• 吾港戲|黃片要懲罰 香港人爭氣 (尹學仁)

  • 發布日期:2020-11-18 12:00
  • 吾港戲|黃片要懲罰 香港人爭氣 (尹學仁)

 


話說本欄要講本地片為主,偏偏開欄三個星期,本地片計數量都好有限。有人話香港電影已死(講到口臭),又有人話香港戲院又貪錢又自我審查,不過去返兩個禮拜前,第一篇文個題:最好時代,最壞時代。其實今時今日,都有例外,都有希望。

正常情況,今日想講一部戲,根本零可能上到畫,商業院線通常根本拒絕播,所以今個星期能夠上畫,證明香港電影,其實又未必一面倒絕望。

想講獨立電影《夜香·鴛鴦·深水埗》,因為部戲有一句對白,我認為堪稱 2020 年港產片最佳:「全港最浪漫KFC」。你覺得香港邊間KFC,其實最浪漫?又點解會最浪漫?究竟邊間,你入戲院自己睇。不過我之所以話《夜香·鴛鴦·深水埗》,正常情況根本零可能上到畫,有以下三個原因:

1. 全片只有 77 分鐘,連一般商業片下限,例如 80 至 90 分鐘,都未到;

2. 一部戲由幾個短故事組成,其實好平常,不過今次部戲由四條短片組成,頭三條劇情片,最後一條紀錄片,紀錄一個妹去挑戰建制派參選區議會,通常商業戲院會拒絕接受古怪組合;

3. 部戲黃到喊。

由一月香港獨立電影節開始,《夜香·鴛鴦·深水埗》今年已經播過好多優先場,在海外亦入選好多影展,好多本地觀眾甚至影評人都會問,四條短片之中,點解會三條劇情片夾一條紀錄片?點解四條短片一定要放埋一齊,變成一部戲,當長片播?其實據我所知,《夜香·鴛鴦·深水埗》成本極低,資金絕大部份源自香港藝術發展局一個計劃資助,所以行政上難以分拆,而導演自己亦要倒貼。

講到導演,《夜香·鴛鴦·深水埗》其實有兩個導演,身兼編劇,仲要夫妻檔:老公梁銘佳本身正職做攝影指導,作品包括《念念》(張艾嘉導演)以及今屆香港電影金像獎得獎好片《叔·叔》;至於老婆 Kate Reilly 紐約長大,身兼演員,演出亦非常搶鏡。


四條短片之中,有兩條劇情短片非常出色,氣氛輕鬆風趣(獨立電影並非等同悶),而且言之有物:

一條講印傭大戰老人痴呆婆婆,短小精悍又大玩電影語言,對白搞笑又真實;一條講本地中學男老師同外藉英文老師一段戀人未滿美食關係,二人感情曖曖昧昧,欲言又止,充滿餘韻,至於食盡香港街頭各種小食,簡直香港宣傳片,而且黃到出汁,有男神王宗堯做主角,秀色可餐,令觀眾食慾大振。

香港人近一年撐黃店都幾成功,《夜香·鴛鴦·深水埗》擺明黃片,王宗堯為發聲而損失絕大部份電視電影演出機會,各位手足必需入戲院瘋狂懲罰。

第一個周末上畫,《夜香·鴛鴦·深水埗》只有六間商業戲院有得睇,場次約十四場,如果大家星期四(11 月 19 號)就即刻力撐,票房大爆,自然有更加多戲院加入放映,場次亦會更多,一般觀眾就更加願意入場。

製造電影黃色奇蹟,睇我同你;香港人,爭氣。

作者簡介

行內人會視為行外人,行外人又會視為行內人。做過電影主創,又做過電影媒體,仲做埋電影教育。未天真到相信電影永恆,亦未灰心到認為香港電影玩完。不過一句到尾,身為電影觀眾,曾經叫做電影學生同畢業生,與其要做電影人,倒不如先透過電影學做人,首先要做個好人。
----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所