• 「燈神」麵咪媽現真身 |27歲患末期腦癌 眾籌惹兩極反應 麵仔:連登可貴在於此
  • 2020-11-14    

 

雖說上連登勿認真,但一位被稱為「燈神」、大名叫麵咪媽(又稱媽咪麵、麵神及麵仔)巴打,就在過去一年火速冒起,被指燈到油價跌至負數,近日一話all in螞蟻集團(6688),集團立即煞停IPO,燈力直迫「燒山」蕭若元。

除因燈力而紅出連登至各大傳媒爭先找他拎comment外,麵仔更意外上過Bloomberg,連富途牛牛圈也有他的忠粉用戶,可見其人氣十足。事實上,這位敢講敢輸不怕瘀的麵仔,是位生於公屋家庭的27歲年輕人,畢業後從事地盤工作,過著簡單平凡的生活。

原來連登的笑聲背後,有著充滿淚水的故事。「今年有日我突然喺食飯途中發羊吊然後暈倒,醒返已經喺白車,去緊醫院。」一次突如其來的暈倒,經檢查後麵仔才驚知自己患有末期腦癌(多形性膠質母細胞瘤/GBM),目前進出過三次醫院,做過電療亦正食化療藥。「我個情況都叫好,醫生睇(壽命)係有兩年多。」誰說這樣的內容,就一定如韓劇般悲慟誇張又狗血地表達;坐在鏡頭前、身形瘦削頭戴cap帽的麵仔,只是淡淡地道出。

「作為香港人,好難有興趣呢回事,基本上都係每日上班下班。我病咗之後就更差,受藥物影響記性變差,唔可以返工,只可以困喺屋企,最常繼續做嘅就係上連登。」麵仔與連登巴絲的聯繫,更由網絡世界走到現實中,患病後的他舉辦過「見麵會」,出乎意料地爆場有過百人參加,支持者由一家大細到六、七十歲的叔叔也有。

「我好感動。」雖慣於在網上大呼小叫暢所欲言,但麵仔真人一談內心感受就如典型男生,略帶含蓄。上連登勿認真,但連登人認真有愛起來,絕對會嚇你一跳。

燈定唔燈?

「而家要澄清!其實我並唔係咁燈。」即管聽聽麵仔解釋。「其實我買股票有成功賺錢嫁,只不過其他唔提咋嘛!好似最近個隻農夫山泉咁,我都贏咗二千幾蚊嫁。」油價跌至負數呢?「當時我只係上網問下網民入邊隻油股好,但我無持有任何油股,因為我開post就話我燈到油價大跌,我覺得唔關我事啊。」講到「無持有任何油股」時,麵仔有特意加重力度的。「嗱螞蟻上市,我本身無抽,同埋只係話上市正日買,咁佢上唔到市,應該都唔關我事啊,係咪先?」

燈神與否,不如就來個秒問秒答環節留個底。(以下內容並無科學根據及精密計算,結構性產品價格可以急升可以急跌投資者或會蒙受投資全盤損失,而過往表現或現時預測並非未來表現指標,所以投資前請參讀上市公司文件作出風險評估,如被燈死後果自負。)

問:來年恒指你覺得係升或跌?

答:跌。

問:好唔好投資中概股嗎?

答:投資。其實大路啲騰訊,阿里巴巴同美團,我覺得呢三隻都值得投資。

問:你覺得中共未來會行好運定衰運?

答:好運的。

問:你認為特朗普會翻到身嗎?

答:好難講,我唔表態啦,但我認為佢未必咁容易可以翻身。

問:馬雲定馬化騰好啲?

答:馬化騰啦,因為大家都知馬雲被人......咩吧。

病後無再買牛熊

要談「燈神」一名的起源,則不得不提麵仔早期牛熊買邊隻死輸邊隻,更有人認為麵仔賭得大輸得多。「我由兩三年前開始投資,當時係牛市,恒指去到三萬三點左右,當時我係玩細價股,牛市起嚟無論細價大價股定藍籌,其實都有升。」中滔環保(1363)是他首隻買的細價股。「當時中國國策指話會大力發展環保業,我個日見到呢隻中滔環保升咗7至8%,我覺得係好嘢嚟,如果唔好又怎點會突然爆升呢,跟住我入咗些少都賺咗些少離場。」但這間令麵仔賺過下的公司現況好像就不太樂觀,「據我所知現時係停咗牌嘅。」麵仔說。

心雄起來的麵仔,於是聽從同事介紹,開始轉戰牛熊。「其實我牛熊注額都係兩三千、三四千,平均都係呢個數,所以無咩賺多賺少,輸得多都係呢個數。」不過,自從病後,麵仔就再無掂牛熊。「做完手術,無咗工作能力後,就開始意識到唔可以再咁亂使錢,所以無玩。」自言以往會研究線圖買牛熊的他,現在開始學睇財報轉買正股。

