• 禁忌之林|留守食美心 辭職 over my dead body!(林忌)
  • 2020-11-13    

  •  禁忌之林|留守食美心 辭職 over my dead body!(林忌)

 


「食美心?!Over my dead body!」

『咩呀?人哋送生日蛋糕畀我,唔通掉咗佢呀?』

「食你就食啦,呢啲咁cheap嘅野你想食都算,食完仲要打卡上網?用下腦啦,慌死冇人笑咩?」

『我要留守個會議廳,就好似1:69嘅漂白水一樣,為香港帶來熱血嘅清泉!永續基本法,保住你層樓!特朗普有看我的面書,返去同普京打邊爐先!』

「哎呀,你咁樣神神化化,一時一樣,都又仲有人信嘅,到今日都仲信你嗰個先好嘢喎!」

『性交轉運有人信,被公安限制你出境要轉錢都有人信,毛主席教落:「人有多大膽,地有多大產」;想搵銀,梗係要吹大啲啦!』

「吹牛吹咁大,畀人踢爆次次都唔準,點算?」

『你都傻嘅,好多人個腦,同金魚差唔多咋,多數人聽完,聽你吹到好勁,就信咗你好勁,然後就唔記得你講過乜,更加唔會拎返以前你講過嘅說話,來核對準唔準;又或者記得你講錯,開大細十次你有三、四次講中,就當你神咁拜啦,唔係邊有咁多KOL呀?』

「錯得多,或者吹得太離譜,好似 over my dead body 咁,總會被人cap低清算,日日問佢條 dead body去咗邊,咁點算先?」

『唔怕,學下燈神咁,講晒兩邊又得;今日講開大,聽日講開細,咁咪每次都中囉;再唔係,講咗開大,中就係神算,唔中就係燈咗,永遠都係我贏呀!』

「點解咁都仲有人信?其實明明係大話喎!點解佢哋寧願相信大話?」

『希特拉教落,大話愈大,先愈多人信,因為一般人好細膽,就算講大話,都係講小兒科嘢,唔相信有人會真係隨便大膽亂吹,講到天花龍鳳咁,所以公眾係白痴,以為我哋係本土派喎,真係高雄發大財啦!』

「但你開大開細都落咗注,盲嘅都知你實中喎,真係咁都仲信你?」

『好出奇咩?你望下共產黨,唔係日日玩緊呢套咩?一面叫人支持踢走攬炒議員,一面鬧民主派總辭係意圖攬炒,佢班藍絲咪又係信到十足十?多數人係講感受,講個信字,信你,就你吹到乜都得,唔使用腦,亦唔願用腦㗎!』

「咁如果人哋拎埋理據出來,同你對質,咁可以點?」

『呢度又唔係法庭,人哋質你,咪顧左右而言他,轉移視線囉;扮嬲又得,扮激動又得,扮完就再詐死都仲得,搞完一輪都唔得,咪生安白造推砌一堆藉口出來搏同情囉!』

「咁似希特拉當年,賴晒話畀自己友出賣,所以一戰先打敗仗咁?」

『衰過德國佬呀!咩人相信義和團刀槍不入,信毛主席係民族大救星,信洪秀全係耶穌細佬嘅民族呀?愈係亂世,就愈容易出神棍,原因就係人嘅失望,心靈空虛,就會希望奇蹟出現,幻想有聖人出世打救佢,呢種力量其實就係「宗教」──或者「邪教」嘅力量啦。就算被人呃,佢哋嗰頭畀人呃完,都唔會怪個教主呃佢係衰,反而會怪,因為你哋個個唔幫佢,幫唔到佢,所以佢被人呃,都係你哋嘅錯!一日到黑都係因為某某無能,出賣自己人,所以連累到尊貴而偉大嘅佢畀人呃,明唔明?』

----------------------------

《噴火30年壹驚艷 性感女星典藏集》特刊現已出版,各大書報攤、便利店及《壹出版》網店有售,每本港幣九十八元正。

按此購買

----------------------------

守住新聞自由 和你撐壹週刊計劃 每月港幣$300起

按此了解更多

-----------------------------

英國移民、升學、就業、買樓生活資訊!

立即加入「走佬去英國 - BNO 5+1 移民資訊研究所