己友都偷?好衰唔衰,衰警署內犯法,即係隨時偷自己上司呀,同僚嘢,咪拉你囉;偷其他人嘢,就可能唔同講法呢?」

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所