靠「見麵會」走出低谷

對於股票輸贏,麵仔好睇得開;但說起病情,麵仔坦承曾怨天尤人。「不停問個天點解要揀我,我呢世人講真嘅,壞事有幾可會做到啊,最盡都只係上連登老點連登仔,同埋把口賤些少,都唔洗畀個末期癌症懲罰我啊,呢個懲罰太大啦。」不煙不酒生活健康的他,指自己理應可及時意識到身體出事。「個段時候成日都好攰好想瞓覺,無論做咩都提唔起勁。但當時認為自己無病又後生,所以繼續日常活動。」

想放負,但又不想過份影響身邊人,麵仔因而走上了他最熟悉的連登。「大家就話不如搞個見面會,想支持下我。於是我就分流搞咗三場,每場大約50人,好令我感動。特別係夜晚個場,係爆場到大家坐唔落。不過當時我剛剛做完手術實在太攰,所以尾場我係早走咗,我想喺到同支持我嘅個班人講聲唔好意思,多謝你哋。」

最令他意想不到的,是有支持者以麵仔以往的事,去鼓勵他。「 大家當時有喺畫冊寫啲支持嘅說話,有人就寫:『你知唔知道點解你一直買牛熊一直輸,但你仍一直堅持買牛熊,係因為你不怕大戶,你覺得會戰勝大戶。而你而家病咗,應該都要有信心去戰勝腫瘤同癌細胞。』」

眾籌引兩極反應

正在於公立醫院接受傳統醫療方法的麵仔,近日發起眾籌,希望大家捐款支持他試試新的醫療方法。「我最新要眾籌嘅係部叫TTF嘅機器,佢報告聲稱可以延遲人類壽命四至五個月,我認為自己年輕,所以延遲人壽命嘅期限能因此增加。」TT Fields是藉著特定頻率的交變電場,透過黏貼在皮膚上的電極貼,電場會干擾癌細胞的分裂,從而控制其生長;申請資助後費用所需是90萬元。

目前籌得50萬元的麵仔,謂道從來無為捐款定立某個目標,因為只要有人支持自己,金額是多是少他已十分開心。不過,眾籌同時引發起兩極評價,有人指麵仔「呃錢」,又有人話他「拎錢炒股」、「有錢買股無錢醫病」,質疑他誠信。

「首先最基本,眾籌去投資係犯法,我唔會以身試法。另外,就住今次眾籌,我專程去開咗個新戶口,當中嘅收入同支出係好簡單,收入就係捐款,支出就係醫療費用,數目好清楚。」自問自己沒什麼大嗜好的麵仔,指買股票除了是投資,更重要是他的興趣。「我呢半年只計輸錢,其實大約係四、五千蚊,除開每個月係九百幾蚊,如果以一個有病成日要困喺屋企,無其他娛樂開支嘅人嚟講係咪好離譜?我覺得唔係。」

不過,他並無對網民說話太上心,「連登吸引之處係,唔鍾意一個人,不論個嗰人係醫生、小販或做掃地,我覺得你乞人憎就可以直接話你,我唔需要顧忌自己身份或你身份。連登係能夠好真實表現到每個人想法嘅地方。」同樣標準,亦套在自己身上,「我如果轉換角度睇,都可能認為呢個媽咪麵係呃人嘅。我唔需要理你幾紅幾燈,想追擊就追擊,唔使畀面。」

最想多陪家人

「我住公屋大,有個大我四、五年嘅家姐做護士,爸爸媽媽因為身體同年紀問題已經退休。之前我仍然有工作的話,家庭開支係應付到。但當我病咗之後,我家姐就要一個養三個,所以現時係有啲困難。」麵仔不特別喜歡去旅行,很怕舟車勞頓,思前想後,最想多做的是好好陪伴家人。「我以前貪玩,成日唔理屋企,去玩又唔通知佢哋,而家知係會令到佢哋好擔心。我患病後,屋企人都喺我面前裝作好堅強,盡量想當我係普通人,呢個都係我其中一個意願,但我知佢哋心入面係好傷心。」

麵仔的故事,沒有韓劇跪地痛哭的悲劇橋段,但有最老土卻是至理名言的反思。「無論外面受咗咩氣,我認為最後最後最後嘅防線都有屋企人去支持你。所以,真係對自己屋企人好啲啦。」麵仔說。

後記:

訪問當天,記者見到麵仔頭部做完手術的大疤痕,貪靚的他更講笑話以前有頭髮會gel好耐頭先出街。食完化療藥的麵仔雖然明顯有疲態,但依然玩得笑得,在此祝麵仔早日重拾健康,好人一生平安!

撰文:黃綺敏

拍攝:石鎬鳴

------------------------------------------------------

【圖太郎圖表秘笈課程 發掘出贏錢機會】圖太郎| 網上直播講座

立即了解更多

---------------------------

【英國BNO 5+1 教育篇】報讀英國小學部署 | 任你問Q&A | 陳思銘壹齊分享網上直播 立即了解更多

---------------------------

《噴火30年壹驚艷 性感女星典藏集》特刊現已出版,各大書報攤及便利店有售,每本港幣九十八元正。

當年《壹週刊》鏡頭下的李嘉欣、黎姿、朱茵、舒淇、邱淑貞等三十位經典港姐、性感女星,一一復刻,艷壓全港。

了解更多

-------------