• 壹週和你股|加祖龍入科指做乜Q?|譚朗蔚
  • 2020-11-16    

  • 壹週和你股|加祖龍入科指做乜Q?|譚朗蔚

 

上星期五,市場最最最關心的一件事,莫過於美團(3690)到底還要在染藍前被折騰幾多次。哈哈,你知道,有時有些東西,你以為是一定得的,人家就是偏不俾你。好在,今次終於都入圍。雖然,另外入圍的安踏(2020)和尤其是百威(1876)真係唔知憑咩,anyway,你就當指數公司汰弱留強、「汰細留大」吧,最多沒有益處,也不見得有壞處。

另一個令人關注,甚至是令我側目的,就是恆生科技指數即是港版納指的檢討。被換出的是網龍(777),正常吧,市值最細就係佢;還有恆騰(136)這個都是罪有應得。如果大家在三個月前,指數成立時有聽我講野的話,都知道我的立場,就是:這隻股一日存在,都證明這個指數係何其低質,連垃圾、妖股都佔一席位。高質的科技股真係少到咁?

取而代之的有明源雲(909),這隻SaaS股,我有上市第一天已經唱好架喇,我話:「香港股民一見到個『雲』字,兩隻眼就發青光」哈哈,唔係講笑。另一隻是祖龍(9990),這隻我真係不敢苟同!如果你話加減的機制是「汰細留大」,換出隻250億的恆騰,加隻150億不到的祖龍,到底係咩玩法?莫非真係「螞蟻」趕唔切,「草龍」都頂住先?

我對手遊板塊的看法是「勁負面」。首先,要選都不如選龍頭、股王騰訊(700)啦,網易(9999)我都嫌細唔睇了。第二,你發覺本地上市的手遊股好多都鬼鬼地,尤其是8月底、9月初果期,幾隻輪住來洗,不明所以。今日的祖龍,現價都嫌細了,加上兩日前才破了歷史底,均線空頭,長跌長有。下次季檢,你估佢是不是最有機會被剔出丫拿?

Stevan將會在壹仔開壇講股,一週兩次,揉合技術分析同基本因素,向讀者派發貼士,實行「和你股」!我哋亦歡迎壹會員將投資的問題,發email至 nextfinance@nextdigital.com.hk ,Stevan會在本欄親自解答。

作者簡介:新一代股評人譚朗蔚(Stevan),以嬉笑怒罵和幽默分析見稱。股民以為佢只靠外表搵食,但佢偏以勤力分析,揸緊宗旨取勝。佢曾改編歌詞,唱盡股民心聲;又cosplay丁蟹、悟空及大帥哥搞投資Talk Show,顛覆傳統,成為「最貼地股評人」。

Stevan最信奉「萬種行情歸於市」,認為炒股最緊要就是跟勢。佢深信「破頂無頂,天空是頂」,專門為大家發掘強勢破頂股份,佢話「上面無蟹貨無阻力,讓子彈飛」!